Riglyne vir die lees van Handelinge

Let op vir die volgende aksente van Lukas in Handelinge:

Let op vir die volgende aksente van Lukas in Handelinge:

Die verhaal is steeds oor Jesus, soos die inleiding in hoofstuk 1-2 aandui.

  • Lukas verwys terug na Johannes die Doper, die krag van die Heilige Gees en die hemelvaart.  Die implikasie is duidelik: die bediening van Jesus moet voortgesit word deur die getuienis van Jesus se volgelinge.
  • Groot toesprake word regdeur Handelinge gespasieer, deur Petrus, Stefanus en Paulus wat telkens die essensie van Jesus aan die wêreld-gehoor getuig.

Daar is ‘n onlosmaaklike verband tussen Jesus en die Gees – en die Gees is uiteindelik verantwoordelik vir elke groot draaipunt in die verhaal.

  • Soos Jesus die Gees as gawe van die Vader ontvang het vir sy bediening, so is die Gees nou die gawe van Jesus aan die kerk om sy bediening van redding voort te sit (2:33).  Jesus die draer van die Gees, doop nou met die Gees sodat ander die gawe van die Gees kan ontvang.

Die evangelie is God se saak – en niks kan dit verhinder nie!

  • Niemand kan God se redding keer nie –
  • nie die Joodse leiers nie (5:39 “as dit van God kom, sal julle hulle nie kan keer nie”);
  • nie die ongelowige Jode nie (9:1 “Saulus het soos ‘n besetene voortgegaan om die volgelinge van die Here te dreig”);
  • nie die kerk in Jerusalem nie (11:17 “Wie was ek dan om God te probeer verhinder?” sê Petrus oor die bekering van Kornelius);
  • nie die sekulêre leiers nie (12:23 “Herodes is deur wurms verteer” soos ook deur Josephus beskrywe);
  • nie die Judaïseerders in die kerk nie (15:10 ”Waarom wil julle dan nou God se geduld op die proef stel …?”);
  • nie die godsdienstige en sekulêre teenstand van die Grieke nie (hfst. 16 – die stadsbestuur in Filippi en hfst. 19 – die godsdienstige handelaars in Efese);
  • nie skipbreuk of slange nie (hfst. 27-28).
  • Daarom sluit die boek af met die opmerking dat Paulus ‘n volle twee jaar lank met die grootste vrymoedigheid en sonder enige verhindering die koninkryk van God kon verkondig en die mense ales oor die Here Jesus Christus geleer het!

Die evangelie versprei horisontaal na die heidene – dié wat deur die Joodse eksklusiwiteit gemarginaliseer is (anders as in die eerste verhaal waar die vertikale impak van die evangelie op alle Jode vertel word).

  • Die Jode bly uiteraard steeds ontvangers van die goeie nuus.
  • Die sinagoges bly ook die primêre plek van waar af die evangelie versprei is.
  • Paulus pleit tot aan die einde van die verhaal by Jode om tot inkeer te kom.

Die kerk word al hoe meer saamgestel uit gelowiges uit die heidense volke – terwyl die Jode in die diaspora en die Joodse leiers in Jerusalem die teenstand aanvuur.

Die “ons” in die verhaal in 16:10-17 (Troas) en weer in 20:5 (Troas) tot in 21:19 (Jerusalem) en dan weer by 27:1-28:16 (van Sesarea tot in Rome).  Dit is Lukas as ooggetuie wat hier skryf en die detail is volop en lewendig (moontlik ‘n joernaal?).

Handelinge, Lukas


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Comments (2)

  • Hallo Chris
    ek het geruime tyd gelede ingeteken op die Studie kursus maar moet eerlik bely dat ek nog nooit daarby uitgekom het nie. ek glo en getuig met my hele hart dat Jesus my verlosser is en die Seun van God maar ek vind dat ek sukkel om vir lank te lees sonder dat my gedagtes dwaal. nadat ek dan ‘n hele hoofstuk gelees het weet ek nie wat daarin staan nie. ek vind dit baie makliker om na ‘n Prediker te luister wat oor ‘n sekere onderwerp praat en dan tekse aanhaal om dit te staaf. alhoewel ek nog nooit gevoel het dat ek met die Heilige Gees gedoop is nie (ek is kleintyd in die NG Kerk gedoop en is nou al 67) voel ek elke dag meer en meer die begeerte om soos Jesus te leef en God se Wil te doen. dit maak dat daar verskille tussen my en my man kom want hy verstaan nie dat ek graag ‘n tiende wil gee nie. ek het nie ‘n inkomste nie. maar het Jesus nie duidelik gestel dat Hy sulke verskille (onenigheid) tussen mense sal bring nie? ek glo ook dat God die regering in die land daarstel en dat ons gehoorsaam aan die landswette moet wees maar dat ons elke dag moet bid dat daar ook herlewing in hulle harte sal plaasvind. ek het ook gelees dat ons ernstig moet bid voor ons gaan stem en dat die HG aan ons moet openbaar vir wie ons moet stem. ons moet nie na kandidate se mooi reklame luister nie. my man glo weer as jy wit is stem jy vir ‘n wit regering en as jy swart is vir ‘n swart regering. wat is wit en wat is swart. dit voel vir my net asof my lewe deurmekaar gekrap is vandat ek heilig probeer leef want my man glo nie dat ‘n mens heilig kan wees nie. sê Jesus dan nie uitdruklik “wees Heilig, want Ek is Heilig” nie? vir my beteken dit om my te distansieer van dinge wat my in versoeking kan bring om kwaad te doen. is ek reg? sal ek werklik hierdie Heiligmaking beleef as ek my laat groot doop? ek wil so graag vir Jesus dien omdat ek Hom liefhet en nie net omdat ek Hom nodig het nie.

    Helene

    • Hallo Helene – die groot doop sal jou nie heiliger maak nie, net n innige verhouding met Jesus Christus self. Volhard met jou lees van die Bybel, wees gehoorsaam aan die lig wat jy ontvang, en heiligmaking sal deur God self vir jou gegee word. Groete, Chris

Maak 'n opmerking

%d bloggers like this: