Markus 10:46-11:25 – ‘n huis van gebed vir die nasies
Markus
Jesus se reis na Jerusalem neem Hom deur Jerigo waar Hy die blinde bedelaar, Bartimeus genees. Dit tref my met hoeveel oorgawe Bartimeus na Jesus roep, hoe hy Hom as die Seun van Dawid, die Messias, eien, en nie afgesit word deur die mense wat hom wil stilmaak nie. “Hou moed!” is die skare, wat nou saam met Jesus reis, heel moontlik op pad na die Paasfees, se raad toe Jesus van hom begin notisie neem, en Jesus sluit dan ook aan by die man se vertroue (Jes 35:5; 42:7) in Hom: “Jou geloof het jou gered.”
Let op hoe Jesus hierdie versoek van die blinde man toestaan, terwyl Hy nie Johannes en Jakobus se versoek toestaan om op die trone langs Jesus in die oordeelsdag te sit nie. Die man se versoek is gebaseer op die Messiaanse belofte van Jesaja, terwyl die twee dissipels se versoek gebaseer is op hulle eie behoefte aan status en voorrang in die koninkryk. Die motivering en grond vir hulle versoek verskil dus radikaal en bepaal die uitkoms daarvan. Jesus gee die een en weier die ander.
Dit tref my ook hoe Bartimeus onmiddellik ‘n volgeling van Jesus word. Daarby het hierdie laaste wonder van Jesus, wat Markus vertel, simboliese betekenis: Jesus het gekom om die volk van hulle blindheid te verlos – Hy illustreer dit met die genesing van Bartimeus – maar soos ons sal sien, weier hulle om tot insig te kom.
Met die Intog in Jerusalem val dit my op hoe Jesus ‘n donkie opkommandeer, met die belofte om dit terug te stuur. Met die begeleidende lofprysing van die skare, onder andere uit Psalm 118, kom Jesus Jerusalem binne en gaan eerste van alles na die tempel toe waar Hy alles daar bekyk. Dit laat ‘n mens in afwagting vir die tempelreiniging wat gaan kom.
Die verhaal van die tempelreiniging is ingebed in die vreemde storie van die vyeboom (interessant, Betfage beteken letterlik “huis van vye”) wat Jesus vervloek omdat dit nie vrugte dra nie, al is dit nie vyetyd nie. Die vervloeking vind plaas net voor die tempelreiniging en die uitwerking daarvan word daarna sigbaar.
Ter agtergrond – vyebome dra twee keer ‘n jaar vrugte, in die herfs en in die lente, en moes in hierdie tyd (vroeë lente) eintlik klein voorvye saam met die blare gedra het. Die afwesigheid van voorvye tussen die blare was ‘n teken dat die boom nie dié seisoen vye sou dra nie. Lees Miga 7:1 wat op soortgelyke wyse van hierdie verwagting van voorvye praat.
Jesus verklaar sy reiniging van die tempel met ‘n beroep daarop dat God se huis nie ‘n rowersnes (Jer 7:11) mag wees nie, maar ‘n huis van gebed vir die nasies (Jes 56:7 – vgl ook Salomo se gebed by die inwyding van die tempel in 1 Kon 8:22 vv: ook die vreemdelinge uit die nasies kon tot die God van hierdie tempel bid en op Sy voorsiening staatmaak!).
Gekoppel aan die verhaal van die vyeboom kan ‘n mens die afleiding maak dat soos die vyeboom die belofte van vrugte gehad het, maar niks gedra het nie, die tempel die belofte van ‘n gebedshuis gehad het, maar niks daarvan geproduseer het nie. Die tempel dra nie die geestelike vrug wat ‘n mens met reg kan verwag nie. Uiteraard was hierdie verdoemende uitspraak en optrede van Jesus ‘n soort van laaste strooi vir die priesterhoofde en skrifgeleerdes om te begin beplan aan Jesus se dood.
Die storie van die vyeboom se verdroging gee aanleiding tot ‘n verdere lering van Jesus oor geloof, waarin Hy uitspel dat vir die ware geloof alles moontlik is. Dit sal vrug dra, anders as die vyeboom (of die tempeldiens in Jerusalem). Dit het effek op die natuur (bome en berge) sowel as op die verhouding tussen mense (vergifnis). Daarom roep Jesus hulle op tot onwrikbare geloof en vertroue in God uitgedruk in gebed: “Alles wat julle in die gebed vra, glo dat julle dit al ontvang het, en dit sal vir julle so wees.” Vergelyk Jesaja 65:24 wat God se gewilligheid om te antwoord só uitspel: “Voor hulle nog roep, sal Ek antwoord, terwyl hulle nog praat, sal Ek hulle gebed verhoor.”
Wat ek hieruit leer – binne die raamwerk van die versoek van Johannes en Jakobus wat geweier is, en die versoek van Bartimeus wat beantwoord is – is dat gebedsverhoring wel geen perke het nie, maar afhanklik is van God se beloftes en bedoeling. In gebed kan ek deel hê aan God se berg-bewegende handelinge.
Jesus bly hierdie laaste week van sy lewe in Betanië (volgens sommige “huis van ellende”, volgens ander “huis van dadels”) vanwaar Hy elke dag die tempel besoek totdat die laaste uur vir Hom aanbreek.
Matteus, Lukas en Johannes
Matteus vertel, soos in die geval met die besetene(s) van Gadara, van twee blindes op die pad uit Jerigo, anders as Markus. Lukas neem Markus se verhaal net so oor, maar vertel dit in sy eie woorde, met veral ‘n lofprysing aan God wat die genesende uitkoms begelei.
Al vier evangelies vertel van die Intog in Jerusalem. Matteus voeg detail by, dat die donkie eintlik ‘n merrie en vul was, waarmee Sag 9:9 in vervulling gegaan het, en laat ander detail weg, soos die feit dat Jesus ‘n draai by die tempel maak, hoewel hy wel sê dat die hele stad in beroering gekom het oor hierdie profeet van Nasaret in Galilea. Lukas noem die skare wat Jesus in die stad in begelei interessant genoeg: “juigende volgelinge” en kontrasteer dit met die Fariseërs tussen hulle wat die volgelinge wil stilhê. Jesus se antwoord aan hulle is betekenisvol: “As hulle stilbly, sal die klippe uitroep.”
Johannes se verhaal van die Intog in Jerusalem stem ook tot ‘n groot mate met die ander evangelies se gegewens ooreen, met ekstra detail, soos dat dit palmtakke was wat op die grond gegooi is, en fokus ook op die onbegrip van die dissipels wat eers na die verheerliking, Jesus se dood en opstanding, in volle begrip oorgegaan het. Johannes vertel ook van die impak wat die opwekking van Lasarus gehad het op die tipe gesprekke wat mense oor Jesus gehad het. Dit het egter ook ‘n negatiewe gevolg gehad, deurdat die Fariseërs begin agterkom het, dat hulle invloed taan: “Die hele wêreld gaan agter hom aan!”
Lukas vertel nie die verhaal van die vyeboom nie, terwyl Matteus dit as een verhaal vertel: Jesus het die boom vervloek en dit het onmiddellik verdroog, waarna Jesus sy lering oor die geloof gee.
Al vier evangelies het ook die verhaal van die reiniging van die tempel. Lukas vertel dit met min detail, maar Matteus voeg detail by, bv. soos dat blindes en kreupeles deur Jesus in die tempel gesond gemaak is, en dat daar kinders in die tempel was wat Hom as die Seun van Dawid (vgl die blinde Bartimeus) geprys het. Tegelykertyd is daar egter ook die teenstand van die priesterhoofde en skrifgeleerdes wat weereens wil hê dat Hy die mense moet stilmaak in hulle lofprysing oor Hom.
Johannes plaas die verhaal egter in ‘n heeltemal ander konteks aan die begin van Jesus se bediening met ‘n Paasfees in Jerusalem, net na die water-in-wyn-wonder in Kana. Dit is ook Johannes se evangelie wat ons die detail van die sweep van toutjies te danke het en die verdere lering dat Jesus die tempel gereinig het om te sorg dat Sy Vader se huis nie ‘n besigheidsplek word nie. Die dissipels skryf sy optrede aan die liefde vir Sy Vader se huis toe (Ps 69). Die Jode (baie keer die benaming vir Fariseërs in sy evangelie) vra dan ‘n wonderteken, waarop hy in verskuilde taal na sy dood verwys. Hulle interpreteer sy uitspraak letterlik as dat Hy die tempel wil afbreek. Na sy dood en opstanding het dié woorde sy dissipels in hulle geloof versterk.
View all posts in this series
- WEEK 1: Inleiding op die evangelie van Markus - January 12, 2010
- Die vier evangelies se unieke Jesus-portrette - January 21, 2010
- Die drie Sinoptiese evangelies - January 22, 2010
- Die boodskap van Markus - January 25, 2010
- Markus in vergelyking met die ander evangelies - January 26, 2010
- Bybelstudie metodiek - January 27, 2010
- Luistersiklus
- Lectio Divina
- WEEK 2: Markus 1:1-3:6 – Proloog en Deel 1: Bekendstelling - January 28, 2010
- Markus 1:1 – Jesus as God-mens vervul die OT beloftes
- Markus 1:1-8 – Die hart van die evangelie is opgesluit in Jesus Christus
- Markus 1:9-20 – om deur Christus geroep te wees, is om ‘n dissipel te wees - January 29, 2010
- Markus 1:21-31 – Dit is ‘n nuwe leer, en dit kom met gesag! Hy gebied selfs die bose geeste, en hulle gehoorsaam hom. - February 1, 2010
- Markus 1:32-39 – Die bediening draai om God, nie om die vrugte daarvan nie
- Markus 1:40-45 – “Ek wil. Word gesond.” - February 2, 2010
- Markus 2:1-12 – geloof word in gedrag uitgedruk
- Markus 2:13-17 – dié wat siek is, het ‘n dokter nodig
- Markus 2:18-3:6 – Jesus se bevrydende bediening wek wrede weerstand van die leiers - February 3, 2010
- WEEK 3 van die Bybelskool oor Markus - February 4, 2010
- Markus 3:7-30 – Die impak van die bediening verskerp
- Die twaalf dissipels in die evangelies en Handelinge
- Markus 3:31-35 – Jesus en sy familie - February 5, 2010
- Markus 4:1-9 – Wie ore het en kan hoor, moet luister
- Markus 4:10-12 – Die geheim van die koninkryk word gegee, nie verwerf nie
- Markus 4:13-29 – om reg te hoor, bepaal jou hele lewe - February 8, 2010
- Markus 4:30-41 – Het julle dan nie geloof nie? - February 9, 2010
- Markus 5:1-20 – Wat het U met my te doen? - February 10, 2010
- Markus 5:21-43 – Bly maar net glo!
- Markus 6:1-6 – Sy tuisdorp se mense wil niks van Hom weet nie
- WEEK 4 van die Bybelskool - February 11, 2010
- Markus 6:7-29 – Dissipelskap vra altyd ‘n prys
- Markus 6:30-52 – Jesus demonstreer sy Godheid op verskillende maniere - February 12, 2010
- Markus 6:53-7:23 – Onreinheid het met die hart te make - February 15, 2010
- Markus 7:24-8:10 – Jesus is intiem en intens betrokke by mense - February 16, 2010
- Markus 8:11-21 – Hoe blind is dié wat nie wil sien nie - February 17, 2010
- WEEK 5 van die Bybelskool - February 18, 2010
- Markus 8:22-9:1 – Wie sy lewe vir Jesus en die evangelie verloor, sal dit behou
- Markus 9:2-29 – Vir die een wat glo, kan alles - February 19, 2010
- Markus 9:30-48 – dié wat eerste wil wees, moet laaste wees - February 22, 2010
- Markus 9:49-10:16 – Jesus vra getrouheid aan Hom en lojaliteit aan mekaar - February 23, 2010
- Markus 10:17-45 – Redding uit genade alleen - February 24, 2010
- WEEK 6 van die Bybelskool - February 25, 2010
- Markus 10:46-11:25 – ‘n huis van gebed vir die nasies
- Markus 11:27-12:37 – Jesus se intellek en wysheid is te veel vir die Joodse Raad - February 26, 2010
- Markus 12:38-44 – Die arm weduwee se gawe - March 1, 2010
- Markus 13:1-23 – Rampe en Vervolginge en die groot verdrukking - March 2, 2010
- Markus 13:24-37 – Die koms van die Seun van die mens - March 3, 2010
- WEEK 7 van die Bybelskool - March 4, 2010
- Markus 14:1-11 – Gesalf in Betanië, verraai in Jerusalem
- Markus 14:12-42 – Jesus word die paaslam - March 5, 2010
- Markus 14:43-15:5 – Die tyd van die duister magte - March 8, 2010
- Markus 15:6-47 – Jesus word gekruisig en begrawe - March 9, 2010
- Markus 16:1-20 – Jesus het liggaamlik opgestaan - March 10, 2010
- Lees die vier evangelies en Handelinge - June 20, 2016
- Tien lesings uit Markus vir Heilige Week met kommentaar - April 11, 2017
- Jesus is die hart van die evangelie - January 8, 2018
Discover more from Bybelskool
Subscribe to get the latest posts sent to your email.
Alida Bothma
Hi Chris, hierdie week se gedeeltes is baie gelaai met soveel uitsprake wat Jesus maak. Die gedeelte wat my die meeste aangegryp het, is eintlik die gedeelte in Matteus waar Jesus waarsku teen die skrifgeleerdes en Fariseers en waar Hy huigelary veroordeel. Ek het net so bewus geword daarvan hoe ons elkeen individueel, maar ook as gemeente en kerk as die liggaam van Christus moet self-ondersoek doen oor al hierdie eienskappe van die ingesteldheid van die Fariseërs en waar dit nie dalk by ons (onbewustelik) teenwoordig is nie. Wat van 'n 'kritiese gees' wat so dikwels voorkom in die midde van die kerk, en hoeveel keer stenig ons nie ook profete wat ons nie as profete raaksien in ons gemeenskap nie (daar dink ek dadelik aan ons in die apartheidsdae) maar ons moet op onsself let dat dit nie oor en oor gebeur nie. Toe ek hierdie gedeelte gelees het, het ek weer gaan terugkyk na 'n hoofstuk “The Pharisees' struggle with the Holy Spirit” uit die boek “Communion with God” wat Mark Virkler geskryf het.(Die praktiese werkboek). Daar het hy o.a. 'n vraelys om in diepte jou eie gedagtes en motiewe met 'n fynkam deur te gaan – 'n baie sinvolle oefening!
Alice Steenekamp
Hello my naam is Alice , en ek woon in Alberton JHB. Ek het op julle bybelstudie op die wed afgekom wat n wonderlike studie so geesvervul baie dankie. Ek wil net graag weet ek het net vanaf Markus 10:46-11:25, waar kan el vanaf Markus 1 kry asb.
Mag God julle seen vir die werk wat julle vir HOM doem.
Geseende dag.
Chris van Wyk
Hi Alice – jy kan op die boonste menu gaan na Markus en dan reg aan die onderkant van die bladsy wat dan oopmaak by die hele lys van Markus Bybelstudies uitkom. Geniet dit! Hier is die direkte skakel: http://www.ngkerksomerstrand.co.za/blog/markus/
Marietjie van Niekerk
More Ds Chris
N.a.v. die les oor geloof na die gedroogde vyeboom en wat jy bo geskryf het “Alles wat julle in die gebed vra, glo dat julle dit al ontvang het, en dit sal vir julle so wees.” Vergelyk Jesaja 65:24 wat God se gewilligheid om te antwoord só uitspel: “Voor hulle nog roep, sal Ek antwoord, terwyl hulle nog praat, sal Ek hulle gebed verhoor.”, wil ek net graag weet hoe sekere gebede, bv in die tyd waarin ons leef en soveel sterftes, dit sou lyk asof gebede vir lewe ne beantwoord word nie. Wat moet ons interpretasie wees van gebedsverhoring?
Chris van Wyk
Hi Marietjie. Daar is in die Skrif ‘n hele paar redes waarom ‘n gebed met ‘n “nee” begroet word. Dit is natuurlik ook gebedsverhoring in die sin daarvan dat die Here ‘n antwoord gee. As Dawid bid dat sy kind genees word dan antwoord die Here indirek dat dit nie gaan gebeur nie deurdat die seuntjie sterf (2 Sam 12). As Jeremia bid dat die ballingskap afgewend word, antwoord die Here direk dat Hy dit nie gaan doen nie, en verbied Jeremia om verder daarvoor te vra. En die Here sê selfs al sou die grootste voorbidders in die geskiedenis voor Hom staan (Moses, Samuel), sal Hy nie van plan verander nie (Jer 15:1). Dieselfde gebeur met Esegiël. Die Here sê dat geen gebed ‘n nasie kan red wat konstant troubreuk teenoor Hom begaan nie, selfs nie as die meer regverdige mense dit vra nie (Noag, Daniël, en Job – Eseg 14:14 [terloops, hierdie Daniël is waarskynlik nie die Bybelse Daniël nie; sy naam word eintlik Danel gespel, en verwys moontlik na die skoonpa van Henog volgens die pseudepigrafiese werk Jubileum 4:20). Jesus self bid dat die beker van lyding Hom verbygaan, en moet aanvaar dat God se wil juis sy lyding is (Mrk 14:36). So ook Paulus oor die engel van Satan wat hom met die vuis slaan, die doring in sy vlees, en God se antwoord ná drie intense gebede is dat God se genade vir hom genoeg is (2 Kor 12:7). Dit is nou benewens die gebede wat nie beantwoord word vanweë sonde (Ps 66:18) of verkeerde begeertes (Jak 4:3). Dit moet ‘n mens natuurlik nie moedeloos maak om te bid nie, maar dit verduidelik hoekom gebede nie altyd beantwoord word soos ons dit wil hê nie.
Marietjie van Niekerk
Baie dankie vir die onvattende antwoord.