Jesus genees ‘n man met ‘n ernstige velsiekte

Wonderwerke en woordbediening in Galilea (hfst. 8–9)

Jesus volg die Bergrede op met ‘n aantal wonderwerke – genesings, natuurwonders, bevryding van demone en ‘n opstanding uit die dood – steeds gekoppel aan sy voortgaande woordbediening om sy gesag as Koning en Messias oor alles op aarde te bevestig. Matteus demonstreer in 14 episodes Jesus se impak op alles wat leef en beef:

1. Jesus genees ‘n man met ‘n ernstige velsiekte
2. Jesus genees ‘n centurion se slaaf in Kapernaum
3. Jesus genees Simon se skoonmoeder en maak baie mense gesond
4. Jesus leer dat jy Hom nie kan volg as jy agtertoe bly kyk nie
5. Jesus leer sy dissipels dat Hy mag het oor die natuur
6. Jesus demonstreer sy mag oor demone in Gadara
7. Jesus keer terug na Kapernaum en demonstreer dat Hy mag het oor siekte en dood
8. Jesus roep die tollenaar Levi-Matteus
9. Jesus verkondig dat nuwe wyn nuwe wynsakke nodig het om behoue te kan bly
10. Jesus genees die vrou met bloedvloeiing in Kapernaum
11. Jesus wek die dogtertjie van Jaïrus op
12. Jesus genees twee blindes
13. Jesus genees ‘n stom, demoonbesete man
14. Jesus word diep geraak deur die skares wat soos skape sonder ‘n herder is

MATTEUS 8:1-4

1 Nadat Hy van die berg afgekom het, het groot skares Hom gevolg.

2 En daar het ’n man met ’n ernstige velsiekte nadergekom en voor Hom neergeval en gesê: “Here, as U wil, kan U my reinig.”

3 En Hy het sy hand uitgesteek, hom aangeraak en gesê: “Ek wil, word gereinig.” En dadelik is sy ernstige velsiekte gereinig.

4 En Jesus sê vir hom: “Kyk dat jy dit vir niemand vertel nie, maar gaan wys jouself vir die priester en bring as getuienis vir hulle die gawe wat Moses voorgeskryf het.”

Teks en konteks

8:1 Matteus vertel hierdie verhaal in die konteks van die Bergrede. Met sy verdere reis het groot skare Jesus gevolg.

8:2 ‘n Man met ‘n ernstige velsiekte het nadergekom, voor Hom neergeval en gevra dat Jesus – let op dat hy Jesus Here noem – hom sal reinig: “as U wil.”

Onthou dat hierdie ernstige velsiekte een van ‘n reeks siektes kon wees, en dat die man nie in die eerste plek vra vir genesing nie, maar vir die herstel van gemeenskap. Hy kon nie in die tempel kom om die Here saam met die gemeente te aanbid nie. Hy kon nie eers by sy huismense bly nie. Hy is uitgewerp tot op die rand van die samelewing, waar hy sonder die gemeenskap van ander mense, behalwe mense soos hy, moes sien en kom klaar. Hy het een van die onsigbares, die onaansienlikes, die onaanraakbares, die “untouchables” geword.

8:3 Dit is waarom die eerste ding wat Jesus doen, is om sy hand uit te steek en aan die man te vat. Vóórdat die man nog genees is, sluit Jesus hom dus met velsiekte en al in die gemeenskap met Hom in. En Jesus reinig hom van sy ernstige velsiekte.

8:4 Jesus verbied hom om met ander oor sy genesing te gesels, en eerder homself vir die priester te gaan wys en die (offer)gawe te bring soos Moses beveel het as ‘n getuienis aan hulle.

Betekenis en boodskap

Ons moet raaksien dat Jesus omgee en genees, dat Hy insluit en reinig. Hy wil hê dat ons dieselfde sal doen. Dit is ons roeping as kerk: om mense in te nooi en in ons kring te verwelkom. Om saam met hulle vir God se aanraking van genesing en reiniging te bid.

Dit gebeur natuurlik nie outomaties nie. Jan Johnson sê hieroor dat ons nodig het om ons doelbewus in te stel om mense te help, téén ons natuurlike grein in: “Since compassion doesn’t stream from most of us as naturally as it did from Jesus, we need regular spiritual practices to learn how to have compassion and show compassion.”