1 Korintiërs 8 – Jou vryheid mag nie ander laat sondig nie

Paulus skuif aan na die vraag oor vleis wat aan ’n afgod geoffer is, waarmee hy waarskynlik terugverwys na die spreekwoord wat hy aangehaal het in 6:13: “Die maag is vir kos, en kos vir die maag.”  Wat ’n mens ook in gedagte moet hou, is dat die situasie in Korinte so was, dat sommige van dié (sterk) gelowiges ook in die afgodstempels gaan vleis eet het (die restaurante van daardie tyd!), omdat die tempels baie keer ook die enigste plek was vanwaar jy vleis kon bekom.  Die oorskot van die tempel offervleis is selfs op die markpleine verkoop.  Maar, omdat jy van buite af kon insien by die tempels, het ander (swak) gelowiges aanstoot daaraan geneem (vers 10).

Let op hoe hy eers die beginsel van die liefde neerlê en verduidelik voordat hy sy antwoord op hulle vraag gee.  Basies sê hy, dat kennis goed is, maar nie genoeg nie.  Die liefde is belangriker (vgl. 13:2: “en besit ek al die kennis … maar ek het geen liefde nie, dan is ek niks.”), ook in ons verhouding met God.  Om die waarheid te sê, dit is wanneer ons God liefhet, dat ons in ’n verhouding kom met Hom waar Hy vir ons ken – iets wat baie belangriker is as wat ons weet (of dat ons Hom ken).

Hy sal nog meer uitbrei op hierdie idee later in sy brief aan die Galasiërs (in 4:8: “noudat julle Hom leer ken het, of liewer, noudat Hy julle ken”).  Vergelyk dit ook met die gelykenis van die tien meisies in Matteus (in 25:12 waar die bruidegom vir die 5 onverstandiges sê: “Ek ken julle nie”!”)

In sy antwoord sluit hy dan by hulle kennis aan, en erken dat daar eintlik niks aan die vleis verander as dit aan ’n afgod geoffer is nie.  Om die waarheid te sê, daar is eintlik geen ander God, behalwe Een nie.  En al sou mense dink daar is sogenaamde gode (let op sy woorde!) bestaan hulle nie vir ons nie, want ons het net een God, die Vader en Sy Seun deur wie alles bestaan en deur wie ons lewe.

Maar nou is dit so dat nie almal dié kennis het nie, en uit liefde vir hulle, moet ’n mens hulle onkunde in ag neem, en nie iets doen waardeur hulle gewete, wat alreeds swak is, nog verder verswak sal word nie.  Ons vryheid (let weer op hoe hy daarmee terugverwys na hfst. 6:12-13) mag nooit ’n aanleiding vir ander word om te sondig nie (vgl. Jesus ook hieroor in Matt 18:6: “Elkeen wat een van hierdie kleintjies wat in My glo, van My afvallig maak, vir hom is dit beter as hy met ’n groot meulsteen aan sy nek in die diep see verdrink.”).

Om die waarheid te sê, jy sondig eintlik teen die onkundiges, as jou vryheid hulle laat sondig.  Daarom sal Paulus nie sulke vleis eet nie (gelukkig nie alle vleis nie!) want hy wil nie sy medegelowiges se val veroorsaak nie.  Hy reël darem ook later dat ’n mens nou nie hoef navraag te doen oor vleis wat jy in ’n slaghuis koop, of dit nou aan ’n afgod geoffer is of nie, en jy dit dan maar mag eet (10:23-33).  Maar die gewete van die swakkeres bly ook daar ’n bepalende faktor.

Let ook op dat hierdie beginsel van die liefde na ander sake deurgetrek kan word – jou medegelowige se standvastigheid in die geloof is belangriker as jou eie kennis en vryheid in die geloof.  En lees gerus in Romeine 14:19 en 15:2 Paulus se verdere gedagtes hieroor.

’n Mens moet onthou dat Paulus hier natuurlik skryf oor mense wat pas uit die heidendom na Christus oorgekom het en nog die impak van die heidense gebruike sou ervaar.  Hy praat nie oor mense wat eintlik net hulle eie bekrompe idees op ander van toepassing wil maak nie en van beter behoort te weet nie.

Dit help my nogal om só daaroor te dink, want dit is eintlik vir my swaar woorde dié van Paulus: en ek sou ook saam met sommige gelowiges wou uitskreeu, soos Paulus hulle aanhaal in 10:29-30: “Waarom moet my vryheid beperk word deur ’n ander se gewete?”  Maar die punt is dat ons nie ons eie belang kan soek nie, want dit is die beginsel van die liefde, en die weg van die kruis (2:2).

En dit is soos Forrest Gump sê: “That’s all I have to say, about that.”

View all posts in this series

gewete, Korintiërs, liefde, vleis


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Comments (2)

  • Ek dink daar is n baie fyn lyn tussen geregtige onderhoud en geld maak uit die Evangelie, wat ook interesant is vir my is dat Paulus (soos Jesus) bereid was om sy regte op te gee sodat hy die evangelie kon versprei – so anders as wat ons vandag ervaar deur die stakings waar massas juis hulle sg regte op eis ten koste van ander.

    Dankie Chris dat jy al hierdie werk gratis aan bied, jy doen n ongelooflike werk

  • Dankie – maar ek doen die werk darem primêr vir my gemeente, en ek word deur hulle onderhou. Dit is dus eintlik die gemeente wat hulle bronne deel met die res van die Christelike gemeenskap. Anders sou ek dié goed op my eie tyd moes doen.

    Oor die stakers – jy is natuurlik reg dat hulle ten koste van ander optree, veral waar lewensverlies en eiendomsbeskadiging ter sprake is as gevolg van stakers se optrede.
    Maar, dit is ‘n komplekse saak, die werkgewers, die staat in hierdie geval, het die hef in die hand as dit by onderhandelinge kom. ‘n Mens sou met reg kon vra of hulle billik is in hulle aanbod, sowel as in die wyse waarop hulle die onderskeie vergoedingskale van bestuurders relatief tot werkers hanteer. Ek het nie genoeg inligting om my daaroor uit te spreek nie.
    En dieselfde geld die vakbondleiers – tot wie se voordeel dryf hulle die stakings op die spits?
    Plaas die hele situasie binne die groter konteks van Afrika, en jy kan met reg vra: maak die leiers die regte keuses – as jy kyk na groeiende armoede, blyk die antwoord nee te wees, soos Greg Mills in sy nuwe boek Why Africa is Poor beweer: Swak keuses bring armoede in vanoggend se Die Burger in die Oos-Kaap. Kry egter nie die artikel op die Internet by hulle webblad nie.
    Dit lyk vir my al te veel na ‘n stryd tussen leiers van die regering en Cosato onderskeidelik met die werkers/stakers as hulle manskappe … of wat praat ek alles?

Maak 'n opmerking

%d bloggers like this: