Die een wat die wil van my Vader doen, sal ingaan in die koninkryk van die hemele

MATTEUS 7:21-23

21 “Nie elkeen wat vir My ‘Here, Here’ sê, sal ingaan in die koninkryk van die hemele nie, maar die een wat die wil van my Vader in die hemel doen.

22 Baie sal vir My op daardie dag sê: ‘Here, Here, het ons nie in u Naam geprofeteer, en in u Naam demone uitgedryf, en in u Naam baie wonderwerke gedoen nie?’

23 En dan sal Ek aan hulle verklaar: Ek het julle nooit geken nie; gaan weg van My af, julle wat ontrouheid aan die wet beoefen.”

Teks en konteks

7:21 Jesus vervolg met sy lering oor die vals profete. Dit is nie elkeen wat met die mond die regte dinge sê wat deel word van sy koninkryk nie. Dit is die een wat die wil van die Vader doen wat uiteindelik sal ingaan in die koninkryk aan die einde van die tyd.

7:22 Jesus voorspel dat daar baie sal wees wat dink dat die beoefening van geestelike gawes die deurslag sal gee vir hulle toegang tot God se koninkryk. Profesie, duiweluitdrywing en wonderwerke sal jou egter nie daardie toegang verleen nie.

7:23 Jesus waarsku dus teen mense wat dink dat die uiterlike geestelike vrug as sodanig hulle sal red. Hy noem die buitengewone charismatiese gawes van profesie, duiweluitdrywing en wonderwerke. Die toetssteen is getrouheid aan die wet. Dit is nie gawes wat die deurslag gee nie, maar gehoorsaamheid.

Hulle word daarom beskryf as ontrou aan die wet – “wetteloos” (anomia). Hulle sal gevolglik nie welkom wees in die koninkryk van God nie. Want, dit is skynheilig om te sê jy ken die Here Jesus, maar jy doen nie wat Hy vra nie. Dit is skynheilig om te profeteer en vir ander te sê hoe God wil hê dat hulle moet lewe, en dit dan nie self te doen nie. Dit is skynheilig om wonderwerke te doen, maar nie aan die res van God se opdragte aandag te gee nie.

Donald Hagner (Word kommentaar) sê dit so mooi:

“Perhaps no passage in the NT expresses more concisely and more sharply that the essence of discipleship, and hence of participation in the kingdom, is found not in words, nor in religiosity, nor even in the performance of spectacular deeds in the name of Jesus, but only in the manifestation of true righteousness— i.e. the doing of the will of the Father as now interpreted through the teaching of Jesus … The seriousness of the ethical demand upon the disciples does not cancel out the priority or significance of grace manifested in Jesus and the kingdom.”

Boodskap en betekenis

Jesus verklaar onomwonde dat ‘n mens sy vroeëre waarskuwing teen ‘n skynheilige oordeel nie verkeerd moet verstaan nie. Sy waarskuwing teen veroordeling beteken glad nie dat daar geen oordeel of veroordeling van God se kant af is nie. “Daardie dag”, die dag van God se oordeel, is immers aan die kom.

Die hele Skrif is vol van uitsprake wat die stelligheid van die toorn van God en die straf van sy oordeel en veroordeling uitspel (Matt. 12:41 – “die oordeel”; 23:33 – “die oordeel van die hel”; Rom. 1:18 – “die toorn van God word van die hemel af geopenbaar”; Rom. 2:6 – “in die dag wanneer God die verborge dinge van die mense deur Jesus Christus sal oordeel, volgens my evangelie.”)

Jesus het immers die reg van die Vader ontvang om die wêreld te oordeel (Joh. 5:22). In die oordeel sal sommige die opstanding van die lewe ontvang. Ander sal die opstanding van die veroordeling ontvang (Joh. 5:29).

Met daardie oordeel moet ons rekening hou. En dit is nie die vrug van jou lewe, of die gawes wat jy beoefen het wat die deurslag sal gee in daardie dag nie. Dit is die gehoorsaamheid aan die wil van God soos die wet dit uitgespel het en Jesus dit verklaar en toegepas het wat vir jou toegang tot God se koninkryk sal verskaf.