Skip to main content

1 Kronieke 28-29 – Dawid motiveer en mentor Salomo vir sy roeping om die tempel te bou

Aan die einde van die eerste boekrol waarop 1 Kronieke geskryf is, word Dawid se laaste opdragte oor die bou van die tempel en Salomo se koningskap weergegee.  Dit is in die vorm van:

  1. Dawid se oorleg met al die gesagdraers van die hele Israel (28:1),
  2. twee toesprake aan die leiers (28:2-8; 29:1-9) en twee gesprekke met Salomo (28:9-10; 28:20-21),
  3. die voorsiening van ’n model van die tempel aan Salomo (28:11-19) en
  4. ’n lofprysing aan die Here in die teenwoordigheid van die hele vergadering van leiers (29:10-20).

Die Kronis sluit die verhaal van Dawid en die tempel af met ’n beskrywing van die volk se feesvieringe en ’n eed van getrouheid aan Salomo (29:21-25) sowel as ’n laaste oorsig oor die koningskap van Dawid (29:26-30).

Dawid kry al die gesagdraers van Israel betrokke

Dawid werk met baie oorleg en kry alle gesagsdraers by mekaar om hulle aan God te verbind sowel as aan Salomo vir die groot onderneming om die tempel te bou.  Dit staan uit as een van die sleutel eienskappe van sy leierskap dat Dawid baie wyd konsulteer om mense, veral leiers, betrokke en ingekoop te kry.  Dit sluit almal wat in die vorige hoofstukke gelys is en gesag gehad het oor die stamme, oor die afdelings in diens van die koning, die leiers oor duisend, die leiers oor honderd, die opsigters van sy besittings en vee, sy seuns, die hoofbeamptes, die oorlogshelde, ja, “al die manne van betekenis”.

In sy eerste toespraak aan die leiers beklemtoon hy in die eerste plek die rol wat God in elke detail van sy eie lewe en in die besluite rondom die tempel en die koningskap gespeel het.  God het Salomo nie net as koning gekies nie, maar ook om die tempel te bou.  Dawid was ongeskik vir dié rol omdat hy gebruik is om die koninkryk te vestig en baie bloed in die proses vergiet het.

Let op hoe Dawid God se keuse vir Salomo sterk stel en tog nog aan Salomo se gehoorsaamheid sowel as die gehoorsaamheid van die volk verbind in die tweede plek.  Daarom roep hy almal op: “Daarom gebied ek, Dawid, julle nou in teenwoordigheid van die hele Israel, die gemeente van die Here en ten aanhore van ons God” om die gebooie van die Here – die bekende opgetekende wil van God in die gesagvolle boeke van die Bybel van daardie tyd – te onderhou en ondersoek.  Dit sal ’n langtermyn effek op hulle verbintenis aan God hê en aan die land waar Hy hulle laat woon het.

In die tweede toespraak beklemtoon Dawid sy eie bereidheid om Salomo te ondersteun met die oorvloed van materiaal wat hy “met alles in my vermoë” vir die huis van God in gereedheid gebring het.  Daarmee motiveer Dawid die volk op deurslaggewende manier met sy voorbeeld om die bouwerk te ondersteun en dit lei tot ‘n groot betrokkenheid van almal: “Die volk was bly oor hulle gewilligheid, want hulle het die vrywillige gawes aan die Here met hulle hele hart gegee. Koning Dawid was ook baie bly.”  Let op dat selfs die amptenare in diens van die koning bygedra het.

Dawid motiveer en mentor vir Salomo

In sy twee toesprake aan Salomo fokus Dawid op twee sake: die motivering en mentoring van Salomo.

Die eerste toespraak (28:9-10) gee ’n sinopsis van wat belangrik is in enige verhouding met die Here.  Die dinge waarop Salomo moet fokus, is:

  • om die Here te ken,
  • die Here met sy hele hart te dien en met ’n gewillige gemoed (siel)  – ’n mens hoor die Here Jesus se opsomming van die wet hier weerklink,
  • deur na Hom te vra en Hom te raadpleeg (met die voorbeeld van Dawid as rigsnoer),
  • deur te besef dat die Here hom gekies het om die heiligdom te bou (God se roeping vir Salomo),
  • en nou prakties te doen wat God sê: “Pak nou die werk aan en doen dit!”

Dawid motiveer Salomo egter nie net met ’n herinnering aan die in standhou van sy verhouding met God en sy roeping nie.  Hy mentor Salomo ook deur aan hom ’n argitektoniese model te gee van die tempel sowel as ’n skriftelike kosteberekening vir die bou daarvan.  Let op hoe twee kante in die totstandkoming van Dawid se visie vir die tempel beskryf word:

  • Dawid se verbeelding (“Dit is ’n model van alles wat hy hom voorgestel het” – 28:12) en
  • God se openbaring (“Dit alles, die hele uitvoering van die werk, het Dawid deur ’n openbaring van God te wete gekom” – 28:19).

Dit is ’n uitstekende illustrasie van hoe God se werk en ons werk saamwerk.

In die tweede toespraak van Dawid aan sy seun fokus hy weer op motivering, maar dié keer meer op wat God vir Salomo sal gee, sowel as op wat die volk se verbintenis is: “Wees sterk, staan vas, begin die werk! Moenie bang wees nie en moenie besorg wees nie, want God die Here, my God, is by jou. Hy sal jou nie aan jouself oorlaat of jou verlaat nie, sodat jy al die werk vir die diens in sy huis kan afhandel. Die afdelings priesters en Leviete is gereed vir die volledige tempeldiens, en daar is vakmanne tot jou beskikking wat bedrewe is in al die soorte werk vir elke diens, terwyl die amptenare en die hele volk op jou bevele wag.”

Dawid se lofprysing aan die Here

Dawid praat egter nie net met die leiers en met Salomo nie.  Hy praat ook met God in hulle almal se teenwoordigheid. Sy gebed van lof en dank aan God sentreer om die frase: “Alles kom tog van U af en ons gee aan U wat ons van U gekry het.” (29:14).

Let op hoe belangrik Dawid die hart van die mens reken in dié gebed.  Dit is die een ding wat hy van God vra, dat God wat die harte vir opregtheid ondersoek, vir altyd hierdie gesindheid van vrygewige opregtheid in die gemoed van die volk sal behou: “Rig hulle hart op U” (29:18).

Daarna begelei Dawid die volle vergadering ook in lofprysing en almal het gekniel in huldebetoon voor die Here.  Die volgende dag het hulle offers gebring en met uitbundige vreugde geëet voor die Here.  Hulle het vir die tweede keer vir Salomo as koning verklaar en aan hom trou gesweer.  ’n Ware luisterryke geleentheid.

Die Kronis sluit af met ’n oorsig oor Dawid se “vol lewe, ryk en geëerd.”

by Chris van Wyk

View all posts in this series

Kronieke


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Maak 'n opmerking

Onlangse kommentaar

  • Chris van Wyk on 2 SAMUEL 11:1-15Die Skrif is duidelik daaroor dat God nie sonde kan doen nie. Hy keur ook nie sonde ooit goed nie. Hy laat boonop geen sonde ongestraf nie (Eks 34). Dit is in dié lig wat 'n mens die profesie moet verstaan. God laat Dawid aan die gevolge van sy eie sondes oor, dit is dat Absalom onder andere in opst…
  • PHILIPPUS C FOURIE on 2 SAMUEL 11:1-152 Samuel 12 vers 11 waar God aan Dawid sê dat Hy sy vroue aan sy naaste sal gee om by te slaap en dit sal geskied in daglig sodat almal dit sal sien. Ek was deur my naaste hieroor gekonfronteer met die argument: Hoe kan God dit self toelaat en laat gebeur as Hyself hier owerspel toelaat? Dit is mos…
  • Chris van Wyk on Amos 9:1-10Waardeer.
  • Klazina Jacobs on Amos 9:1-10Dankie. Baie insiggewend!
  • Chris van Wyk on Jona 1:1-16Dankie Kobus, ek sien uit na module 4 waar ons saam dieper in die NT gaan delf!
  • Kobus De Wet on Jona 1:1-16More Dr Chris, vanmore is ek weer in verwondering oor die Woord van God na ek u stuk gelees het oor Jon 1:1-16. Ek het altyd in terme van Jona en die vis Jona gelees, uit my sondagskool perpektief, nou ontdek ek die diepte in Jona: die chiastiese rangskikking, God se name en natuurlik die Radam - di…
  • Chris van Wyk on Matteus 17 – Jesus word verheerlik as teken van sy Goddelike weseDankie Monique, dit is my voorreg!
  • Monique Steyn on Matteus 17 – Jesus word verheerlik as teken van sy Goddelike weseDie Bybelskool help my so vreeslik Baie, Om die Bybel en die Woord van Jesus better te verstaan. Ek Wil net Soo Baie dankie se. Wees geseend.
  • Chris van Wyk on 2 Kronieke 1Hi Ayden, verhale uit die OT is voorbeelde wat ons help om te verstaan hoe God in ander se lewens gewerk het - in dié geval Salomo - sodat ons kan kyk of daar raakpunte met ons eie lewe is, en ons die boodskap aan die mense van daardie tyd, ook op onsself van toepassing kan maak. Jy kan die boodskap…
  • Ayden Corbett on 2 Kronieke 1Ekt gebid en gevra dat die Here vir my n vers uit die bybel moet kies en my sal help verstaan wat ek lees en toe maak ek oop op 2 krinieke 1...dra die stukkie n spesifieke betekenis of boodskap buitens dat jy wysheid moet kies om die Here se volk te regeer inplaas daarvan om vir rykdom en n lang Lew…
  • Chris van Wyk on Kolossense 2:6-23 – In Christus Jesus is ons met die volheid van God vervulHi Eugene, alles moet getoets word aan die geskrewe Woord van God. As sy iets sien of sê wat daarmee in stryd is, is dit verkeerd. En as jy dit uitwys, is dit nie 'n sonde teen die Heilige Gees nie.
  • Chris van Wyk on 1 Konings 11:1-43;  2 Kronieke 9:29-31Jesus wys in Matteus 12 en Lukas 11 uit dat sy eie wysheid dié van Salomo oortref. Die koningin van Skeba sal dus in die oordeel opstaan en die geslag van Jesus oordeel, omdat sy op Salomo se wysheid gereageer het, en die Jode nie dieselfde gedoen het met Jesus nie (Matt 12:42; Luk 11:31). Die boods…
  • Chris van Zyl on 1 Konings 11:1-43;  2 Kronieke 9:29-31Chris, sê asseblief iets meer oor die laaste sin van vandag se bydrae. Groete
  • Eugene Beetge on Kolossense 2:6-23 – In Christus Jesus is ons met die volheid van God vervulGoeie dag kan u dalk verduidelik as die vroue predekant helder ligte en engele sien of engele wat tekens doen. Hoe moet n mens as Christen dit verwerk of interpreteer sonder om te laster teen die Heilige gees . U inset word opreg wardeer.
  • Chris van Wyk on Openbaring 19:1-10 – Gelukkig is hulle wat uitgenooi is na die bruilofsfees van die LamHi, dit is beelde wat gebruik word om dieselfde werklikheid uit te druk. In vers 7 word die kerk as 'n bruid uitgebeeld om die intieme verhouding tussen God en sy mense uit te druk. Die bruid is enkelvoud, maar die mense wat deel daarvan is natuurlik meervoud. Maar, dit is nie 'n probleem nie, want…