Sorg dat die lig in jou nie duisternis is nie

MATTEUS 6:22-23

22 “Die oog is die lamp van die liggaam. As jou oog dan gesond is, sal jou hele liggaam verlig wees,

23 maar as jou oog sleg is, sal jou hele liggaam donker wees. As die lig in jou dan donkerte is, hoe groot is die donkerte nie.”

Teks en konteks

6:22 Jesus bedoel met hierdie idiomatiese uitdrukking dat die oog die mens help om sy pad te vind, soos ‘n lamp dit doen vir die liggaam. Hy gebruik die Griekse woord haplous wat as enkelvoudig (soos in single-minded) of gesond (healthy) vertaal kan word. Dit kan ook as funksioneel vertaal word, d.w.s. ‘n oog wat sy werk reg doen (a sound eye). Daar is dus nie dubbelvisie nie! As jy só ‘n gesonde oog het, sal jy reg kyk en reg waarneem, en sal jou hele lewe verlig wees.

6:23 Maar as jou oog sleg of boos is, sal jou hele lewe in duisternis verval. Jesus gebruik die Griekse word ponēros wat idiomaties verklaar kan word as ‘n “bose oog” (evil eye) in die sin van óf suinigheid, óf jaloesie. Om die waarheid te sê, as dit wat jy as lig beskou eintlik donkerte is, hoe groot is jou donkerte dan nie, sê Jesus.

Boodskap en betekenis

Jesus kontrasteer hier ‘n mens wat die regte dinge raaksien en vrygewig en waarderend is. Dit gun ander ‘n plek in die son. Teenoor ‘n mens wat met ‘n “bose oog” kyk na alles en almal rondom hom en óf in suinigheid óf jaloesie verval, of albei.