Romeine 15-16 – Aanvaar mekaar soos Christus julle aanvaar het
Let op hoe Paulus hierdie praktiese deel nou koppel aan die voorbeeld van Christus (15:1-6), wie se evangelie ’n impak op alle nasies het (15:7-13), waarvoor Paulus sy lewe gegee het (15:14-21) en wat hy wil afrond deur hulle te besoek (15:22-33).
15:1-6: Soos Christus nie aan Homself gedink het nie, moet dié wat sterk is in geloof die swakhede verdra (grondteks sê dra) van dié wat nie sterk is nie. Soos Christus Hom ingestel het op wat ons kan bou in die geloof, só moet ons dit ook vir medegelowiges doen. Dít doen Hy, en dít moet ons doen, sodat daar eensgesindheid onder die gelowiges kan wees.
15:7-13: Die belangrikste ding wat ons vir mekaar kan doen, is om mekaar te aanvaar, weereens soos Christus dit gedoen het. Soos Hy persoonlik gekom het om die Jode te dien, so het Hy bedoel dat alle nasies die boodskap kon hoor, onder andere deur die bediening van Paulus. Let op hoe Paulus uit vier OT gedeeltes aanhaal: Ps 18:50; Deut 32:43; Ps 117:1; Jes 11:10 en dit universeel interpreteer.
15:14-21: Let op hoe beskeie Paulus is teenoor die Romeinse gelowiges en half verskoning vra vir sy uitgesprokenheid (anders as met die Korintiërs!), maar tog trots is op die bediening wat God aan hom toe vertrou het. Alle lof kom in elk geval God toe wat wonderlike dinge deur sy bediening gedoen het.
15:22-33: Hy hoop heel moontlik om Rome te besoek om as ’n soort tuisbasis vir hom te dien op sy droom om ook in Spanje die evangelie te gaan verkondig. Hy vra dat hulle vir hom bid dat dit goed sal gaan in Jerusalem met sy voorgenome besoek daar, hoewel ons uit die verhaal van Handelinge kan agterkom dat dinge nie regtig so maklik vir hom uitgewerk het nie. Hy is uiteindelik in boeie na Rome en het 2 jaar in die tronk daar gespandeer. Die tradisie wil dit hê dat hy uiteindelik wel in Spanje uitgekom het, maar dit kan nie met sekerheid bewys word nie.
Hoofstuk 16: Paulus sluit die brief aan die Romeine in hoofstuk 16 af deur ’n hele klomp persoonlike groeteboodskappe aan ’n verskeidenheid mense, waarvan sommige verwysings waarskynlik na die (meer as 5) huiskerke verwys (5, 10, 11, 14, 15). Let op dat Priscilla eerste genoem word (4 keer uit die 6 keer wat hulle genoem word in die NT, is dit die geval) wat waarskynlik aandui dat sy die leier was. Hulle was vermoënd en het in ’n hele paar gemeentes hul huise tot die gemeente se beskikking geplaas. Rufus was moontlik die seun van Simon van Sirene (Mark 15:21).
Waarskynlik het Febe die brief gaan aflewer, sy was immers ’n leraar in die gemeente van Korinte waarvandaan Paulus die brief skrywe.
View all posts in this series
- Die brief aan die Romeine - October 20, 2010
- Romeine 1 – God spreek mense vry enkel en alleen omdat hulle glo - October 21, 2010
- Die wet in die 3 Formuliere van Eenheid
- Romeine 2 – Die innerlike lewe lei na goeddoen eerder as die wetsvoorskrifte - October 22, 2010
- Romeine 3 – God gee vryspraak sonder onderskeid aan elkeen wat glo - October 25, 2010
- Romeine 4 – Die genade van geloof - October 26, 2010
- Beoefen vandag Lectio Divina - October 27, 2010
- Romeine 5 – Vryspraak lei tot vrede en vrye toegang - October 28, 2010
- Romeine 6 – Om vir God te lewe en nie vir die sonde nie - October 29, 2010
- Romeine 7 – Die Gees is die agent van verandering, nie die wet nie - November 1, 2010
- Romeine 8:1-17 – Die Gees getuig saam met ons gees dat ons kinders van God is - November 2, 2010
- Romeine 8:18-39 – As God vir ons is, wie kan teen ons wees - November 3, 2010
- Romeine 9-11 – Die Jode se volle getal sal gelowig word - November 4, 2010
- Romeine 12 – Ons het ’n paar kopskuiwe nodig - November 5, 2010
- Romeine 13 – Julle moet mekaar liefhê - November 8, 2010
- Romeine 14 – Aanvaarding eerder as argumente - November 9, 2010
- Romeine 15-16 – Aanvaar mekaar soos Christus julle aanvaar het - November 10, 2010
- Die fundamentele vertrekpunt in etiese sake - September 9, 2017
- Word verander deur die vernuwing van julle gemoed - June 13, 2018
- Uitverkiesing en die eindoordeel - September 6, 2018
- Delf dieper deur Romeine - January 17, 2025
Discover more from Bybelskool
Subscribe to get the latest posts sent to your email.
Titus Edward
Hi ds . Ek graag weet is gay wees verkeerd of reg . Ek het familielede wat gay is. Groete jongman in die overberg
Chris van Wyk
Hi Titus
Romeine 15-16 sê dat ons almal moet aanvaar soos hulle is. Dit sluit gay mense in. Om aangetrokke te wees tot mense van dieselfde geslag as jyself is iets wat die meeste mense in elk geval nie kies nie. Hulle kom meesal op ‘n punt agter dat dit so is. Soos ons enige ander mens verwelkom en liefhet en insluit binne die geloofsgemeenskap, geld dit ook selfdegeslag aangetrokke persone. Gay wees is dus nie verkeerd nie.
Die staat gaan nog verder in ons land en keur selfdegeslag burgerlike verbintenisse goed op grond van ons grondwet.
Ek glo egter dat die beoefening van selfdegeslag seks buite die raamwerk van die Bybelse getuienis daaroor val, en dat selfdegeslagverhoudings dus nie op Bybelse gronde geregverdig kan word nie. Die Here Jesus het geleer dat almal wat nie in ‘n huwelik is nie, selibaat moet lewe (Matteus 19). So ook Paulus (1 Korintiërs 5-7). Hulle het albei ook ter wille van die koninkryk gekies om selibaat te lewe, d.w.s. sonder ‘n seksuele verhouding.
Ek het al baie daaroor geskryf en kan dus meer hieroor sê, maar ek vermoed jy soek ‘n kort antwoord.
Titus
baie dankie , is daar maybe n webtuiste oor spesifieke onderwerp wat ek meer kan oor lees .
Chris van Wyk
Hi – jy kan by die volgende webtuiste ‘n hele paar bronne oor selfdegeslag aangetrokkenheid kry: http://www.livingout.org. Ek kan ook twee boeke aanbeveel, waarvan jy my kort opsommings hier kan aflaai.