Indeling – twee generasies

Die boek kan ingedeel word volgens die verhale van die twee generasies wat telkens die fokus van die twee dele van die boek vorm:

1. Die verhaal van die eerste generasie se mislukte Intog

Die eerste deel (hfst. 1-14) vertel die verhaal van die eerste generasie van die volk se trek van Sinai tot by die oostekant van die beloofde land.  Dit eindig met hulle gebrek aan vertroue in God om die land in te neem en is daarom ook die begin van die gevolglike verdere omswerwinge in die woestyn terwyl die fokus skuif na die volgende generasie.  Dit sluit die volgende temas in:

• Ingedeel as ‘n militêre gemeenskap – hfst. 1
• Ingedeel as ‘n familie gemeenskap – hfst. 2
• Die Levitiese gemeenskap – hfst. 3
• Die ampspligte van die onderskeie Levitiese groepe – hfst. 4
• Die reinheid van die geloofsgemeenskap – hfst. 5
• Die voorskrifte vir die Nasireërs – hfst. 6
• Die voorsiening vir die Levitiese werk – hfst. 7
• Die reiniging van die Leviete – hfst. 8
• Die viering van die tweede Paasfees – hfst. 9
• Die reis deur die woestyn – hfst. 10
• Die rebellie van die volk by Tabera en Kibrot-Taäwa – hfst. 11
• Die rebellie van Mirjam en Aäron teen Moses – hfst. 12
• Die verkenning van die land – hfst. 13
• Die rebellie van die volk en die nederlaag by Gorma – hfst. 14

2. Die verhaal van die tweede generasie se voorbereiding vir die Intog

Die tweede deel (hfst. 15-36) vertel die verhaal veral van die tweede generasie van die volk se voorbereiding vir beide die vier dekades lange trek deur die woestyn wat eindig met die aankoms van die volk in Moab, oos van die Jordaan, en die voorbereiding om die beloofde land in te neem.  Dit fokus daarom op belangrike kwessies van leierskap en priesterskap, met die gepaardgaande voorskrifte.  Daar is ook ‘n aantal oorwinnings in die woestyn wat deel van hulle voorbereiding vir die Intog is.  Dit sluit die volgende temas in:

• Godsdienstige voorskrifte vir die toekoms in die land – hfst. 15
• Die rebellie van Korag, Datan en Abiram – hfst. 16
• God bevestig sy keuse van Aäron – hfst. 17
• Die ampspligte van en voorsiening vir die priesters en Leviete – hfst. 18
• Die reinigingswater vir onreines – hfst. 19
• Moses en Aäron se sonde met die water uit die rots – hfst. 20
• Die verlossing deur die koperslang – hfst. 21
• Balak span Bileam in teen die Israeliete – hfst. 22
• Bileam se eerste twee uitsprake – hfst. 23:1-26
• Bileam se laaste twee uitsprake – hfst. 23:27-24:25
• Afgodsdiens en onsedelikheid by Sittim – hfst. 25
• Ingedeel as ‘n militêre familie gemeenskap met die oog op die Intog – hfst. 26
• God kies Josua as leier van die Intog – hfst. 27
• Die normale daaglikse, weeklikse en maandelikse offers – hfst. 28:1-15
• Die buitengewone offers vir die vyf verskillende feeste – hfst. 28:16-29:46
• Die voorskrifte oor geloftes binne die familie – hfst. 30
• Die wraakoorlog op die Midianiete – hfst. 31
• Die ooreenkoms met Ruben en Gad oos van die Jordaan – hfst. 32
• Die opsomming van die reis deur die woestyn – hfst. 33
• Die riglyne vir grense in die land – hfst. 34
• Die stede vir die Leviete en vir asiel soekers – hfst. 35
• Die finalisering van die erfreg van vroue – hfst. 36

Dit is daarom geen wonder nie dat Moses in Deuteronomium terugverwys na hierdie veelbewoë verhaal van die woestyn deur op talle plekke na die gebeure van Numeri te verwys.  Wanneer ons later Deuteronomium sal lees, sal Numeri ‘n belangrike agtergrond gee (soos Eksodus en Levitikus natuurlik ook sal doen) in terme van die verhale en voorskrifte.

Hier is ‘n lysie van die belangrikste verwysings na Numeri in Deuteronomium:

• Mirjam se melaatsheid – vgl. Num. 12 met Deut. 24:9;
• Die mislukte eerste Intog in Kanaän – vgl. Num. 13-14 met Deut. 1:19-46;
• Die trek deur die woestyn – vgl. Num. 20:14-21:20 met Deut. 2:1-25;
• Die inname van die streek oos van die Jordaan – vgl. Num. 21:21-35 met Deut. 2:26-3:10;
• Die verhaal van Bileam – vgl. Num. 22-24 met Deut. 23:4-5;
• Die voorsiening vir die priesters – vgl. Num. 18 met Deut. 18:2;
• Die gebeure by die Meribawaters by Kades – vgl. Num. 20:12 met Deut. 32:51-52;
• Die voorskrifte oor geloftes – vgl. Num. 30 met Deut. 23:21-23;
• Die asielstede – vgl. Num. 35:9-34 met Deut. 19:1-13;
• Die oorlog teen die Midianiete – vgl. Num. 13-14 met Deut. 3:12-29.

Dit beteken ook dat alles wat in Numeri beskryf is, vóór die toesprake van Moses in Deuteronomium plaasgevind het.  Trouens, Numeri vorm ‘n noodsaaklike agtergrond vir Moses se toespraak.  Daarsonder sou wat hy sê min sin maak.