Levitikus 12 – Rituele reiniging ná geboorte weens bloedvloeiing

Die polariteit van rein en onrein word ook in terme van geboorte, besnydenis, en bloedvloeiing beskryf met die gepaste offers wat as brandoffer en sondeoffer gebring moet word.  Let wel dat dit nie op ‘n intrinsieke onreinheid dui in terme van die vrou of haar kinders se menswees nie, maar net op die rituele onreinheid wat deur die offers herstel word op die voorgeskrewe wyse.

Sy mag dus nie aan die verrigtinge by die Tabernakel deelgeneem het voor die offers die weg daarheen oopgemaak het nie.  Die feit dat dié offers nie ‘n jaaroud lam hoef te gewees het nie, maar net twee duiwe, wys dat dié onreinheid van ‘n kleiner aard was as in die geval van konkrete sondes.  Dat dieselfde offers gebring is vir seuntjies en dogtertjies beteken dat beide geslagte as gelykwaardig beskou is.

Die onreinheid het met die uitskeidings van beide die geboorte as die bloedvloeiing te make, soos dit ook met menstruasie en ander uitskeidings die geval was (bv. Lev. 15:19 wat oor menstruasie gaan).  Die feit dat die tydperk van onreinheid verdubbel met die geboorte van ‘n dogter word egter nie verklaar nie.  Die besnydenis moes op die agste dag gedoen word, soos dit alreeds aan Abraham beveel is (Gen. 17:12).  Daarmee word kinders van die begin af ingesluit in die verbond met God.

Die totale tydperk van dié reiniging was veertig en tagtig dae onderskeidelik.  Die getal veertig het die betekenis van volheid gehad wat in dié geval waarskynlik ‘n aanduiding was van die tyd wat ‘n familie nodig het om die impak van die verandering wat ‘n geboorte in ‘n gesin gebring het, te verreken.  Dit was ook tot die voordeel van die vrou wat haar aandag by die kind kon bepaal.  Ook kon sy in dié tyd nie swanger raak nie, wat weer tot die voordeel van die kind was.

Dit is belangrik om te besef dat dit nie die geboorte self is wat die onreinheid teweeg gebring het nie, maar net die uitskeiding van bloed.  Kinders was beskou as ‘n geskenk en seën van die Here.  Dat daar versoening deur die offers vir haar gedoen is, is verder ook verbind aan die onreinheid van die bloedvloeiing, nie aan die geboorte self nie: “Dan sal sy rein wees van die bloedvloeiing wat sy gehad het.”

Boodskap: Jesus reinig nie net van bloedvloeiing nie, maar red ons vir sy koninkryk

In die NT is daar twee stories wat hiermee verband hou.  Die eerste is die moeder van Jesus wat Hom na die tempel bring na die veertig dae van die reiniging verby is en die voorgeskrewe offer van twee duiwe bring (Luk. 2:22-24).  Hulle kon nie ‘n lam bekostig nie.  Hy sou later self die Lam word wat geoffer word, maar nie vir sy eie of vir haar sondes nie, maar vir die sondes van die hele wêreld.  Maar om dít te kon doen, moes Hy self in elke detail die wet gehoorsaam in dié geval deur sy ma se gehoorsaamheid aan die wet.

Die tweede is die vrou wat aan bloedvloeiing gely het – waarskynlik een of ander probleem rondom menstruasie – wat aan die soom van Jesus se kleed geraak het en genees is van haar bloedvloeiing.  Hy neem daarmee nie net haar onreinheid weg deur haar te genees nie, maar red haar vir sy koninkryk (Mark. 5:25-34).