Galasiërs 5:13-6:17 – VRYHEID: dra die vrug van die Gees in die gemeenskap van gelowiges
In die laaste deel van die brief aan die Galasiërs fokus Paulus op die Heilige Gees. En die geheim van ’n Geesvervulde lewe is om onder beheer van die Gees te lewe en nie onder beheer van die wet of die sondige natuur nie. Dit bepaal die rigting waarin jou lewe ontwikkel – óf jy dra al hoe meer die vrug van die Gees, óf jy word beheer deur jou sondige begeertes; óf jy lewe in die kragveld van die Gees óf in die kragveld van die vlees.
Maar ’n mens moet hierdie groei nie in die eerste plek persoonlik opneem nie.
Die lewe onder beheer van die Gees beteken dat sekere sondige praktyke (= meervoud, met die klem op wat mense doen) BINNE die gemeenskap van gelowiges vermy moet word. Let op dat 8 van die 15 sondige praktyke met konflik in die gemeenskap van gelowiges te make het (Gal. 5:19-21): vyandskap, haat, naywer, woede, rusies, verdeelheid, skeuring en afguns.
Die res van die sondige praktyke het wel met jou persoonlike lewe te make. Paulus wys hulle op sekere slegte moreel-etiese waardes: onsedelikheid, onreinheid, losbandigheid, dronkenskap (dronk-drink partytjies) en uitspattigheid (oordadige etes) asook die navolg van verkeerde godsdienstige praktyke: afgodsdiens (beeld-aanbidding) en towery (gebruik van magiese voorwerpe).
Die vrug (= enkelvoud, met die klem op hoe mense is) van die Gees het eweneens direk met gedrag BINNE die gemeenskap van die gelowiges te make: liefde, vrede, geduld, vriendelikheid, goedhartigheid, getrouheid en nederigheid. Selfs die ander 2 dele van die vrug het ’n impak op die gemeenskap van gelowiges: vreugde, selfbeheersing (vry EN verantwoordelik!), hoewel dit meer met jou persoonlike gedrag te make het. Maar belangrik, die dinge is nie soseer iets wat jy doen nie, dit is iets wat in jou groei deur die werk van die Heilige Gees. Dit dui ’n manier van omgaan met ander aan, ’n manier van wees.
Uitleggers wys gereeld daarop dat hier 3 groepe van 3 deugdes genoem word. In lyn daarmee sal ek dit ook só kan voorstel: 1) Gawes van God: liefde, vreugde, vrede; 2) Gawes vir die gemeente: geduld, vriendelikheid, goedhartigheid; 3) Gawes vir die gemeenskap: getrouheid, nederigheid, selfbeheersing. Veral die laaste drie, wat as Christelike deugdes verklaar kan word, sou deur die Griekse wysgere hoog aangeslaan word.
Die lewe in die Gees het dus alles te make met ’n mens se gedrag in die gemeenskap van die gelowiges. Daarom dat Paulus vervolg in Galasiërs 5:26 met ’n verdere waarskuwing: “moenie verwaand wees, mekaar uittart of op mekaar afgunstig wees nie,” en dit afsluit met ’n oproep om mekaar se laste (verwys heel moontlik terug na wanneer iemand in versoeking kom) te dra. Selfs wanneer iemand in sonde geval het, moet só ’n persoon met ’n gees van sagmoedigheid reggehelp word. Alles om die gemeenskap van die gelowiges te beskerm. En daarin moet alle gelowiges volhard: “laat ons nie moeg word om goed te doen nie.”
Soos in van sy ander briewe (1 Kor. 16:21; Kol. 4:18; 2 Tess. 3:17) sluit Paulus dié een af in sy eie handskrif. En dit is heel gepas ’n snydende aanval op die besnydenis voorstanders. Hy wys onder andere uit dat hulle dit eintlik om selfsugtig redes doen, om met hulle beheer oor die liggaam van ander te kan spog. “Of ’n mens besny is of nie, is nie van belang nie, maar dat jy ’n nuwe mens is” (Gal. 6:15). Hierdie nuwe mense, mense wat vry gemaak is deur Christus, is die ware Israel – die eerste keer dat hy so prontuit hierdie term gebruik en op die kerk van toepassing maak (Romeine 9-11 brei hierop uit).
View all posts in this series
- Aan die Galasiërs - Oct 7, 2010
- Die hart van die Christelike geloof - Oct 8, 2010
- Vryspraak, verbondsgemeenskap en vryheid - Oct 11, 2010
- Lees, Luister, Leef - Oct 12, 2010
- Paulus en sy briewe - Oct 13, 2010
- Leesplan
- Galasiërs 1-2 – om met vertroue, verwagting en volharding te leef - Oct 14, 2010
- Galasiërs 3:1-4:20 – VRYSPRAAK: dié wat glo, is kinders van Abraham - Oct 15, 2010
- Galasiërs 4:21-5:12 – VERBONDSGEMEENSKAP: geloof wat deur dade tot liefde oorgaan - Oct 18, 2010
- Galasiërs 5:13-6:17 – VRYHEID: dra die vrug van die Gees in die gemeenskap van gelowiges - Oct 19, 2010
- Die wet in die 3 Formuliere van Eenheid - Oct 21, 2010
- Thabiti Anyabwile | Gospel Freedom, Gospel Fruit | Galatians 5 - Apr 18, 2017
Christopher
Beste Pastoor
Ek is besig om te fokus op die vrug van die gees in Galasiers, en wou graag meer oor die volgende gedeelte weet:
“En die werke van die vlees is openbaar, naamlik owerspel, hoerery, onreinheid, ongebondenheid; afgodery, towery, vyandskap, twis, jaloersheid, toornigheid, naywer, tweedrag, partyskap; afguns, moord, dronkenskap, brassery en dergelike dinge, waarvan ek julle vooraf sê, soos ek al vroeër gesê het, dat die wat sulke dinge doen, die koninkryk van God nie sal beërwe nie.”
My vraag is spesifiek op die doen in die laaste gedeelte. Beteken die doen spesifiek iemand wat in hierdie dinge genoem te volhard, of iemand wat hierdie dinge somtyds doen?
Ook staan daar geskrywe “sulke dinge”. Beteken dit dat iemand nie die koninkryk sal beerwe as hy/sy al die dinge genoem doen, sommige doen of net een van die dinge doen (of volhard)?
Dankie, Groete.
Daar staan ook dat mense wat sulke doen, nie die koninkryk van God sal sien nie.
Chris van Wyk
Hi Christopher, Die Griekse werkwoord wat in Galasiërs 5:21 gebruik word, is prassō. Dit word in die teenwoordige tyd gebruik wat beteken dat dit op mense dui wat in ‘n gewoonte is om dié dinge te beoefen: “to “practise”, i.e. perform repeatedly or habitually.” (Strongs en Liddle-Scott). Dit dui dus op ‘n praktyk in jou lewe, iets wat jy gereeld beoefen, sonder dat jy die Here om vergifnis en verlossing vra, en sonder dat jy daarteen stry en deur die Gees die werke van die vlees doodmaak (Rom 8:13).
Die “sulke dinge” dui op dinge wat soortgelyk is aan dié vyftien dinge wat hy noem. Hy noem bv nie vuiltaal nie, maar dit is ingesluit omdat hy op ‘n ander plek daaroor praat (Ef 4:29). Die vyftien dinge is dus verteenwoordigend van ‘n lewe wat nie aan God behoort nie.
Wanneer jy dié dinge doen, wys jy eintlik dat jy nog nie die verlossing uit God se hand ontvang het nie, wat beteken dat jy die koninkryk van God nie sal beërwe as jy nie tot bekering kom nie. Bekering help ons om die werke van die vlees dood te maak en die vrug van die Gees sal dan al hoe meer in jou lewe na vore kom.
Christopher
Geagte Pastoor Chris;
Ek wil graag weet waarom die Boek van Enoch nie in die bybel ingesluit is nie?
Is van die informasie daarin verkeerd?
Baie Dankie, Groete.
Chris van Wyk
Hi Christopher, die Jode het die Boek van Henog nie as gesaghebbend beskou nie, en omdat die Hervormers die Joodse kanon as maatstaf gebruik het vir die samestelling van die OT, is die boek in die Protestantse beweging nie as deel van die kanon ingesluit nie. Jy kan meer lees hier oor verskillende perspektiewe op die boek.