Job 28 – Om die Here te dien, is wysheid; om die kwaad te vermy, is insig

Job 28 vorm ‘n duidelike eenheid van gedagtegang, maar word nie direk in die teks self aan Job self gekoppel nie.  Baie geleerdes beskou dit daarom as ‘n onafhanklike bydrae oor die wysheid wat eintlik die antwoord van God in hfst. 38-42 vooruitloop.  Soos dit egter in die kanoniese vorm van Job ingevoeg is, vorm dit ‘n belangrike deel van sy bepeinsing van wat met hom gebeur, nie net as ‘n reaksie teenoor sy drie vriende nie, maar ook as ‘n verantwoording van wat hy glo.  Die wysheid is net by God te vinde.  Dit leer selfs Job se ongelukkige ervaring van verlies hom.

Die tema van hierdie besondere bepeinsing van Job word in vers 12 en 20 gevind: “Maar die wysheid, waar word dié gevind (vers 20: waar kom dit vandaan), waar is die woonplek van die insig?”  Die antwoord is dat dit nie in die kennis en vaardighede van die mynbou – een van die grootste tegnologiese vooruitgange van dié tyd – gevind word nie (28:1-11).  Wysheid is nie ‘n optelsom wat gemaak word aan die hand van alles wat jy weet of kan doen nie.

Die wysheid word ook nie in die wonder van die natuur of ekonomiese voorspoed gevind nie (28:12-19).  Wysheid is nie iets wat jy kan verkry deur wetenskaplike studie of deur die verwerwing van rykdom nie.  Wysheid is net by God en in die ontsag en eerbied vir Hom te vinde. Dit sluit egter nie net jou hart en gesindheid in nie, maar ook om tegelykertyd die moreel-etiese keuse te maak en uit te voer om die kwaad te vermy (28:20-28).  Wysheid betrek jou hart en verstand in jou verhouding met en afhanklikheid van God.

Tegnologiese vooruitgang bring nie wysheid nie – 28:1-11

Job begin met die beskrywing van een van die grootste tegnologiese vooruitgange van dié tyd, die kennis en vaardighede wat in die mynbou geïllustreer word.  Die metale wat in die mynbedrywighede genoem word, is silwer, goud, yster en koper.  Die proses sluit nie net die sorgvuldige soektog daarna diep onder die aarde nie, maar ook die afsluiting van onderaardse riviere, die voorsiening van steierwerk en kabels waarmee die ondergrondse werk gedoen kan word, en die uiteindelike smelterye waar die verwerking van die metale gedoen word in.

Job wys in die volgende deel egter dat wysheid nie ‘n optelsom is wat gemaak word aan die hand van alles wat jy weet of kan doen nie.  Al kan jy ook hóé goed vooruitgang maak om jou kennis en vaardighede te vermeerder.  Dit beteken nie noodwendig dat jy wysheid sal bekom nie.

Wetenskap en ekonomiese voorspoed bring nie wysheid nie – 28:12-19

Job oorweeg die pogings van die lewendes om kennis in te samel in terme van wat op die wêreld (aarde, diep waters en die see) ondersoek kan word – kom ons noem dit die wetenskap van die tyd – maar vind dat dit steeds kortkom.

Hy oorweeg ook die ekonomiese voorspoed wat moontlik is uit allerlei edelmetale en edelgesteentes, maar vind ook dat dit steeds kortkom.

• Ofir was bekend vir sy goudmyne en waarskynlik in suid-wes Arabië (of Somalië) geleë.
• Die materiale wat as belangrike aanduidings van ekonomiese voorspoed genoem word, is edelmetale (goud en silwer), duur edelgesteentes (oniks [wit/swart], saffier [blou] en topaas [groen]), duur natuurlike produkte (koraal [rooi], kristal, pêrels), en duur vervaardigde produkte (fyn goud, suiwer goud en glas).
• Die materiale verteenwoordig ook ‘n hele kaleidoskoop van kleure wat besondere luuksheid simboliseer – geel, wit, swart, blou, rooi, groen ensomeer.

Wysheid is regtig die kosbaarste besitting, belangriker as enigiets anders (vgl. Spr. 3:14-15; 8:10-11).  Maar, dit kan nie uitgedink word nie.  Dit kan nie gekoop word nie. Dit is iets wat net in ‘n verhouding met God gegee word.

Om die Here te dien, is wysheid; om die kwaad te vermy, is insig – 28:20-28

Job gooi sy oog na drie ruimtes van die natuur: die lug, die onderwêreld, en die aarde.  Die wysheid is egter nie daar te vind nie.  Wysheid is net in God te vinde.  Dit sien ‘n mens alreeds in die wyse waarop Hy die skepping tot stand gebring het, met sorgvuldige reëls, mates, bepalings, en beginsels wat goed deurdink is.

Om dié wysheid te bekom, is dus net moontlik in ‘n verhouding met God.  En dit begin by die ontsag en eerbied vir Hom (Spr. 1:7). Hierdie ontsag sluit egter nie net die gesindheid van jou hart teenoor God in nie, jou diepste binnekant, maar ook jou besluit om tegelykertyd moreel-etiese keuse te maak wat volgens God se wil is.  Só kan jy doelbewus die kwaad vermy, letterlik “wegdraai” van die kwaad.

Wysheid betrek dus jou hart en verstand in jou verhouding met en afhanklikheid van God.