Markus 2:1-12 – geloof word in gedrag uitgedruk

Ek sit my leeswerk voort as ‘n Speurder:

  • Wat gebeur hier (wie, wat, wanneer, waar)?
  • Wat beteken dit (hoekom, met watter doel)?
  • Wat nou (aksie, met wie)?

In vyf tonele van 2:1-3:6 word Jesus se bediening verder beskryf.  Let op hoe die teenstand van die godsdienstige leiers telkens daarmee gekontrasteer word.

Toneel 1: Jesus genees ‘n verlamde man

In die eerste toneel praat Jesus weereens oor sy boodskap (logos) met die skare wat by sy huis (waarskynlik Petrus s’n)  in Kapernaüm saamdrom.  Let op hoe Jesus se eerste reaksie op die geloof van die vriende van die verlamde man is om sy sondes te vergewe.  Dit is eers as die skrifgeleerdes sy vermoë om sondes te vergewe bevraagteken dat Hy die verlamde man genees as bewys daarvan.  Dit wys onomwonde dat vergifnis en genesing eintlik een saak is vir God, die koms van sy koninkryk wat alles verander.

Dit is hartseer dat hierdie Godsbewys die skrifgeleerdes egter ook nie tot geloof beweeg nie, soos ook die geval was met die genesing van die melaatse.  Tog praat Jesus steeds in taal wat hulle sou kon verstaan – as hulle die moeite wou doen – deur na Homself te verwys as die “Seun van die mens” (vgl Dan 7:13 waar Hy wat ewig lewe die koninkryk aan die seun van die mens oorhandig om oor alles te regeer – Jesus doen dit 14 keer in Markus, bv. Mark 2:10,28; 14:41,62).

Dit is ook insiggewend dat die geloof van die vier vriende gewys word deur hulle optrede om die verlamde man deur die dak by Jesus uit te bring.  In die genesingsverhale van Markus word geloof meesal verbind met een of ander optrede of aksie om by Jesus uit te kom, soos Geulich sê:

“Faith denoted an attitude expressed in conduct.”

My geloof moet ook in my gedrag uitgedruk word!

Matteus en Lukas

Matteus vertel net die buitelyne van die verhaal, terwyl Lukas uitbrei oor die skrifgeleerdes, veral van waar hulle orals gekom het.  In Lukas se weergawe prys die man ook God.

View all posts in this series

Gedrag, Geloof, Genesing


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Comments (2)

  • Pastoor, baie dankie. Ek het nie geweet waar om te vat en waar om te los nie. Vanaand het Vader my voorwaar op hierdie pad gesit. Net weereens ‘n bewys van God wat die opregte hart hoor: My gebed voor aanvang van vanaand se studie was dat Vader asseblief sal help met die studie. Hy weet mos ek sukkel om met Dr Heyns se Dogmatiek saam te werk.
    Vrae:
    In Markus 1:4 Verwys Johannes na Jesus as God of na God die Vader?
    Mar 1:10 En dadelik toe Hy opklim uit die water, sien Hy die hemele skeur en die Gees soos ‘n duif op Hom neerdaal. HET NET JESUS DIT GESIEN, en dalk dit aan die mense vertel of hoe dan?
    Tot later dan
    Jesus liefde
    Linda

    • Ek is bly dit beteken vir jou iets!
      Mark. 1:4: Johannes verwys hier in die algemeen na God, nie na Jesus toe nie.
      Mark. 1:10: Ons het hier verskillende weergawes van dieselfde gebeure in die evangelies. Markus en Matteus (Matt. 3:16) beklemtoon dat Jesus die Gees gesien het. Lukas vertel dat die Gees sigbaar neergedaal het, nie wie dit kon sien nie (Luk. 3:22). Johannes vertel vir ons dat Johannes die Doper ook die Gees sien neerdaal het (Joh. 1:32).
      As ons dit saamvat, het Jesus en Johannes die Doper die Gees se neerdaling gesien en daarvan vertel. Daar is ook ‘n skraal moontlikheid dat ander dit gesien het. Die werking van die Gees in Jesus se lewe was egter vir almal sigbaar.

Maak 'n opmerking

%d bloggers like this: