Skip to main content

Jesus genees die vrou met bloedvloeiing in Kapernaum

Daar is redelik baie verskille tussen Matteus se verhaal van Jesus se genesing van die vrou met bloedvloeiing in Kapernaum en dié van Lukas (8:40-48) en Markus (5:21-34).

  • Matteus plaas hierdie verhaal direk ná ‘n gesprek met die dissipels van Johannes die Doper oor nuwe wyn in nuwe sakke terwyl Lukas en Markus dit ná die sending in die gebied van die Geraseners plaas.
  • Die leier word nie hier in Matteus geïdentifiseer nie. Lukas en Markus identifiseer die leier as een van die sinagogehoofde, Jaïrus, maar dit kan natuurlik ook iemand anders in ‘n soortgelyke verhaal wees, soos ek hieronder sal verduidelik.
  • Die leier toon ook geen weifeling in sy geloof – soos ‘n mens wel uit Markus se weergawe kan aflei waar Jesus hom bemoedig om aan te hou glo.
  • Daar is geen skare as die vrou naderkom nie. Jesus sien dus onmiddellik die vrou raak as sy die soom van sy bo-kleed aanraak en die vrou word ook eers genees ná Jesus se gesprek met haar.
  • Haar bloedvloeiing (haimorroousa) word ook anders beskryf as in Lukas en Markus (rhusei haimatos – dit dui op menstruasie: “bloedvloeiing”). Haar probleem hoef in hierdie verhaal nie noodwendig ‘n menstruasie probleem te wees nie. Dit kan een of ander “inwendige bloeding” of ‘n ander bloedsiekte ook wees. Wat kan beteken dat Matteus ‘n eie verhaal vertel, en nie maar net dieselfde verhaal as Lukas en Markus nie.

Sommige geleerdes verklaar die verskille as ‘n radikale “teleskopiese” verkorting van die twee inmekaargeweefde verhale. Jaïrus se tweede versoek om haar uit die dood uit op te wek volgens Lukas en Markus word een verhaal in Matteus met die fokus op die laaste versoek. Dieselfde geld die verhaal van die vrou. Matteus verwyder met sy vertelling enige sweem van ‘n magiese interpretasie in haar genesing deur dit te vertel asof dit eers ná Jesus se gesprek met haar gebeur. Só argumenteer geleerdes om die drie Evangelies hieroor te harmonieer.

Laasgenoemde interpretasie gaan egter nie af nie, want Matteus self (Matt. 14:36) en Markus (Mrk. 6:56) praat albei van nog sulke gevalle waar net die aanraking van die klere van Jesus – met sy toestemming – tot genesing gelei het. Dit is iets wat ook in die vroeë kerk gebeur het, soos Lukas ons vertel van Paulus se klere wat tot genesing gely het – selfs doeke of voorskote. Soos Lukas sê, God het deur Paulus wonderbaarlike dinge gedoen (Hand. 19:12). Aanraking is nie per se ‘n bewys van ‘n magiese geloof nie!

Trouens, mense het soms net aan Jesus self geraak en genesing ervaar (Mrk. 3:10; Luk. 6:19), soos dit ook gebeur het as Hy aan mense raak (Matt. 8:3; 9:29). In Jesus se teenwoordigheid was daar ‘n genesende krag beskikbaar, maak nie saak hoe die proses gewerk het nie. Die lewe in Hom het die siekte en dood uitgedryf.

Ek dink daarom dat Matteus ‘n eie verhaal vertel wat sterk ooreenkomste met dié van Lukas en Markus vertoon, maar tog ‘n eie verhaal is. Dit is vir seker die geval met die verhaal van die genesing van die twee blindes wat net hierna in Matteus 9:27-41 vertel word dat dit ‘n eie verhaal is. Dit het ooreenkomste met die verhaal in Markus (Mrk. 10:46-52; vgl. Matt. 20:29-34), maar is tog ‘n unieke verhaal.

Miskien geld dieselfde hier.

MATTEUS 9:18-22

18 Terwyl Hy besig was om hierdie dinge vir hulle te sê, het daar ’n leier gekom en voor Hom neergeval en gesê: “My dogter het nou net gesterf, maar kom en sit u hand op haar, en sy sal lewe.”

19 En Jesus het opgestaan en hom gevolg saam met sy dissipels.

20 En daar het ’n vrou wat twaalf jaar lank gebloei het van agter af nadergekom en die soom van sy bo-kleed aangeraak,

21 want sy het by haarself gesê: “As ek net sy bo-kleed kan aanraak, sal ek genees word.”

22 En Jesus het omgedraai en haar gesien en gesê: “Skep moed, dogter; jou geloof het jou genees.” En die vrou was van daardie oomblik af genees.

Teks en konteks

9:18 Terwyl Jesus besig was om hierdie dinge vir hulle te sê, kom daar ‘n leier – Matteus noem nie sy naam nie – en val in aanbidding voor Hom neer. Sy dogter het so pas gesterf en hy wou hê Jesus moet haar uit die dood uit opwek. Hy glo dus dat Jesus soos ‘n Elia (1 Kon. 17) en Elisa (2 Kon. 4) van ouds sy dogter uit die dood kan opwek – ‘n ware diep vasgryp aan Jesus se Goddelike vermoë. Hy is oortuig Jesus kan haar opwek. “Sy sal lewe.”

9:19 Jesus staan op van sy gesprek met die dissipels van Johannes die Doper en gaan onmiddellik saam met die man in die geselskap van sy dissipels.

9:20-21 ‘n Vrou kom van agter – let op dat daar nie ‘n skare is nie – en raak aan die soom (kraspedon) van Jesus se kleed, omdat sy geglo het dat sy dan van haar twaalf jaar lange lyding aan een of ander bloedsiekte genees sal word.

9:22 Jesus het omgedraai en haar ook soos in die ander Evangelies as “dogter” (thugatēr) aangespreek, ‘n aanspreekvorm van toegeneentheid. In Engels kan ‘n mens die Griekse woord vertaal as “dear (woman / daughter)”. Interessant dat Hy vir haar aanmoedig om moed te skep – iets wat telkens in die OT vir leiers gesê is wat voor ‘n groot uitdaging gestaan het (Jos 1:6), en ook in die liturgie ‘n plek gevind het (Ps 27:14).

Soos in Markus beklemtoon Matteus die rol van haar geloof in die genesing, want van daardie oomblik af was sy genees. Hy praat egter nie soos die ander twee, Lukas en Markus, oor redding nie.

Boodskap en betekenis

Geloof speel dikwels ’n groot rol in wondergenesings. Soms is dit die geloof van die sieke wat genees word, soos hier met die vrou. Soms is dit die geloof van ‘n pa, soos in die volgende perikoop gesien sal word. Soms is dit die geloof van vriende (Luk. 5) en soms is dit die gelowige gebed van ouderlinge: “As hulle gelowig bid, sal dit vir die sieke genesing bring.” (Jak 5:15)

Maar, en dit is belangrik, daar is geen bloudruk in die NT van ’n “perfekte geloof” wat die minimum standaard sou haal sodat Jesus dan daarop reageer deur ’n wonderwerk te doen nie!  Nie in die geloof van dié wat siek is nie.  Ook nie in die geloof van dié wat bid nie.

Daar is dus geen sprake van ’n perfekte geloof by die ontvangers van God se genade nie. Net maar ’n fokus op Jesus, dat Hy Hom op een of ander manier oor hulle sal ontferm. En Jesus ontferm Hom oor hierdie vrou en genees haar. Soos ons later sal sien dat dieselfde in die pa se geval gebeur.

Die verhale wil dus jou geloof bou in ‘n Jesus wat wonders kan doen. Skep moed en vertrou die Here in jou eie uitdagings rondom siekte en die dood.

View all posts in this series

Discover more from Bybelskool

Subscribe to get the latest posts sent to your email.

Matteus-leesplan


Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Maak 'n opmerking

Your email address will not be published. Required fields are marked *

Onlangse kommentaar