1 Samuel 7 – Rig julle harte op die Here en dien Hom alleen. Dan sal Hy julle red …

Dit tref my dat 20 jaar verloop het na die tragiese buitmaak van die ark en die verdrukking van die Isaeliete na die dood van Eli en sy twee seuns. Miskien moes Samuel eers groot word vir Israel om regtig vertroue in hom te kon hê. Of miskien het dit hulle so lank gevat om hulle afhanklikheid van die Here te besef.

Darem ook interessant dat die Filistyne met kategese oorwin word – Samuel onderrig die Israeliete oor wat reg en verkeerd is, lei hulle in ‘n “met julle hele hart” (die setel van denke en besluite, nie emosies nie) hertoewyding aan die Here en bid vir hulle. En dan veg die Here vir Israel met ‘n groot donderweer wat die Filistyne verwar. Sukses in die stryd teen die Filistyne gaan dus om die lewende teenwoordigheid van die Here, en nie oor die ark per se nie. En bevryding kom deur ‘n naby verhouding met Hom en nie deur militêre krag in die eerste plek nie.

“Rig julle harte op die Here en dien Hom alleen. Dan sal Hy julle red …”

Rama word nou ook ‘n heiligdom met die bou van ‘n altaar daar, hoewel Samuel steeds by ander heiligdomme die regspraak behartig het: Bet-El, Gilgal en Mispa. Binnelands en buitelands was daar nou vrede, en God het weer sy regmatige plek in die lewe van die volk ingeneem. Waarom sou daar dan ‘n koning nog nodig wees in Israel? Die volgende hoofstuk gee die antwoord daarop.

View all posts in this series

Samuel


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Comments (2)

  • Elize du Plessis

    “Agter die Here aan geweeklaag.” Wat is die weeklaag? Is dit ‘n huilklaag? ‘n Intense klag?
    Kan ‘n rigter dieselfde betekenis hê as ‘n regter? Kan ‘n rigter ook ‘n regter genoem word?

    • Hi Elize – weeklaag is ‘n intense droefheid oor iets waaraan jy uiting gee deur jou emosies (huil of kla of kerm) of deur een of ander handeling of gebaar (klere skeur of stof op die kop gooi). Open. 18:19 praat bv. van ‘n geween en geweeklaag wat waarskynlik trane en gebare insluit. Die woord rigter en die woord regter is eintlik presies dieselfde woord in Hebreeus – šōp̱ēṭ. Engels vertaal die Hebreeuse woord immers met “judges”. Die konteks sê vir jou watter vertaling om te gebruik. n Rigter was ‘n (veral militêre) leier (Rigt 2:16) van die land wat soms ook regsfunksies uitgeoefen, soos bv. Debora in Rigt.4:5 wat ‘n profetes en regter was wat toe die nood begin druk as rigter opgetree het. ‘n Rigter was dus baie keer ook ook ‘n regter. ‘n Regter was weer iemand wat uitspraak in konflik, geskille of misdaad gegee het, en nie noodwendig ‘n rigter nie. Soms is daar amptenare hiervoor aangestel, maar die konings het altyd ook regsfunksies uitgeoefen, en die profete, priesters, Leviete en familiehoofde het ook baie keer as regters opgetree (Deut. 17; 2 Kron. 19).

Maak 'n opmerking

%d bloggers like this: