Jesus genees ‘n centurion se slaaf in Kapernaum

Ons lees vervolgens die verhaal van die verlamde man in Kapernaum wat deur al drie die Sinoptiese Evangelies vertel word. Elkeen het sy eie beklemtoning, maar die hoofboodskap is dat Jesus die man genees as getuienis dat Hy sonde kan vergewe.

MATTEUS 8:5-13

5 Nadat Hy aangekom het in Kapernaum het ’n centurion (Romeinse leëroffisier wat ‘n groep van honderd soldate onder sy bevel gehad het) Hom genader en Hom gesmeek

6 en gesê: “Here, my slaaf lê verlam by die huis, en hy word verskriklik geteister deur pyn.”

7 En Hy sê vir hom: “Ek sal gaan en hom gesond maak.”

8 Die centurion het geantwoord en gesê: “Here, ek is nie werd dat U onder my dak inkom nie, maar spreek net die woord, en my slaaf sal genees word.

9 Want ék is ook ’n man wat onder gesag staan, en wat soldate onder my het, en ek sê vir hierdie een: ‘Gaan,’ en hy gaan, en vir ’n ander: ‘Kom,’ en hy kom, en vir my slaaf: ‘Doen dit,’ en hy doen dit.”

10 Toe Jesus dit hoor, was Hy verwonderd en Hy het vir dié wat Hom volg, gesê: “Amen, Ek sê vir julle: By niemand in Israel het Ek so ’n groot geloof gevind nie.

11 Ek sê vir julle dat baie van die ooste en weste sal kom en saam met Abraham en Isak en Jakob aanlê vir ete in die koninkryk van die hemele,

12 maar die mense van die koninkryk sal uitgegooi word in die buitenste duisternis. Daar sal ’n gehuil en ’n gekners van tande wees.”

13 Jesus het vir die centurion gesê: “Gaan, soos jy geglo het, sal dit vir jou gebeur.” En sy slaaf is op daardie oomblik genees.

Teks en konteks

Matteus fokus sterk op die verhale van Jesus se genesings en wonders. Daar is nege genesingsverhale (‘n melaatse, verskillende verlamdes, ‘n koorsige skoonma, verskillende besetenes, ‘n bloeiende vrou, en ‘n ontslape dogter) en een wonderverhaal oor die storm wat stil gemaak word, verweef met die ander verhale wat dissipelskap as tema het.

8:5-6 In Matteus se weergawe van hierdie verhaal kom die centurion self na Jesus. Hy smeek Jesus om sy verlamde slaaf te genees, omdat hy verskriklik geteister word deur pyn. In Lukas se weergawe lê hy op sterwe. Die Griekse woord, pais, wat Matteus hier vir slaaf gebruik, kan ook op seun dui, maar die konteks dui duidelik daarop dat dit ‘n slaaf is, aangesien die centurion in ‘n gesagsverhouding met die slaaf staan.

8:7-9 Jesus willig in om te gaan, maar omdat die Romeinse offisier weet dat ‘n Jood nie aan huis van ‘n heiden mag gaan nie, probeer hy dit vir Jesus makliker maak deur te sê dat hy nie dit werd is dat Jesus na sy huis toe kom nie.  Jesus hoef net ‘n woord te spreek, en hy weet sy slaaf sal gesond word. Hy verduidelik sy geloof aan die hand van sy eie ervaring van gesag. Hy gebied sy soldate en slawe na willekeur en weet Jesus kan dieselfde doen. Trouens, hy verwoord hiermee nie net sy geloof dat Jesus kan genees nie, maar dat sy krag tyd en ruimte te bowe gaan.

8:10 Daardeur illustreer die offisier só ‘n groot geloof dat dit Jesus verwonderd laat. Dit is die enigste keer wat Matteus dit noem. Hy eer die offisier voor dié wat Hom volg daarvoor dat Hy nog nie enigiemand in Israel teëgekom het wat só ‘n groot geloof gehad het nie.

8:11-12 Hierdie voorbeeld van geloofsvertroue sluit vir Jesus ‘n visie oop van ‘n toekoms waarin die orde tussen heidene en Jode omgekeer sal word, en die Jode aan wie die koninkryk van die hemele eintlik behoort, nie daaraan deel sal hê nie, maar wel gelowiges uit die heidendom.

Dit is gelowiges uit die heidene wat aan die feesmaal in die koninkryk van die hemele sal kom aanlê saam met die drie patriarge, Abraham, Isak en Jakob. Die mense aan wie die koninkryk na regte behoort het, sal egter uitgegooi word in die buitenste duisternis. Hulle sal huil en op hulle tande kners, maar weens hulle verwerping van Jesus sal hulle die koninkryk nooit binnegaan nie.

Jesus sal in die gelykenisse van die boere en die wingerd (Matt. 21) en die bruilof (Matt. 22) verder hierop uitbrei.

8:13 Jesus genees dan die slaaf met die boeiende stelling: “soos jy geglo het, sal dit vir jou gebeur.” Laat dit insink!

Boodskap en betekenis

Hierdie centurion se groot geloof is regtig merkwaardig, Hy aanvaar doodgewoon dat Jesus absolute gesag oor lewe en dood, siekte en gesondheid, en tyd en ruimte het. Let op, Hy dwing Jesus nie om sy slaaf te genees nie. Hy demonstreer net sy onwrikbare geloof dat Jesus inderdaad kan genees. Die keuse van wat Jesus gaan doen, bly egter steeds Syne.

Let ook op dat Jesus die genesing eers doen nádat hulle ‘n redelike uitvoerige gesprek gehad het. Dit is nie asof Jesus net outomaties genees nie. Hy gebruik die geleentheid om die centurion se geloof tot volle wasdom te laat kom. Dit is ook, soos met al die ander wondertekens, ‘n getuienis aan die omstanders dat Hy inderdaad God is.