Thabiti Anyabwile | Gospel Freedom, Gospel Fruit | Galatians 5

Written by Chris van Wyk. Posted in Galasiërs

Thabiti Anyabwile het by die onlangse internasionale konferensie “Geen Ander Evangelie” die volgende praatjie gelewer oor  Gospel Freedom, Gospel Fruit.  Dit handel oor Galasiërs 5.   Jy kan dit hier luister.  Ek gee ‘n kort opsomming daarvan.

Paulus begin om prakties te raak en die toepassing van sy uitleg van die evangelie uit te spel.

Moenie deur die wet gevang word om bv. die besnydenis as ‘n praktiese geestelike dissipline na te volg nie, want dan sal jy van die genade van die Here afvallig raak.  Self net een klein dingetjie soos die besnydenis kan jou terugplaas in ‘n mindset om jouself te regverdig voor God.  En dit sal die gemeenskap van gelowiges van die pad af trek, want ‘n klein bietjie suurdeeg maak die hele deeg suur.

Let op dat Paulus die leiers sterker aanvat as die volgelinge, en dat hy die punt sterk maak dat hy eerder die pad van die kruis volg as wat hy ‘n valse evangelie sal verkondig sodat hy vervolging kan vermy.

Maar, hy waarsku hulle ook dat ‘n valse evangelie altyd verdeling bring en mense in kampe jaag waar hulle eerder mekaar aanvat as die sonde wat hulle ewige bestemming in gedrang bring.

Die oplossing vir die valse lering oor die wet is om in die Christelike vryheid vas te staan.  Vryheid triomfeer oor legalisme.

1. Omhels die vryheid wat Christus vir jou gebring het van die wet sowel as van die sonde. Ons moet ons vryheid geniet.

• Ons is vry van die vloek van die wet.
• Ons is vry van die skuld van Adam.
• Ons is vry van veroordeling.
• Ons is vry van die skuld, die mag en die slawerny van sonde.
• Ons is vry van die mag van Satan.
• Ons is vry om God se erfenis in besit te neem.

2. Beskerm jou vryheid. Moenie weer aan die wet gehoorsaam word nie, ook nie aan die sonde nie.  Vryheid moet nooit ‘n aanleiding wees vir die begeertes van jou sondige self nie, maar jou aanmoedig om in die liefde te leef soos die Gees jou lei.
3. Ontgin (express) jou vryheid. Dit sluit die verwagting en hoop op God se werk in jou lewe in, maar ook die aanmoediging om jou vryheid in dade van geloof in liefde uit te druk.  Ons is vry om lief te hê.
4. Gebruik jou vryheid. Jou vryheid is nie gemik op jou eie behoeftes en begeertes nie.  Jou vryheid is gemik op diens aan medegelowiges onder leiding van die Heilige Gees.  Moenie in sonde val nie, maar dien mekaar in liefde.  Ons is geroep tot vryheid en moet dié kosbare roeping uitleef!  Vryheid is nie rebellie teen God se wil nie.  Die interessante is dat jy dan sal uitvind dat jy die wet nakom, nie in die spesifieke detail van die rituele daarvan nie, maar in die intensie daarvan, om God lief te hê en ander soos jouself.
5. Ontwikkel (expand) jou vryheid. Laat die Gees jou lei dat jy nie swig voor die begeertes en versoekings van die vlees nie en jy die vrug van die Gees kan dra. Die wat aan Christus behoort het immers hulle sondige natuur met al sy hartstogte en begeertes gekruisig!  Daarvan moet ons vlug van seksuele, godsdienstige en sosiale kategorieë van begeertes van die vlees soos Paulus dit in vyftien aspekte uitspel, en dan ook nog byvoeg: “en dergelike dinge”.  Ons kan nie bekostig om die vlees, die dier in ons, te voed nie.  Ons kan die mag daarvan net ontvlug as ons vasstaan in die vryheid waartoe Christus ons geroep het deur te fokus op die Gees, om op die akker van die Gees te saai, soos hfst. 6 gaan sê.

Aan wie se kant veg jy in die lewe?  Aan die kant van die Gees wat jou in die vryheid wil laat vasstaan en sy vrug in jou lewe wil dra?  Of aan die kant van jou sondige natuur wat jou sal laat vasval in seksuele, godsdienstige en sosiale sondige begeertes.

As jy sukkel om vas te staan in jou stryd teen die sonde, sal ‘n navolging van die wet jou nie help nie, net die vlug na die vryheid wat Christus jou gee met die vergifnis bewerk vir jou aan die kruis.  En om dan die Gees toe te laat om jou lewe skoon te maak en vas te laat staan in die vryheid van sonde.

     

Trackback from your site.