Inleiding op die 4de Psalmboek: Psalms 90-106

Die 4de Psalmboek , Psalms 90-106, fokus op die feit dat Jahwe reg deur die eeue getrou gebly het aan die volk van Israel ten spyte van die problematiek van die Dawidiese koningshuis en die volk se voortdurende ongehoorsaamheid.  Dit eindig met ’n appèl aan Jahwe om die ballinge weer terug te bring na Jerusalem, soos dit in Ps. 106:47 uitgespel word. 

Dié tema van God se getrouheid deur die geslagte word onder andere bevestig deur die eerste Psalm in die reeks, Psalm 90, wat ’n Psalm van Moses is.  Uiteraard kom dié Psalm waarskynlik uit ’n vroeër tyd, maar word hier reg aan die begin geplaas om hierdie tema van God as toevlug van geslag tot geslag in te lui: “Here, U was vir ons ’n toevlug van geslag tot geslag.” (Ps. 90:1).

Aan die einde van die 4de Psalmboek word weereens die verhaal van Moses en die volk in die twee laaste Psalms, Psalm 105 en 106, aangeroer, waarmee die tema van God se getrouheid as’t ware omgeklink word: “Hy hou sy verbond altyd in stand” (Ps. 105:8) en “aan sy liefde is daar geen einde nie!” (Ps. 106:1). Soos God aan Dawid getrou was, só was Hy inderdaad reeds getrou van Moses af, wat die hoop op die terugkeer uit ballingskap vir die volk lewend hou.

Dit is waarom Psalm 91 so baie maak van die oproep om by die Allerhoogste skuiling te vind (Ps. 91:1), om vir Hom te sê: “U is my toevlug en my veilige vesting, my God op wie ek vertrou.” (Ps. 91:2).  En ons sal goeddoen om hierdie oproep te gehoorsaam!

Hier is veral Lofpsalms wat God se redding en koningskap besing, want: “Dit is goed om die Here te loof, om u Naam te besing, Allerhoogste, om elke môre van u liefde te getuig en elke aand van u trou … U groot dade, Here, het my baie bly gemaak, ek wil juig oor wat U doen, Here … Wie dit nie besef nie, is ’n dom mens.” (Ps. 92:2-7).

Die 4de Psalmboek in sy geheel, gegewe die koppeling met die tyd van die ballingskap, help ons ook om te verstaan dat selfs in ’n tyd wat jy swaarkry, ’n mens blydskap in die teenwoordigheid van die Here kan beleef deur lofprysing.

Fokus dus in jou lees van hierdie Psalms om te doen wat dit van jou vra:

  • Kom, laat ons jubel tot eer van die Here, laat ons juig oor die rots by wie ons redding vind.” (Ps. 95:1)
  • Sing ’n nuwe lied tot eer van die Here, sing tot eer van die Here, almal op aarde!” (Ps. 96:1)
  • Die Here regeer, die aarde moet juig, al die baie eilande moet bly wees!” (Ps. 97:1)
  • Sing ’n nuwe lied tot eer van die Here, want Hy het magtige dade gedoen.” (Ps. 98:1)
  • Juig tot eer van die Here, almal op aarde!  Dien die Here met blydskap!  Kom voor Hom met gejubel!  Erken dat die Here God is: Hy het ons gemaak en ons is Syne, ons is sy volk, sy eie kudde.  Gaan sy poorte binne met dankliedere, sy tempel met lofsange, dank Hom, prys sy Naam, want die Here is goed, aan sy liefde is daar geen einde nie, sy trou duur van geslag tot geslag.” (Ps. 100)

Vandag kan jy sommer dié laaste Psalm, Psalm 100, met jou saamneem.  Dit word regdeur die wêreld gesing.  Leer dit uit jou kop uit en sing en neurie dit om jou aan God se goedheid te herinner, voor ons môre by Psalm 90 begin lees.

Psalms


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Maak 'n opmerking

%d bloggers like this: