Psalm 96 – Sing en getuig tot eer van die Regeerder en Regter van die aarde

Psalm 96–100 fokus baie spesifiek op die koningskap van die Here, iets wat nie net geld vir sy volk in terme van die verbond nie, maar vir almal op die aarde, omdat Sy heerskappy ook ’n universele betekenis het.

Die Psalm het twee duidelike dele:

• Sing en getuig tot eer van die God van die gode – vers 1–6
• Prys die Regeerder en Regter van die aarde – vers 7–13

Sing en getuig tot eer van die God van die gode – vers 1–6

Let op hoe God se reddingsdade in die geskiedenis sowel as sy skeppingsmag in terme van die heelal as motivering vir die lof aan Hom beskryf word.  Dit is die diepste motivering vir die getuienis aan alle mense op die aarde.  Dit is ook waarom almal opgeroep kan word om Hom te loof en prys en van Hom te getuig.

Vier keer word almal op die aarde in vers 1–2 opgeroep om ’n nuwe lied tot eer van God te sing/prys, en dan word dit aangevul met ’n oproep om God se reddingsdade te verkondig, en Sy Majesteit onder die nasies bekend te maak (2014 vertaling – 1983 het “vertel die nasies van sy mag”).  Dit is direkte opdragte wat God gee aan dié wat Sy naam oor hulle lippe neem, dié wat bely dat hulle aan Hom behoort.  Lofprysing en getuienis gaan saam.  Dit is twee kante van dieselfde munt.

In vergelyking met God is die gode van die volke niks nie, want God troon bó hulle uit in terme van sy skeppingsmag en Sy Majesteit, luister, krag en die glans van sy teenwoordigheid wat die heiligdom in Jerusalem vervul.

Prys die Regeerder en Regter van die aarde – vers 7–13

Daarom word almal wat op die aarde woon, letterlik “families van volke” (vers 7) opgeroep om die Here te erken, aan Hom dankoffers te bring (vers 8) en in aanbidding voor Hom te buig (vers 9) en oral te getuig van sy teenwoordigheid en heerskappy (vers 10).  Die “families van volke” dui op die subverdelings in nasies, die “tribes” of subgroepe wat daar in elke samelewing voorkom.  Hulle word daarom as sodanig erken, maar ook opgeroep om saam die Here te dien.

Let op hoe drie belangrike konsepte in vers 10 gebruik word om God se karakter en betekenis te teken: sy soewereiniteit (regeer), stabiliteit (“die wêreld staan vas”) en billikheid (“regverdig oordeel”).

Hierdie beskrywing van God het nie net betekenis vir die mense op aarde nie, maar ook vir die hele heelal.  Daarom word die hemele en die aarde, die see en alles daarin, die veld en alles daarop, selfs die bome in die bos opgeroep om hulle in God te verheug, want Hy is op pad om sy heerskappy te vestig sodat daar inderdaad stabiliteit, regverdigheid en billikheid op aarde sal wees.

Psalm 96 in 1 Kronieke 16

Ons tref Psalm 96 in sy geheel ook aan in 1 Kron. 16 waar dit as ’n keurspel van lofliedere – saam met dele uit Psalm 105 en 106 – gebruik word in die feesviering met die tuiskoms van die ark in Jerusalem in die tyd van Dawid.  Die Kronis gebruik ‘n deel van die verhaal in 2 Samuel 6 daarvoor en voeg daarby ‘n keurspel uit die drie Psalms (in hierdie volgorde: Ps. 105:1–15; 96:1–13; 106:47–48) met die titel “Loof die Here”, wat Dawid vir Asaf en sy ampsgenote die eerste keer laat uitvoer het by die geleentheid.

Lees hier meer wat ek vroeër daaroor geskryf het: 1 Kronieke 16-17 – Dawid vier die tuiskoms van die ark en ontvang omvattende seën van God.

Boodskap van die Psalm

Psalm 96 roep die volk van die Here, trouens alle mense, op om die Here te prys.  Hoekom?  Want Hy kom om oor die hele aarde te heers. Die motivering daarvoor word in sy skeppingswerk sowel as sy reddingsdade in die geskiedenis gevind.  Dít, sê die Psalmis, moet aan al die nasies verkondig word  sodat hulle hulle eie gode, wat in elk geval nie gode is nie, kan verlaat en ook van God se onwankelbare koningskap kan sing.  Dié God is aan die kom om oor die aarde te heers met regverdigheid en billikheid, en Israel se getuienis moet die pad vir God onder die nasies gereed maak.

Ek juig ook vandag oor God se regverdigheid en billikheid, en ek bid dat Hy sal kom om oor die aarde te heers, soos Hy hier in vers 13 belowe.  En dit is iets wat ek saam met die kerk aan alle mense wil verkondig.  Saam met die Gees en die bruid, roep ek in die woorde van Openbaring 22:17 aan almal uit:  “’Kom!’  En laat elkeen wat luister, sê: ‘Kom!’  En laat elkeen wat dors het, kom.  En laat elkeen wat dit begeer, die water van die lewe kry, verniet!”