Prediker 6:10-7:29 – Die soeke na selfverwesentliking

Vers 10-12 kan ook as ‘n skarnier gedeelte beskou word.  Dit sluit die vorige perikoop af waarin die Prediker die soeke na welvaart beskryf het.  Dit begin egter ook ‘n nuwe deel waar die soeke na selfverwesentliking beskryf word, en ‘n aantal feite, onveranderlikhede, maar hierdie keer bitter min vreugdes genoem word, behalwe die relatiewe waarde van wysheid, veral as dit met ‘n bietjie besit kan saamgaan!

6:10-12 – Wie weet wat vir die mens goed is?

Die mens se relatiewe onmag om iets aan sy lot te verander, word onomwonde gestel, veral in vergelyking met God en in terme van die wagtende dood.  “Wie weet wat vir die mens goed is …?

Wat goed is

Van die goeie goed wat die Prediker noem, waarin jy jouself kan vind, is die volgende:

  • ‘n Goeie naam, wat natuurlik eers na jou dood regtig ongeskonde kan wees – 7:1
  • Vermaning deur ‘n wyse – 7:5
  • ‘n Voltooide taak, want dit is beter as een wat pas begin is – 7:8
  • Geduld, want dis beter as hoogmoed – 7:8
  • Wysheid saam met besittings, want dit is ‘n baie groot voordeel – 7:11-12
  • Blydskap oor voorspoed sowel as aanvaarding van teëspoed wat ‘n wyse manier van lewe met erkenning van God se beheer is – 7:14
  • Wysheid, want dit is mag – 7:19

Wat sleg is

Van die slegte goed wat die Prediker noem, en wat jy moet vermy, is darenteen die volgende:

  • Afpersing, want dit laat mense dwaas optree – 7:7
  • Omkoopgeskenke, want dit vernietig goeie oordeel – 7:7
  • Om gou kwaad te word, want dit is dwaas – 7:9
  • Om die “ou dae” te verheerlik asof dit beter as die hede is … want dit is nie (die Prediker het dit eerste gesê!) – 7:10

Wat baie erg is

Van die slegte goed wat die Prediker noem, en wat net te erg vir woorde is, is die volgende:

  • Regverdiges wat onder gaan, al doen hulle reg – 7:15
  • Goddeloses wat ‘n lang lewe geniet, al doen hulle verkeerd – 7:15
  • Dat God die mense goed en opreg gemaak het, maar hulle hulle besig gehou het met allerlei slimmighede – ‘n baie ontstellende maar raak beskrywing van die menslike toestand – 7:29.

Daaroor kan ‘n mens eintlik maar net ween … en weereens vasgryp aan die Paasboodskap van Jesus Christus wat juis hiervoor gesterf en opgestaan het, om ons nuwe mense te maak!

Eerlikheid en verstandigheid

Die manier om sulke dinge te hanteer, veral as jy diep bewus raak van die wispelturigheid van die lewe, is om jou nie anders voor te doen as wat jy is nie.  Daar is in elk geval niemand wat net goed doen nie en nie sondig nie (7:20).  Maar, dit beteken darem ook om verseker nie aan te hou om verkeerd te doen nie (7:17)!  Dit is eintlik die diepste dwaasheid, sê die Prediker, om goddeloos en onverstandig op te tree (7:25), veral om jou deur bekoorlikheid te laat vang en met ongeoorloofde verbintenisse te sondig (7:26-27).

Erken God

Tussendeur is daar die werklikheid van God se teenwoordigheid, wat erken en in berekening gebring moet word:

  • God is sterker as ons, só om met Hom in ‘n stryd te raak – miskien dink hy aan persone soos Job in hierdie wêreld –  is van die begin af gedoem – 6:10.
  • Wat Hy krom maak, kan ons nie reguit maak nie – 7:13.
  • Die betekenis van wat gebeur, lê buite bereik, baie diep; wie kan dit vind – 7:23-24.

‘n Stukkie lewenswysheid:

  • Moenie jou steur aan alles wat gesê word nie … goeie raad – 7:21

eerlikheid, Prediker, selfverwesentliking, wysheid


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Comments (3)

  • Hi Chris,
    Dis vir my so wonderlik dat God ons soekend geskep het, na `n godheid, Homself.
    As ons God dan aanneem neem ons ook al Sy verordeninge, beloftes, gebooie aan.
    Daarmee saam kom insig en gehoorsaamheid:
    I. Soek eers die koningkryk van God…..
    2. Jy moet jou naaste life hê soos jou self
    3. Julle moet werk sodat julle nie andeer `n Las is nie maar ook vir die armes kan gee
    4. As julle kos en klere het, het julle genoeg,
    5 . Wie ons naaste is en so veel meer.
    As ons eers verstaan dat alles van God is en aan Hom behoort en dat ons in Sy diens staan
    En dus elke dag met Hom moet konsulteer, Dan eers kan ons die vreugde en vrede ontvang in oorvloed wat Hy belowe het. Dan maak die lewe sin.

Maak 'n opmerking

%d bloggers like this: