Sodat elkeen wat in Hom glo, nie verlore mag gaan nie

Diogenes, ‘n Griekse filosoof, was bekend daarvoor dat hy met ‘n lamp rondgeloop het op soek na ‘n eerlike mens, iemand wat op die waarheid fokus. Sy soektog was egter vrugteloos.

Sefanja gebruik ‘n soortgelyke beeld van God met ‘n lamp wat deur Jerusalem se strate beweeg. Sy missie is egter om die goddeloses uit te roei:

“En in dié tyd sal Ek Jerusalem met lanterns deursoek en besoeking doen oor die manne wat dik geword het op hulle afsaksel, wat in hulle hart sê: Die HERE doen geen goed en Hy doen geen kwaad nie.” (Sef 1:12).

In sy gramskap het Hy die volk in ballingskap gestuur, ‘n teken van wat Hy uiteindelik met die hele aarde sal doen:

“want Hy bring vernietiging, ja, ’n verskriklike, oor die inwoners van die aarde.” (Sef 1:18).

Die goeie nuus in die NT is dat God uitkoms gee vir dié wat in Jesus Christus glo. God het die wêreld só lief gehad:

“dat Hy sy eniggebore Seun gegee het, sodat elkeen wat in Hom glo, nie verlore mag gaan nie, maar die ewige lewe kan hê.” (Joh 3:16).

Die slegte nuus is egter, soos in Sefanja se tyd, dat ongelowiges die duisternis liewer het as die lig. Hoekom? Want hulle werke is boos. Hulle kan nie bekostig om in die lig te kom daarmee nie, sodat hulle werke nie bestraf kan word nie (Joh 3:19-20).

Watter tragiese keuse vir korttermyn voordele, maar langtermyn gevolge.