11 Nov2013
Openbaring 18 – Die oordeel oor Babilon-Rome bring bevryding vir die kerk van die eeue
Openbaring 18 gee nou sewe uitvloeisels weer van die oordeelsaankondiging van hoofstuk 17, ’n uitvloeisel van God se woorde oor Babilon-Rome – die verpersoonliking van die politieke en ekonomiese mag wat met godsdienstige begronding mense regoor die wêreld in hulle gemeenskapslewe beïnvloed het – wat nou hulle volledige doel bereik (17:17).
- Vers 1-3: ’n Sterk magtige en helder-skynende engel kondig die lot van Babilon-Rome aan, dat sy ’n demoniese skuilplek vir alles wat onrein is, geword het, omdat sy die nasies, konings en handelaars tot afgodery en afvalligheid mislei het. Haar invloed was destruktief oor ’n wye gebied: die gemeenskapslewe, die politieke lewe sowel as die ekonomiese lewe.
- Vers 4-8: ’n Ander stem, waarskynlik dié van God self of van die Lam, waarsku die Gods volk om niks met haar te doene te hê nie, sodat hulle nie ly onder haar oordeelslot nie. God bewys deur sy oordeel oor haar dat Hy regverdig is, deur haar dubbel en dwars vir haar onreg te vergeld. Ten spyte van die feit dat sy die naderende oordeel ontken, is haar val seker en onafwendbaar, omdat dit van God af kom. Let op die implisiete vergelyking met die toring van Babel (Gen. 11) waar die nasies probeer het om met hulle bouwerk die hemel te bereik. Hier is dit die sonde van die godsdienstig-polities-ekonomiese teenstand teen God wat opgehoop is tot aan die hemel!
- Vers 9-10: Die oordeel oor die politieke-ekonomiese-godsdienstige mag van Rome verstom die konings van die aarde.
- Vers 11-14: Die handelaars van die aarde treur oor haar, maar – soos ’n mens so verwag – veral oor die effek op die uitgebreide voordeel wat hulle self uit die handel met haar weelde en luukshede kon trek. ’n Wye reeks kosbaarhede word genoem, waaronder ook die slawe- en mensehandel gelys word. ’n Soortgelyke lys kom ook in Esegiël 27 voor.
- Vers 15-17: Die handelaars van hierdie dinge treur vêrder oor haar lot wat so vinnig en onverwags in onheil en oordeel verander het.
- Vers 18-20: Die hele verspreidingsnetwerk – elke stuurman, matroos en ander personeel van die skeepsindustrie – rou oor haar, maar interessant genoeg, gee tog ook erkenning aan die feit dat dit God is wat hiermee sy oordeel oor haar voltrek het. Hulle moedig dié wat in God se teenwoordigheid is en lewe: “Juig oor haar, hemel, heiliges, apostels en profete.” Die heiliges kan met die kerk van alle eeue verbind word, die apostels met die kerk van die NT en die profete met die kerk van die OT.
- Vers 21-24 – Een van die “sterk engele” gooi laastens ’n groot maalklip – een van die klippe wat deur donkies in die rondte getrek is om meel te maal (Du Rand) – in die see as simbool daarvan dat die groot stad Babilon-Rome neergegooi sal word en sal verdwyn soos ’n klip in die see. Daarmee is alle lewe uit haar gepers – geen musiekspelers, geen werkers, geen produkte, geen beduidenis van lewe, geen vreugde van menslike gemeenskap sal ooit weer in haar gehoor of gesien word nie. Die rede vir haar oordeel word uitgespel. Sy was die setel van die magtige sakelui van die aarde, maar sy het die profete (God se verteenwoordigers) en heiliges (God se mense) uitgewis en sommer op die koop toe ’n hele spul ander doodgewone mense op die aarde. Daarvoor word sy gestraf.
Dit dek die tafel vir die drie Hallelujas wat in hoofstuk 19:1-5 aangehef sal word, waarna die bruilof van die Lam sal aanbreek, juis met dié kinders van God wat deur die politiese en ekonomiese sisteme van die wêreld verguis is.
View all posts in this series
- Die Openbaring aan Johannes – Jesus Christus se testament en agenda
- Inleiding op Openbaring
- Openbaring 1 – Jesus Christus maak bekend wat hierna gaan gebeur
- Openbaring 2 – Bly getrou tot by die Wederkoms
- Openbaring 3 – Fokus op gemeenskap met Jesus
- Opsomming van Jesus se boodskap aan sy kerk
- Openbaring 4 – God word as Skepper in die hemelse troonsaal aanbid
- Openbaring 5 – Die Lam van God is waardig om God se agenda uit te voer
- Openbaring 6 – God se oordeel ontvou met ses seëls
- Openbaring 7 – God beskerm en versorg die kerk as geloofsgemeenskap
- Openbaring 8 – God hoor die gebede van die heiliges en verskerp sy verlossende oordeel
- Openbaring 9 – God se oordeel bring nie die mense tot bekering nie
- Openbaring 10 – Die kerk het die taak om die verlossing en die oordeel van God te verkondig
- Openbaring 11 – God beskerm sy mense en vestig sy heerskappy deur hulle getuienis
- Openbaring 12 – God beskerm sy kerk teen alle aanslae van die draak
- Openbaring 13 – God gee insig in die Bose se planne sodat gelowiges kan volhard in geloof
- Openbaring 14 – Die oes van gelowiges en ongelowiges word ingesamel
- Openbaring 15 – Die oordeel breek onafwendbaar aan
- Openbaring 16 – God se oordeel tref die hele kosmos en vernietig Rome
- Openbaring 17 – Die omvang van Rome se bose invloed op die nasies word ontbloot
- Openbaring 18 – Die oordeel oor Babilon-Rome bring bevryding vir die kerk van die eeue
- Openbaring 19 – Gelowiges jubel oor die bruilofsfees van die Lam en God se regverdige oordeel en uitwissing van die Bose
- Openbaring 20 – Die oordeel oor die Satan baan die weg vir die bekendmaking van die mense in die Boek van die Lewe
- Openbaring 21 – God skep hemel op aarde vir sy volk, die Nuwe Jerusalem
- Openbaring 22 – God bring lewe en genesing – Die Here Jesus is op pad terug
- Opsomming van die boodskap van Openbaring
- Gemeentes in die weegskaal
- Pinkster 2020 – “Ek kom gou!”
- “Ek kom gou” – ‘n boek oor Openbaring deur Chris van Wyk
Tags: Openbaring
Trackback from your site.
Chris van Wyk
| #
Ek het die volgende navraag gekry wat ek graag hier beantwoord:
* Na wat verwys die teken op die hand en die voorkop wat nodig is om te koop en verkoop, maar nie bestem is vir Christene nie. Beteken dit gelowiges het nie toegang tot of baie min benodighede nie.
* Babilon word voorgehou as die stad van sonde. Nadat die stad geval het met die splitsing is alles verwoes en toe weelater opgebou. Word Rome not stees as `n stad van sonde gesien.
* Die 12 stamme van Israel is volgens die Bybel God se premêre volk en word hulle weer teen die einde genome, wat wys God hou by Sy belofte. Maar wat nou van bv. Engeland, Duitsland Afrika en die res van die wêreld?
My antwoord:
* Die teken op die hand en die voorkop staan vir die denk- en werkvermoë van die mensdom wat in diens van die bose driemanskap geplaas word (Du Rand). Dit beteken dan ook dat dít die manier is waarop gelowiges van die ekonomie uitgesluit kan word, as hulle nie aan die heersende godsdienspraktyke wil deelneem nie, soos reg deur die eeue gebeur het in lande waar dit verbied word om die Here Jesus te dien en volg. Dit gaan dus oor pogings om gelowiges ekonomies te isoleer. Wie hierin insig het, kan planne maak om die dier se invloed minder te maak.
* Rome en die Romeinse ryk is vir my die eerste vervulling van die betekenis van die stad Babilon, wat inderdaad vir die mense van Openbaring se tyd ‘n konkrete betekenis gehad het. Maar enige ryk wat godsdienstig, polities, en ekonomies téén God en téén gelowiges se belange werk, kan ook met Babilon verbind word. So Rome is nie meer die stad van sonde nie, want hulle mag is lankal gebreek.
* Die 12 stamme WAS God se primêre volk. Volgens die NT is die kerk nou die primêre volk van God (Gal 6:16). God hou te alle tyd se belofte dat as die Jode in Christus glo, word hulle in sy koninkryk en as deel van sy volk ingesluit. Maar, dit is nie waar vir hulle buite Christus om nie. Dit is ook hoe alle ander nasies ingesluit is in God se genade – in Christus.
Reply