Esegiël 36:16-38 – Ek herstel julle ter wille van Myself

Michael Buesking - Drawing Jerusalem - with permission
Michael Buesking – Drawing Jerusalem – with permission

Die herstel wat God bring sal nie net die geskenk van ‘n messiaanse leier en ‘n getransformeerde land insluit nie, maar ook ‘n getransformeerde volk om dié nuutgemaakte ruimte te betree en beleef.

Die diepste motivering daarvoor is egter nie – soos ‘n mens sou kon verwag – dat die Here die volk jammer gekry het en daarom hulle lot verander het nie – hoewel dit op ander plekke tog ‘n rol speel. Esegiël is egter skerp in sy oordeel oor die volk: “Julle moet weet, sê die Here my God, dat Ek dié dinge nie ter wille van julle doen nie.  Al wat julle pas, Israel, is skaamte en skande oor julle optrede.” (36:32).

Die diepste rede vir God se herstel is enkel en alleen ter wille van Homself: “Dit is nie ter wille van julle dat Ek optree nie, Israel, maar ter wille van my heilige Naam wat deur julle oneer aangedoen is onder die nasies waar julle gekom het.” (36:22).

Daarom herinner die Here die volk nie net aan die sondes wat die ballingskap tot gevolg gehad het nie (36:17-19).  Hy herinner hulle op die koop toe daaraan dat dié gebeure sy Naam onder die nasies oneer aangedoen het (36:20,22,23).  Die nasies het vreemd van God begin praat oor sy hantering van die volk, al het hulle geweet wat die oorsake daarvan was.

Dít kon die Here nie toelaat nie, want Hy wou juis deur die volk sy genade aan die nasies wys sodat hulle Hom as die God van die wêreld sou aanbid.  Dít bly immers altyd God se droom.  En Hy kies om hier aan die volk in ballingskap genade te betoon, omdat dit sy Naam in ere sal herstel onder die nasies; hulle weer in ontsag sal laat vir wat God kan doen vir sy mense, al is hulle ook hóé dwaas en afvallig, en al het hulle alles verdien wat met hulle gebeur het.

Daarom bring die Here hulle terug uit die ballingskap, gooi reinigingswater oor hulle om hulle skuld voor Hom uit te delg (laat ‘n mens dink aan die teken van die doop), en gee hulle ‘n nuwe hart en gees sodat hulle volgens sy voorskrifte en bepalings van uit hulle binneste kan lewe (36:25-27).

Dit sluit in dat Hy hulle woonplek herstel, dat Hy die landboutoestande herstel (“Ek sal die graan aanspreek en sorg dat dit baie is.” – 36:29), en dat hulle veilig tussen hulle omringende bure kan woon.  God se seën is altyd omvattend en sluit die omgewing in.

Die land sal weer word soos die tuin van Eden (36:35), by wyse van spreke, sodat die nasies: “sal besef dat dit Ek, die Here, is wat die verwoeste stede herbou het en die kaalgestroopte land weer beplant het.  Ek, die Here, sê dit en Ek sal dit doen.” (36:36).  Daarmee word ook die rol aangedui wat ‘n vooraf profetiese woord speel.  Dit bevestig dié dinge wat God doen, al sien ‘n mens dit nie direk raak nie.

Dit is ook opmerklik hoe God selfs hulle gebede insluit in die goeie wat Hy weer vir die volk sal doen sodat ook die volk van Israel sal besef dat Ek die Here is (36:38). ‘n Mens herinner jou aan Daniël se gebede in dié verband.

Boodskap

Esegiël dui hier duidelik die rol van profesie aan.  Omdat Esegiël se woorde aan die uitkoms daarvan gemeet kon word – dit het ‘n paar dekades later in vervulling gegaan – het hy só onomwonde God se werk in die werklikheid van die volk se toekoms bevestig, al het politieke en ander rolspelers aan hierdie geskiedenis meegewerk.  Profesie bevestig dus vooraf dat dit God is wat iets gaan doen, al sien ‘n mens dit nie direk raak wanneer dit gebeur nie.  Geloofsoë leer dus om na God se woorde en beloftes in die verlede te kyk en die vervulling daarvan in die hede raak te sien.

Dit is ook interessant hoe sterk Esegiël God se genade beklemtoon.  Dit is ter wille van Homself en is per definsie nie iets wat verdien kan word nie. Net so belangrik is die klem op innerlike transformasie – soos Jer. 31:31-34 ook al beklemtoon het, en Eseg. 11:19-20, ook uitlig.  Paulus ontwikkel dié tema uitvoerig in sy tweede brief aan die Korintiërs in hfst 3 vv. 2 Korintiërs 2:12-3:18 – Ons raak God se woorde aan die wêreld.

View all posts in this series

Esegiël


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Maak 'n opmerking

  • Chris van Wyk on Inleiding op OpenbaringHou moed Amanda! Lees wat ek geskryf het vir Yvonne oor Psalm 103:5: https://bybelskool.com/psalm-1031-5-loof-die-here-wat-al-jou-siektes-genees/comment-page-1/#comment-29597
  • Chris van Wyk on Psalm 103:1-5 – Loof die Here wat al jou siektes geneesHi Yvonne Vers 5 moet in die konteks van die Psalm uitgelê word. Die eerste vyf verse vorm 'n eenheid: 1 Van Dawid. Loof die Here, o my siel, ja, alles wat in my is, sy heilige Naam! 2 Loof die Here, o my siel, en moenie enige van sy weldade vergeet nie – 3 Hy wat al jou sondeskuld vergewe, wat al j…
  • amanda on Inleiding op Openbaringhoe ( op aarde ) gaan God se koninkryk op aarde so gevestig word, dat Hy uiteindelik deur almal as Alleenheerser erken gaan word. Elkeen is so besig om sy eie ding te doen, dat dit byna onmoontlik klink. Dis vir my n moedelose gedagte.
  • Yvonne on Psalm 103:1-5 – Loof die Here wat al jou siektes geneesEk wil graag meer weet oor psalm 103vers 5
  • Chris van Wyk on 1 Samuel 28Hi Elsa, die doderyk is in twee gedeel. Kyk in Lukas 16 vir 'n beskrywing daarvan.
  • Elsa Steyn on 1 Samuel 28Hi Chris 1 Sam 28 vers 19 Saul en Samuel is saam in dieselfde plek, die doderyk. Saul het volhard in die afskakeling van sy verhouding met God, en het nie tot inkeer en berou gekom nie. Hoekom is hulle twee na dieselfde plek? Samuel is dan in die hemel?
  • Chris van Wyk on Genesis 12 – God roep vir Abraham na die land wat Hy vir hom sal aanwysEk het al heelwat hieroor geskrywe op bybelskool.com. Jy kan in die soekenjin verder kyk. Hier is die skakel na wat die belydenisskrifte daaroor sê wat 'n goeie vertrekpunt is: https://bybelskool.com/wat-is-die-drie-eenheid-die-getuienis-van-die-belydenisskrifte/?highlight=drie-eenheid
  • Petrus on Genesis 12 – God roep vir Abraham na die land wat Hy vir hom sal aanwysBeste Chris "Ons" Gen 1: 26 -"Toe het God gese: Kom Ons maak...." Gen 11: 7 - "Kom laat Ons afgaan..." Ons praat v/d die Drie-eenhied en Jesus as God. Verstaanbaar. Wanner God na "Ons" verwys, is dit nie dat Jesus Sy Seun Die Woord is soos Johannes dit ook noem en Jesus fisies die Seun van God is so…
  • Chris van Wyk on AmosDankie Katrien, dit is my voorreg. Chris.
  • Katrien on AmosSo maklik verval ons ook in dieselfde gemaksone van ouds! Ons moet waak teen selfgenoegsaamheid in ons verhouding met God. Met die Heilige Gees binne my is daar nie wegkom kans vir God se kinders wat lou en koud word, in hul verhouding nie. Ek wil bid Heer bewaar my van gemaksugtigheid in my verhoud…
  • Chris van Wyk on Openbaring 13 – God gee insig in die Bose se planne sodat gelowiges kan volhard in geloofHi Petrus, 'n mens kan die 666 simbolies verbind aan enige godsdiens wat Christene vervolg, ook dié tye en plekke deur die eeue waar Christene vervolg is in die naam van Islam. My gedagtes oor die 666 is soos volg: Die dier uit die aarde – die vals profeet (Openb 16:13 word die dier só genoem) – opp…
  • Chris van Wyk on 1 Samuel 17Dankie Sarie, dit is 'n tikfout. Dit is vers 9 van 1 Samuel 21.
  • Sarie Cronje on 1 Samuel 171 Sam 21 het net 15 verse - Filistyn se wapens het hy in sy eie tent neergesit wat later in sy verhaal weer ‘n rol sou speel (1 Sam 21:19).
  • Petrus on Openbaring 13 – God gee insig in die Bose se planne sodat gelowiges kan volhard in geloofGoeie Dag Chris Ivm die nommer 666. Ek het 'n interessante video gesien oor iemand wat selfs 'n boek daaroor geskryf het en die nommer met Mohammad/Allah verbind. Denkend aan die Openbaring 13 skrywe waar die wat nie die merk dra nie van ekonomiese welvaart afgesny word kilnk dit vir my reg. Soos jy…
  • Chris van Wyk on Lukas 10:38-42 – Kies om na Jesus te luister, want dit sal nie van jou af weggeneem word nieMy voorreg, Reinette.
%d bloggers like this: