1 Samuel 13 – Saul minag die Here

Saul se koningskap wankel al te gou.  Dit is tragies dat hy al die potensiaal gehad het, en die Here sy koningskap vir altyd wou bevestig, maar dat hy nie die riglyne vir aanbidding en gemeenskap met God nakom nie, en so uit God se guns val.

Nog erger, anders as ‘n Dawid, toe dié aangespreek is, keer hy nie terug na die Here in berou nie, maar tel doodgewoon die manskappe by hom, en sit die oorlog voort.  Dit kom neer op ‘n minagting van God en sy woord.

As Samuel dan vir Saul sê, dat die Here besluit het om ‘n ander koning te kies, spel hy dit uit dat dit “‘n man na God se hart” sal wees.  En hiermee word alreeds in prinsiepe die groot verskil tussen Saul en Dawid aangevoer, die een wat God hierna gaan soek het.  Die verskil tussen Saul en Dawid is ‘n hart wat kan reageer op wat God sê en doen.  Dawid oortree eintlik meer eksplisiet die Tien Gebooie – moord en egbreuk – as Saul, en het net so baie huismoles as Eli en Samuel, maar keer telkens in berou na die Here toe, as dié hom aanspreek daaroor.  Dit is steeds wat God in my en sy kinders soek.

View all posts in this series

Samuel


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Comments (4)

  • God het Saul gekies as 'n man wat potensiaal gehad het en vir wie Hy 'n kans wou gee. En onthou, dit het aanvanklik perfek gewerk. Hy was nederig en dapper. Maar dit het nie gehou nie. En Saul het nie soos Dawid voor God gebuig nie. En dit was die groot verskil tussen Dawid en Saul. Die een het op God se woorde reageer, en die ander nie. Dit dui op 'n hart wat leerbaar is of nie. Dit is dus nie God wat 'n fout gemaak het met Saul nie, of nog erger hom opgestel het om te misluk as voorbeeld vir ons. Dit is Saul wat 'n fout gemaak het om die oordeel van God nie te aanvaar en om vergifnis te vra nie.

  • Akkoord broeder, lyk maar netso as verwys word na “Dawid wat 'n man na God se hart”sou wees, ons weet dat dit nie altyd so was nie! Toegegee, hy het telkens in sy swakheid voor God gebuig (Ps 51) en dit is inderdaad die verskil. Hoe het ons Meester op 'n keer gesê? Goed geantwoord! 🙂

  • Jy is reg – Dawid se verhaal is vol brak kolle, soveel so, dat ek soms regtig wonder hoe die Here dit uitgehou het met hom – gaan terug op sy woord deur die versoek om van Saul se nageslag uit te wis, toe te staan; is bang vir Joab en sy makkers, en tree nie op teen hulle nie, behalwe op sy sterfbed nie; en dan praat ons nie eers van die storie met Batseba nie. Maar dan besef ek, ek het nog meer brak kolle, en nie eers naastenby Dawid se dryfkrag nie … en die Here hou dit sover met my ook uit! Ek dink na alles sal ons ook soos Bill Hybels moet sê, dit is net God!

Maak 'n opmerking

%d bloggers like this: