Amos 9:11-15 – Die herstel van Israel
Uiteindelik sien Amos tog ‘n toekoms waarin die Here die lot van Israel sal verander, hoewel dit nie die huidige situasie van ‘n dreigende ballingskap sal kan omkeer nie.
Die boodskap van herstel vir Israel hou twee verwante komponente in:
- Polities en godsdienstig: Jerusalem en Juda – “die vervalle hut van Dawid” – sal weer herbou word, hoewel ‘n mens steeds die band tussen God en die nasies – “oor wie my Naam uitgeroep is” – in dié belofte hoor – vers 11-12.
- Ekologies en ekonomies: Die land sal weer sy opbrengs lewer, en dit in oorvloed. Die oeste sal as’t ware in mekaar se pad kom, so ‘n oorvloed sal daar wees. Die vorige oes sal nog nie volledig ingesamel wees nie, dan is die volgende oes daar! Die boere sal weer die vrug van hulle arbeid geniet in ‘n land waar daar vrede en rus sal heers – vers 13-15.
Boodskap
Die verlede speel altyd ‘n groot rol in jou Godsbewussyn. Daar is ‘n spesiale motiverende krag in die voorsiening van die Here in jou verlede. Dit gee hoop vir die hede en vertroue op dié dinge wat net God kan gee.
Maar God se voorsiening kom net volledig tot sy reg in ‘n verhouding met Hom. Dít was die probleem van Israel in die tyd van Amos. Hulle het geroem op wat God in die verlede vir hulle gedoen het, sonder om aandag te gee aan die verhouding met Hom in die hede. Daarom het die toekoms vir hulle donker geword, en is hulle uiteindelik weggevoer in ballingskap.
Die hoop wat Amos ná alles wel oorhou, is nie gegrond op Israel se status as Godsvolk, en uiteraard ook nie op hulle vermoë om God te gehoorsaam nie. Dit is slegs gegrond op God se besluit, sy voorneme om hulle nie heeltemal uit te roei nie, om ‘n oorblyfsel genadig te wees. Dit is die boodskap waarop ook die koms van die Messias gebaseer is, God se keuse om self verantwoordelikheid te neem om die toekoms vir dié wat in die Here Jesus glo, oop te sluit, ‘n boodskap waartoe Amos reeds in die 8ste eeu v.C. bygedra het.
View all posts in this series
- Amos – Die Here brul uit Sion vir geregtigheid - February 17, 2015
- Amos 1:1-2:16 – Die Here brul teen die nasies
- Amos 3:1 – 4:13 – Israel weet nie hoe om reg te doen nie - February 18, 2015
- Amos 5:1-6:14 – Vra na my wil, dan sal julle lewe - February 19, 2015
- Amos 7:1-17 – Drie gesigte van oordeel – sprinkane, vuur en ‘n swaard - February 20, 2015
- Amos 8:1-14 – Die oordeel van die vierde gesig van ‘n mandjie somervrugte - February 23, 2015
- Amos 9:1-10 – Die oordeel van die vyfde gesig van die Here by die altaar - February 24, 2015
- Amos 9:11-15 – Die herstel van Israel
Andre Kritzinger
Ironies – Amo 9:4 ….. my bedoeling met hulle is om hulle kwaad aan te doen, nie om goed aan hulle te doen nie.
Laat ons die teks ook in gedagte hou.
Mense is so lief vir Jer 29:11 “Ek weet wat Ek vir julle beplan, sê die Here: voorspoed en nie teenspoed nie; Ek wil vir julle ‘n toekoms gee, ‘n verwagting! “
Chris van Wyk
Jy is reg. Alles gaan oor die konteks waarbinne die boodskap kom. Daarom dat ons ook die tekste saam moet lees binne ons gemeenskappe en hulle uitdagings, om só te kan onderskei waarheen die Here met ons lewens op pad is.