Tag: Matteus-leesplan

Al drie Sinoptiese Evangelies het die verhaal van Jesus wat saam met sy dissipels oor die See van Galilea na die ander kant toe vaar en in ‘n windstorm beland waarin Jesus sy mag oor die natuur demonstreer.

MATTEUS 8:23-27

23 Hy het toe in die skuit geklim en sy dissipels het Hom gevolg.

24 En skielik was daar ’n groot storm op die see sodat die skuit besig was om deur die golwe verswelg te word, maar Hy het geslaap.

25 En hulle het nadergegaan en Hom wakker gemaak en gesê: “Here, red ons, ons is besig om te vergaan.”

26 En Hy sê vir hulle: “Hoekom is julle bang, kleingelowiges?” Toe het Hy opgestaan en die winde en die see beveel om te bedaar, en daar het ’n groot kalmte gekom.

27 En die mense was verstom en het gesê: “Watter soort man is hierdie dat selfs die winde en see Hom gehoorsaam?”

Teks en konteks

8:23 Anders as in Lukas en Markus se weergawes is dit Jesus wat hier die voortou neem en in die skuit klim met die dissipels wat Hom volg. Dit volg op sy lering oor wat dissipelskap behels. Hier volg dus ‘n praktiese illustrasie aan die dissipels wat dit alles behels.

8:24 Die groot storm op die see kom skielik met die skuit wat dreig om deur die golwe verswelg te word. Jesus was egter nie bekommerd daaroor nie en het geslaap.

8:25 Die dissipels het na Jesus toe gegaan en gepleit dat Hy hulle moet red van die see. Let op dat hulle nie regtig verwytend is, soos in Markus se weergawe, nie, net bevrees.

8:26 Jesus verwyt hulle egter vir hulle kleingeloof. Dit is wat agter hulle vrees lê. Dat hulle Hom nie vertrou nie. As bewys daarvan dat hulle Hom kan vertrou, staan Jesus op en beveel die winde en die see om te bedaar. ‘n Groot kalmte het op die see neergedaal.

8:27 Let op dat dit die “mense” is wat verstom is oor Jesus se gesag. Hulle vraag na “watter soort man” Hy is, sal net hierna deur die demoonbesetenes beantwoord word. Hy is die Seun van God!

Boodskap en betekenis

Om Jesus te volg, stel uitdagende eise aan sy dissipels. Dit is nie net die mense waarheen hulle op pad is wat ‘n uitdaging is nie. Dit is ook die uitdagings op die pad daarheen. Hierdie vaart op die see dien dus twee doelwitte:

• Die dissipels word in die situasie getoets. Sal hulle Hom vertrou, selfs al lyk dit asof die stormwind en die see die oorhand kry? Sal hulle Hom vertrou, al lyk dit asof Hy slaap?
• Die dissipels word blootgestel aan die demonstrasie van Jesus se gesag en God se krag. Dit is immers net wanneer die golwe dreig om die skuit te verswelg wat die les van God se almag sal ingang vind. ‘n Kalm see kan nie vertroue bewerk in ‘n mens se lewe nie.

Jesus gee hiermee aan ons ‘n dubbele boodskap:

• Ons moet bereid wees om Jesus te volg maak nie saak wat die uitdagings op die pad is nie;
• Ons kan staatmaak op Jesus se ingrype wat kalmte sal bring. Die wind en die see gehoorsaam Hom, soos die demone net hierna ook sal doen.

MATTEUS 8:18-22

18 Toe Jesus die skare rondom Hom sien, het Hy opdrag gegee om na die oorkant toe te vertrek.

19 En ’n skrifgeleerde het na Hom gekom en vir Hom gesê: “Leermeester, ek sal u volg waar u ook al gaan.”

20 En Jesus sê vir hom: “Jakkalse het gate en voëls van die lug neste, maar die Seun van die mens het nêrens waar Hy sy kop kan neerlê nie.”

21 En ’n ander een van sy dissipels het vir Hom gesê: “Here, laat my toe om eers terug te gaan en my vader te begrawe.”

22 Maar Jesus sê vir hom: “Volg jy My, en laat die dooies hulle eie dooies begrawe.”

MATTEUS 8:14-17

14 Toe Jesus in Petrus se huis gekom het, het Hy sy skoonmoeder siek aan koors sien lê.

15 Hy het haar hand aangeraak en die koors het haar verlaat, en sy het opgestaan en Hom bedien.

16 Toe dit aand geword het, het hulle vir Hom baie demoonbesetenes gebring, en Hy het die geeste met ’n woord uitgedryf en almal wat siek was gesond gemaak.

17 So is vervul wat deur Jesaja die profeet gesê is: “Hy het ons kwale op Hom geneem, en ons siektes gedra.” (Jes. 53:4)

Ons lees vervolgens die verhaal van die verlamde man in Kapernaum wat deur al drie die Sinoptiese Evangelies vertel word. Elkeen het sy eie beklemtoning, maar die hoofboodskap is dat Jesus die man genees as getuienis dat Hy sonde kan vergewe.

MATTEUS 8:5-13

5 Nadat Hy aangekom het in Kapernaum het ’n centurion (Romeinse leëroffisier wat ‘n groep van honderd soldate onder sy bevel gehad het) Hom genader en Hom gesmeek

6 en gesê: “Here, my slaaf lê verlam by die huis, en hy word verskriklik geteister deur pyn.”

7 En Hy sê vir hom: “Ek sal gaan en hom gesond maak.”

8 Die centurion het geantwoord en gesê: “Here, ek is nie werd dat U onder my dak inkom nie, maar spreek net die woord, en my slaaf sal genees word.

9 Want ék is ook ’n man wat onder gesag staan, en wat soldate onder my het, en ek sê vir hierdie een: ‘Gaan,’ en hy gaan, en vir ’n ander: ‘Kom,’ en hy kom, en vir my slaaf: ‘Doen dit,’ en hy doen dit.”

10 Toe Jesus dit hoor, was Hy verwonderd en Hy het vir dié wat Hom volg, gesê: “Amen, Ek sê vir julle: By niemand in Israel het Ek so ’n groot geloof gevind nie.

11 Ek sê vir julle dat baie van die ooste en weste sal kom en saam met Abraham en Isak en Jakob aanlê vir ete in die koninkryk van die hemele,

12 maar die mense van die koninkryk sal uitgegooi word in die buitenste duisternis. Daar sal ’n gehuil en ’n gekners van tande wees.”

13 Jesus het vir die centurion gesê: “Gaan, soos jy geglo het, sal dit vir jou gebeur.” En sy slaaf is op daardie oomblik genees.

Wonderwerke en woordbediening in Galilea (hfst. 8–9)

Jesus volg die Bergrede op met ‘n aantal wonderwerke – genesings, natuurwonders, bevryding van demone en ‘n opstanding uit die dood – steeds gekoppel aan sy voortgaande woordbediening om sy gesag as Koning en Messias oor alles op aarde te bevestig. Matteus demonstreer in 14 episodes Jesus se impak op alles wat leef en beef:

1. Jesus genees ‘n man met ‘n ernstige velsiekte
2. Jesus genees ‘n centurion se slaaf in Kapernaum
3. Jesus genees Simon se skoonmoeder en maak baie mense gesond
4. Jesus leer dat jy Hom nie kan volg as jy agtertoe bly kyk nie
5. Jesus leer sy dissipels dat Hy mag het oor die natuur
6. Jesus demonstreer sy mag oor demone in Gadara
7. Jesus keer terug na Kapernaum en demonstreer dat Hy mag het oor siekte en dood
8. Jesus roep die tollenaar Levi-Matteus
9. Jesus verkondig dat nuwe wyn nuwe wynsakke nodig het om behoue te kan bly
10. Jesus genees die vrou met bloedvloeiing in Kapernaum
11. Jesus wek die dogtertjie van Jaïrus op
12. Jesus genees twee blindes
13. Jesus genees ‘n stom, demoonbesete man
14. Jesus word diep geraak deur die skares wat soos skape sonder ‘n herder is

MATTEUS 8:1-4

1 Nadat Hy van die berg afgekom het, het groot skares Hom gevolg.

2 En daar het ’n man met ’n ernstige velsiekte nadergekom en voor Hom neergeval en gesê: “Here, as U wil, kan U my reinig.”

3 En Hy het sy hand uitgesteek, hom aangeraak en gesê: “Ek wil, word gereinig.” En dadelik is sy ernstige velsiekte gereinig.

4 En Jesus sê vir hom: “Kyk dat jy dit vir niemand vertel nie, maar gaan wys jouself vir die priester en bring as getuienis vir hulle die gawe wat Moses voorgeskryf het.”