Spreuke 10:1-32 – God sorg vir die opregtes

• Vers 2-5 handel oor die breë tema van welvaart – vlyt maak ryk – en die onderskeie rolle wat God en lewenstyl daarin speel.  Die tema van God se seën word in ’n hele paar verdere verse uitgespel reg deur die hoofstuk: (gee lewe – 16; seën ipv swoeg – 22; gee begeertes – 24; gee lang lewe – 27) en die rol wat jou lewenstyl speel (aanvaar bevele – 8; leef opreg – 9; soek die waarheid – 10; bedek aanstootlikhede – 12; ontvang krag IN die regverdige opregte lewe – 29).
• Vers 17-21 handel oor die breë tema van woorde en die effek wat dit persoonlik en publiek het: fokus op woorde wat geluk bring – 11; loop nie te koop met kennis nie – 14; is leerbaar – 17; tel sy woorde – 19; sorg met sy woorde vir ander – 21; weet om gepaste dinge te sê – 32. Woorde maak dus saak!

Wat my vandag tref is veral verse 2-3 en vers 29:

• Vers 2: Peterson vertaal die eerste deel van vers 2 só: “An honest life is immortal” (The Message).  Dit sê vir my dat ’n lewe wat opreg en eerlik geleef word, ’n ingeboude duursaamheid het.  Die oorspronklike Hebreeuse woord wat hier gebruik word, is geregtigheid, wat in die NAV vertaal is met “volgens die wil van God”.  Die woord het egter meer die betekenis van eerlikheid in kontras met die oneerlike en onregverdige maniere waarop goddeloses hulle welvaart bekom, soos in die eerste deel van die vers uitgespel is.
• Vers 3: God se sorg word uitgespel vir regverdiges (eerlike mense), waarmee nie net die algemene boodskap van Spreuke bevestig word nie, maar ook ‘n band met vers 2 gehandhaaf word, dat ’n eerlike lewe ewige waarde het.  Hierdie klem op regverdigheid sal nog vele kere in hierdie spreuke van Salomo aangeraak word.
• Vers 29: ’n Mens kan dink dat om opreg en regverdig te lewe ’n geweldige inspanning is, en daar is uit die aard van die saak baie op die spel om dié keuse te maak, en dit kan baie van jou vra.  Maar die omgekeerde is ook waar.  Deur die regte dinge te doen, ontsluit jy ’n geweldige krag in jou lewe wat jou nie net aan God verbind nie, maar ook op ’n besonder manier in staat stel om die uitdagings van die lewe te kan hanteer.