Jesus leer dat jy Hom nie kan volg as jy agtertoe bly kyk nie

MATTEUS 8:18-22

18 Toe Jesus die skare rondom Hom sien, het Hy opdrag gegee om na die oorkant toe te vertrek.

19 En ’n skrifgeleerde het na Hom gekom en vir Hom gesê: “Leermeester, ek sal u volg waar u ook al gaan.”

20 En Jesus sê vir hom: “Jakkalse het gate en voëls van die lug neste, maar die Seun van die mens het nêrens waar Hy sy kop kan neerlê nie.”

21 En ’n ander een van sy dissipels het vir Hom gesê: “Here, laat my toe om eers terug te gaan en my vader te begrawe.”

22 Maar Jesus sê vir hom: “Volg jy My, en laat die dooies hulle eie dooies begrawe.”

Teks en konteks

Lukas vertel ook van só ‘n gesprek met iemand wat nie verder geïdentifiseer word nie. Hier is die gespreksgenoot ‘n skrifgeleerde. Matteus plaas die verhaal ook net na die Bergrede wat moontlik beteken dat dit op ‘n ander tyd as in Lukas gebeur het. Hierdie tipe gesprek het waarskynlik gereeld plaasgevind.

8:18 Jesus wil die skare agterlaat om sy bediening ook op ander plekke – hierdie keer in die gebied van Gadara aan die oorkant van die See van Galilea in Dekapolis – voort te sit en gee opdrag dat Hy en die dissipels in ‘n skuit klim.

8:19-20 ‘n Skrifgeleerde wil saamgaan, maar Jesus raai hom aan om die koste te bereken, want jakkalse het gate en voëls neste, maar die Seun van die mens het nie ‘n vaste woonplek nie, veral nie só op reis nie. Sy reaksie word nie vermeld nie.

8:21-22 ‘n Ander een van sy dissipels wil eers familieverpligtinge gaan nakom – sy pa begrawe wat waarskynlik ‘n geruime tyd sou neem – maar Jesus kan nie sy reis onderbreek daarvoor nie, en raai hom aan om liewer saam te kom. Die dooies kan hulle eie dooies begrawe. Sy reaksie word ook nie vermeld nie.

Nuwe navorsing oor begrafnisgebruike in Jesus se tyd wys dat die bene van oorledenes ná ‘n jaar se ontbinding in die graf opgegrawe is en herbegrawe is. Dit kan agter die man se versoek sit dat hy ‘n jaar se navolging wil vryspring. Jesus wys hom daarop dat ander maar na daardie verpligtinge moet omsien. Hy moet sy besluit om Jesus te volg, eer.

Boodskap en betekenis

Sommige neem hierdie uitsprake as hiperbole  en dink dat Jesus net die erns van dissipelskap onderstreep en nie regtig sulke dinge in die praktyk van sy volgelinge sal vra nie. Dit is egter onwaarskynlik.

‘n Mens moet onthou dat elkeen van die Twaalf presies gedoen het wat Jesus hier uitspel. Hulle het hulle huise en families verlaat om volledig in Jesus se diens te staan. Jesus is dus baie konkreet hier met die uitdaging van dissipelskap. Dit kos jou meer as wat jy moontlik dink. Dissipelskap neem jou hele lewe vir die koninkryk in beslag.