Tag: Wie is God?

Hoe meer die sonde geword het, hoe oorvloediger het God se genade geword. Die gevolg hiervan is dat net soos die sonde oor almal regeer het en die dood oor hulle gebring het, God se genade nou regeer. Dit laat ons nou as regverdiges voor God staan, en loop uit op die ewige lewe wat ons deur Jesus Christus ons Here sal ontvang. (NLV)

1. Paulus beklemtoon met verwysing na Adam die universele impak van die sonde. Hy beklemtoon terselfdertyd die universele impak van die vryspraak in Christus. Hoe dink jy daaroor?

2. Adam is die oorsprong van die menslike geslag. Christus is die oorsprong van die nuwe menslike geslag. Deur Christus voer die genade nou heerskappy eerder as die dood met die heerlike vooruitsig dat dit tot die ewige lewe lei. Hoe raak dit jou? 

3. Lees die verse later vandag weer om jou te herinner daaraan dat God se genade heerskappy voer in jou lewe. Hy maak jou regverdig en gee jou die ewige lewe.

4. Jy kan later vanaand die gedeelte weer lees in die konteks van Romeine 5 sowel as my bydrae daaroor:Romeine 5 – Vryspraak lei tot vrede en vrye toegang.

Johannes se pa, Sagaria, is hierna met die Heilige Gees vervul en het as profeet gesê: “Prys die Here, die God van Israel, want Hy het sy volk opgesoek en hulle gered. Hy het vir ons ’n magtige Redder gestuur uit die koninklike geslag van sy dienaar Dawid, soos Hy lank gelede deur sy heilige profete beloof het.” (NLV)

1. Sagaria bars uit in ‘n loflied uit en prys die Here vir die redding deur Jesus wat die langverwagte belofte van die Messias nou in vervulling laat gaan. Hoe versterk hierdie vervulling van ‘n eeueoue belofte jou geloof in God? 

2. Dit is ook duidelik dat ‘n mens op God se beloftes kan vertrou. Hy doen wat Hy sê. Hoe laat dit jou voel oor God?

3. Lees die verse later vandag weer om jou te herinner daaraan dat jy op God se beloftes kan vertrou. Hy red ons van ons sondes.

4. Jy kan later vanaand die verse weer lees in die konteks van Lukas 1:57-80 en my bydrae daaroor:Lukas 1:57-80 – God se lig rig ons voetstappe op die pad van vrede.

Petrus en die ander apostels het in reaksie hierop gesê: “Ons moet eerder aan God gehoorsaam wees as aan mense! Die God van ons voorouers het Jesus uit die dood opgewek nadat julle Hom vermoor het deur Hom te kruisig. God het Hom verhoog tot Leier en Verlosser in die regeerposisie reg langs Hom. Hy het dit gedoen om Israel tot inkeer te bring sodat hulle vergifnis van sonde kan ontvang. Óns is getuies hiervan, ons en die Heilige Gees wat God gegee het aan dié wat aan Hom gehoorsaam is.” (NLV)

1. Petrus en die ander apostels ervaar toenemend groot teenstand van die Joodse leiers. Dit is duidelik dat die teenstand kom van mense wat die lig van God nie kan verdra nie. Tog volhard die apostels met die verkondiging van die goeie nuus ten spyte van die teenstand. Hoekom?

2. Die apostels word nie net deur hulle gehoorsaamheid aan God gedryf nie, maar ook deur die hoop dat hierdie leiers tot inkeer sal kom. Wat tref jou daarvan? Hoe kan jy dit navolg?

3. Lees die verse later vandag weer om jou te herinner aan die feit dat die Here van jou gehoorsaamheid verwag. Maar ook dat jy ‘n getuie is van die goeie nuus wat vir almal betekenis kan hê.

4. Jy kan later vanaand die verse weer lees in die konteks van Handelinge 5 en my bydrae daaroor:Handelinge 5:1-6:7 – Die kerk groei in heiligheid en helende krag.

1.  Dink jy dat God sonde en afgodery regtig straf? In hierdie lewe? In die toekomstige lewe? Hoekom? Hoe kan ‘n mens die straf ontwyk en in God se guns kom?

2. Lees my antwoord op die vraag en oordink dit.

Ja, deur die grenslose genade van die Verlosser. Hy dra die straf vir die sonde en gee my vergifnis van sonde. Ek kan myself nie verlos nie, want God wil aan geen ander skepsel die sondeskuld wat ek gemaak het, toereken nie; en geen gewone skepsel kan die las van die ewige toorn van God teen die sonde dra en ander skepsels daarvan verlos nie.

3. Sonde en afgodery is nie kinderspeletjies nie. Dit laat God se toorn ontvlam en bring straf oor almal wat hulle teen Hom verset. Dit is persoonlik. Dit is werklik. Hoe laat dit jou voel oor God?

4. Lees die verhaal van die giftige slange in Numeri 21:1-9. Wat tref jou?

5. Lees my opsomming van die boodskap daarvan en oordink dit.

Die verhale in die Ou Testament is voorbeelde vir ons. Ten spyte van gebedsverhoring kla die volk weer oor kos en water. Hulle sondig teen die Here en teen Moses. Die Here stuur as straf giftige slange onder hulle. Die volk bely hulle sonde en bid dat die Here die slange sal wegvat. Die Here laat Moses ’n afbeelding maak van ’n giftige slang bo-op ’n paal. As ’n slang iemand gepik het, het hy na die bronsslang gekyk en bly leef. Jesus verwys in die Nuwe Testament na dié verhaal. Hy dra aan die kruis die straf vir die sonde. Hy vergewe ons sonde.

6. Die verhaal van die giftige slange demonstreer dat God se straf werklik en persoonlik is. Maar, die giftige slange is gelukkig ten diepste God se manier om die volk te keer van hulle opstand teen Hom en sy pad vir die lewe. God wil hulle help om die pad van verlossing te ontdek, en só deur sy werk in hulle, aan Hom gehoorsaam te word. Watter boodskap het dit vir ons vandag?

Die verhaal van God se ingrype met ‘n nuwe begin vir Noag, sy familie en nageslag wys op uitnemende wyse die karakter van God.

God se droefheid oor die mensdom se bose gedagtes en gedrag gaan oor in genade as Hy iemand vind met wie Hy die pad met die mens vorentoe kan loop, al sou hulle Hom ook telke male teleur stel … totdat Hy in sy eie Seun die perfekte antwoord vir die dilemma van menswees vind.

Lees gerus die vier hoofstukke van Noag se lewe in Genesis 6-9

• Genesis 6 – God is bedroef dat Hy die mens gemaak het, maar begenadig Noag
• Genesis 7 – Ek het jou gesien en bevind jou regverdig
• Genesis 8 – Toe het God gedink aan Noag en al die diere in die ark
• Genesis 9 – God sluit ‘n verbond met alle lewende wesens