Skip to main content

Jesus verklaar die gelykenis van die saaier

Al drie Sinoptici bevat Jesus se verklaring van die gelykenis van die saaier, maar elkeen beklemtoon ‘n ander aspek. Lukas (8:11-15) fokus op geloof en volharding, Markus (4:13-20) op die stryd teen eksterne en interne druk wat groei belemmer, terwyl Matteus die belangrikheid van begrip onderstreep. Vir Matteus is die beslissende vraag nie net of mense die boodskap hoor nie, maar of hulle dit verstaan en daarom vrug dra. Onthou dat die gelykenis van die saaier daarom ‘n sleutel is om die ander gelykenisse van die koninkryk te verstaan.

MATTEUS 13:18-23

18 “Luister dan na die gelykenis van die saaier.

19 By elkeen wat die boodskap van die koninkryk hoor en dit nie verstaan nie, kom die Bose en roof wat in sy hart gesaai is. Dit is die saad wat op die pad gesaai is.

20 Die saad wat op die rotsagtige grond gesaai is, is die een wat die boodskap hoor en dit dadelik met vreugde aanneem,

21 maar sy wortels gaan nie diep nie, en hy hou nie lank nie, en as daar verdrukking of vervolging vanweë die Woord kom, hou hy dadelik op met glo.

22 En die saad wat tussen die doringplante gesaai is, dit is die een wat die Woord hoor, maar die wêreld se sorge en die verleiding van rykdom versmoor die boodskap en dit dra nie vrug nie.

23 Die saad wat op goeie grond gesaai is, dit is die een wat die boodskap hoor en dit verstaan, en inderdaad ’n oes lewer: die een honderd-, die ander een sestig-, en die ander een dertigvoudig.”

Teks en konteks

13:18 Jesus se verklaring van die gelykenis van die Saaier bevestig die feit dat gelykenisse veelvlakkig is. Dit sien ons alreeds in die feit dat Hy kommentaar lewer op elke element van die gelykenis, veral hoekom die grond op spesifieke maniere op die saad reageer.

Dit is ook duidelik dat sy uitleg van die gelykenis van die Saaier ‘n boodskap is van Hom waarna geluister moet word om op die regte manier op sy boodskap te reageer. Onthou dat hierdie gelykenis aansluit by die boodskap van die profeet Jesaja (Matt. 13:10-17).

13:19 Die rede waarom die saad nie vrug dra by mense wat soos vasgetrapte grond (pad) is nie, is in Matteus se weergawe nie ongeloof soos die geval by Lukas nie, maar onbegrip. Hulle verstaan nie wat die boodskap beteken nie, doen nie moeite om tot begrip te kom nie, en laat so die Bose toe om die boodskap in hulle lewens uit te doof. Dit wys net hoe belangrik geloof (Lukas) en begrip (Matteus) is, iets wat ons in gedagte moet hou nie net in ons eie luister na die boodskap nie, maar ook waar ons die evangelie met ander deel. Die vasgetrapte grond is dus mense wat nie vatbaar is vir die evangelie nie.

13:20-21 Die rede waarom die saad nie vrug dra by mense wat soos rotsagtige grond is nie – al luister hulle aanvanklik met vreugde na die boodskap – is dat hulle nie rekening hou met die verdrukking of vervolging wat vanweë hulle geloof in die Woord kom nie. Teenstand en teëspoed laat hulle struikel in hulle geloof. Dit is mooiweermense.

13:22 Die rede waarom die saad nie vrug dra by mense wat soos doringagtige grond is, is dat hierdie mense die Woord hoor, maar toelaat dat die sorge en bekommernis van hierdie wêreld en die verleiding van rykdom die boodskap daarvan versmoor. Dit is mense wat vra, wat is daarin vir my? En as gehoorsaamheid ‘n prys van hulle vra, knak hulle onder die uitdaging om te volhard.   Die wêreldse sorge en die sug na welvaart verstik die Woord. Dit is gierige mense.

13:23 Die rede waarom die saad wel vrug dra by mense wat soos goeie grond is, is omdat hulle die boodskap hoor en begryp en daarom vrug dra. Dit is gehoorsame mense. Hulle lewer ‘n oorvloedige oes vir die koninkryk.

Boodskap en betekenis

Weereens moet ons in gedagte hou dat die saad altyd goed is. Dit kom van die Saaier wat kragtig deur daardie saad, God se Woord, die boodskap van die evangelie van Jesus Christus, in ons lewens werk. In enige uitleg van hierdie gelykenis, trouens al die gelykenisse, is dit die vertrekpunt.

Ons het egter ‘n dure verpligting om te sorg dat ons nie net begryp wat ons hoor nie, maar inderdaad daarop reageer en dit uitvoer. Dit is hoe ons lewens vrug dra.

Waarvoor ons versigtig moet wees, is eerstens ongeloof en onbegrip. Dit kan net deur diepgaande volhardende luister na die Woord verseker word.

Ons moet ook tweedens versigtig wees vir ons reaksie op verdrukking of vervolging. Dit kan ons so maklik in ons geloof en gehoorsaamheid laat struikel. Die gevolge van ingee en boedel oorgee, is “too ghastly to contemplate”.

Ons moet derdens ook versigtig wees dat óf ons gebreke in die lewe (sorge), óf ons gierigheid na meer (die verleiding van die rykdom) die impak van die boodskap in ons lewe versmoor.

Dit is waarom ‘n gemeenskap van gelowiges wat mekaar help en ondersteun só belangrik is vir ons persoonlike volharding. Ons het mekaar nodig!

‘n Nuwe insig vir my is dat die gelykenis ook vir ons ‘n ander manier gee om vir mense te bid.

Dié gelykenis help ons om te bid vir dié wat die woord van God hoor:

  • dat die duiwel die woord nie sal wegpik uit hulle lewens nie;
  • dat versoekings en vervolgings hulle nie moedeloos maak nie;
  • dat sorge, gierigheid en genot hulle nie verstrik nie.

En dan te bid dat die Heilige Gees die grond in hulle harte sal bly bewerk sodat die woord van God uiteindelik vrug sal dra.

View all posts in this series

Discover more from Bybelskool

Subscribe to get the latest posts sent to your email.

Matteus-leesplan


Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Maak 'n opmerking

Your email address will not be published. Required fields are marked *

Onlangse kommentaar