Spreuke 6:20-7:27 – Pasop vir owerspel

Hierdie waarskuwing teen die slegte (vreemde) vrou is die derde en langste waarskuwing in die boek Spreuke (vgl die vorige twee: 2:16-19; 5:3-23).

6:20-23 – Ons raad is die lig op pad na die lewe toe

Let op hoe die familie as konteks vir die voorskrif van die pa geskilder word.  Die seun moet luister na sy moeder se raad.  En die gevolge van sy gehoorsaamheid word eers in positiewe terme uitgespel.  Sy ouers se voorskrifte is ‘n lig op die pad na die lewe toe.

6:24-26 – Owerspel is nie speletjies nie

Die pa gesels nou baie oop en eerlik met sy seun oor wat die pa as ’n potensieel baie plofbare probleem vir sy seun beskou.  Owerspel is nie speletjies nie!  Dit kan jou lewe kos.  Let op hoe owerspel (met ’n ander man se vrou) deur die pa as ’n baie ernstiger probleem as prostitusie geskilder word, hoewel dit ook steeds afgewys word.

Die pa spel dan vier moontlike gevolge van owerspel uit: straf, armoede, verwerping en die dood.

  • 6:27-29 – Jy kan gestraf word as jy met ‘n ander man se vrou lol – Met treffende beelde word die problematiek van owerspel geskets.  Jy sal jou voete verbrand as jy met haar lol, asof jy op die kole probeer loop.  Dit kan lei tot ‘n straf deur die gemeenskap waarvan hy  nie vry sal kom nie.
  • 6:30-31 – Owerspel kan jou alles kos wat jy besit – Dit kan jou alles kos wat jy besit, omdat jy metafories as ‘n dief gereken sal word.
  • 6:32-33 – Die skande kan jou lewe in die gemeenskap verwoes – Die skande in die gemeenskap kan jou lewe verwoes.  Jy sal verwerp word deur almal wat die regte pad wil loop.
  • 6:34-35 – Owerspel kan jou jou lewe kos – Die woede van die vrou se man kan jou jou lewe kos.

7:1-5 – Maak wysheid jou metgesel

Weerstand teen versoeking kom wanneer wysheid jou metgesel is, wanneer insig jou gedagtes volmaak, wanneer opvoeding deel van jou lewe geraak het.  Let op hoe hy van wysheid as sy suster praat, wat ook beminde kan beteken, soos dit in Hooglied gebruik word (vgl my bydrae daaroor).

Die opvoeding van jou ouers en ander rolmodelle moet van ‘n eksterne voorskrif in ‘n interne oortuiging verander wat nie net vir jou ‘n morele kompas verskaf nie, maar die integriteit van jou gedrag bepaal.

Die geveg teen immoraliteit word nie in die hitte van die stryd gewen nie, maar in die toegewyde voorbereiding vooraf.

7:6-23 – Pasop veral vir verleiding wat in ‘n geestelike konteks geplaas word

Let op hoe die vrou haar verleiding in ‘n geestelike konteks plaas.  Sy het so pas offers gebring, haar geloftes betaal.  Haar saak is dus reg met God. Die owerspel is soos ‘n eerste oortreding.  Dié pad is egter die pad van die dood, al is die man nie tuis nie.

7:24-27 – Sy laat selfs sterk manne ondergaan

By haar is jy op pad na jou dood toe.  Sy laat selfs sterk manne ondergaan.  Moet jou nie dus nie met só ‘n vrou ophou nie, en haar pad loop nie.

View all posts in this series

Spreuke


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Comments (2)

  • Vers 27 is so ‘n kostelike vraag in verband met owerspel: Kan jy kole vuur in die vou van jou klere inhark sonder dat jou klere aan die brand raak?

    Die rol van die Pa en Ma se opvoeding is ook hier so deurslaggewend: mens hoop net dat ouers die regte benadering tot verhoudings aan kinders voorhou, want soveel buite-egtelike verhoudings word gerasionaliseer tot aanvaarbaar, so waar gaan dit dan eindig?

    • Ja, en koppel Spreuke se waarskuwings aan die verheerliking van ‘n eksklusiewe verhouding tussen een man en een vrou in Hooglied, dan gee Hooglied die positiewe motivering vir getrouheid aan jou maat, en kan jy die slaggat van ‘n verkeerde verhouding, waarteen Spreuke waarsku, vermy.

Maak 'n opmerking

%d bloggers like this: