Die fokus van hierdie Leesplan is gemeenskap met God. Ons begin telkens met die bid van die Ons Vader, bid dan die Psalm met ‘n tyd van nadenke, en sluit ons gebedstyd af met ‘n kort Lofprysing. Die idee is dat jy na die Ons Vader die kort gedeelte oor die teks en konteks van die Psalm lees, daarna die Psalm met aandag deurlees,  en dan vers vir vers in jou eie woorde (hardop as dit kan) bid. Daarna kan jy die kort bydrae oor die boodskap en betekenis lees vir nadenke. Sluit met die bid van die Lofprysing. Die middag en aand bid jy net die Ons Vader, die Psalm, en die Lofprysing.

Ons Vader

“Ons Vader wat in die hemele is, laat u Naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons daaglikse brood. En vergeef ons ons sondes, soos ons ook ons skuldenaars vergeef. En laat ons nie in versoeking kom nie, maar verlos ons van die Bose. Want aan U behoort die koninkryk en die krag en die heerlikheid tot in ewigheid. Amen.” (Matt. 6:9-13)

Teks en konteks

Let op hoe Dawid in ‘n gebed van vertroue – vers 9-12 – sy vertroue in God herhaal, waarskynlik veroorsaak deur een of ander teken of woord wat hy ontvang het (“Dat God aan my kant is, weet ek beslis.”), Hy teken ook vir ons ‘n kant van God wat regtig tot ‘n mens se hart spreek: “U het my trane opgevang. U het dit opgeskryf in u boek.” Watter diep gerusstelling as ‘n mens aan wydverspreide aanvegtinge blootgestel is. In sy gebed van toewyding – vers 13-14 –  verbind Dawid hom om sy geloftes en dankoffers te betaal, en dank God dat dié hom enduit beskerm en bewaar.

Bid die Psalm

“U het my ellende raakgesien. U het my trane opgevang. U het dit opgeskryf in u boek. Die dag dat ek na U roep om hulp, val my vyande terug. Dat God aan my kant is, weet ek beslis. In God, wie se woord ek prys, in die Here, wie se woord ek prys, in God stel ek my vertroue. Daarom sal ek nie bang wees nie! Wat kan ’n gewone mens aan my doen? My geloftes aan U sal ek nakom, o God, aan U sal ek dankoffers bring. Want U het my van die dood gered. U het my voete van struikeling bewaar sodat ek saam met God kan loop en kan lewe in sy lig.” NLV

Boodskap en betekenis

Die Psalm is ‘n uitstekende vyf-delige raamwerk vir ‘n mens se eie gebede.  Die gebed om genade is gebaseer op vertroue, net soos die gebed om uitkoms gebaseer is op vertroue.  Die bewussyn van God se deernis met ons trane, is inspirerend.  En só ‘n gebed moet altyd uitmond in (nuwe) toewyding. “Trust in God, when activated and confirmed by a word from God, is more powerful than the evil actions of human beings.” (Tate, Word Biblical Commentary : Psalms 51-100).

Lofprysing

“Weet vandag en verstaan dat die Here God is; Hy alleen is God in die hemel en op die aarde.” (Deut. 4:39)

Die fokus van hierdie Leesplan is gemeenskap met God. Ons begin telkens met die bid van die Ons Vader, bid dan die Psalm met ‘n tyd van nadenke, en sluit ons gebedstyd af met ‘n kort Lofprysing. Die idee is dat jy na die Ons Vader die kort gedeelte oor die teks en konteks van die Psalm lees, daarna die Psalm met aandag deurlees,  en dan vers vir vers in jou eie woorde (hardop as dit kan) bid. Daarna kan jy die kort bydrae oor die boodskap en betekenis lees vir nadenke. Sluit met die bid van die Lofprysing. Die middag en aand bid jy net die Ons Vader, die Psalm, en die Lofprysing.

Ons Vader

“Ons Vader wat in die hemele is, laat u Naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons daaglikse brood. En vergeef ons ons sondes, soos ons ook ons skuldenaars vergeef. En laat ons nie in versoeking kom nie, maar verlos ons van die Bose. Want aan U behoort die koninkryk en die krag en die heerlikheid tot in ewigheid. Amen.” (Matt. 6:9-13)

Teks en konteks

Psalm 57 word weereens met ’n noodsituasie uit Dawid se lewe verbind, dié keer met die gebeure toe hy van Saul in ‘n grot ingevlug het. Ons lees in Samuel van twee sulke geleenthede, waarvan hierdie Psalm waarskynlik na die tweede verwys, die verhaal in 1 Samuel 24, waar Dawid ’n stukkie van Saul se mantel afgesny het. Veral Psalm 57:7 kan ‘n digterlike verwysing na hierdie gebeure in die grot wees: Hulle het ’n gat voor my gegrawe, maar het self daarin geval.” Die aanwysing vir die koorleier om die Psalm uit te voer op die wysie van “Moenie verwoes nie!” is een wat ook vir die volgende twee Psalms gebruik word (Ps. 58 en 59 – Ps 75 verwys ook daarna). Dit is nogal ‘n veelseggende titel – aan die een kant vra Dawid in die Psalm om God se genade te ervaar, en nie verwoes te word nie, maar vra wel aan die ander kant vir verwoesting vir sy vyande. Let op in vers 1-6 hoe die grot vir Dawid eintlik ’n metafoor word van sy behoefte aan skuiling by God. Hy wil by God skuil tot die bedreiging verby is. In ver 7-12 is die situasie omgekeer, die gat wat vir hom gegrawe is, het tot hulle eie ondergang gelei. Daarom voel Dawid weer veilig en verseker en wil hy in die oopte buite die grot gaan sing, die rooidag wakker maak, omdat God sy situasie verander het. Let op hoe hierdie boodskap ook van universele betekenis geag word, iets waarvan die nasies kennis moet neem. God se liefde reik tot in die hemel, sy trou tot in die wolke.

Bid die Psalm

“Vir die koorleier: Op die wysie van “Moenie verwoes nie”. Van Dawid. ’n Gedig, met verwysing na die gebeurtenis toe hy in die grot van Saul af weggevlug het. Wees my genadig, o God, wees my genadig! Ek soek skuiling by U. In die skaduwee van u vlerke sal ek skuil totdat die onheil verby is. Ek roep tot God die Allerhoogste, tot God wat gereed is om te help. Uit die hemel antwoord Hy en red my; hulle wat my wil vernietig, sal Hy verneder. Sela God sal sy trou en waarheid stuur. Ek is omring deur leeus, tussen bloeddorstige mense wat my wil verskeur. Hulle tande is soos spiese en pyle, hulle tonge so skerp soos swaarde. O God, mag U geprys word ver bokant die hemele, en u heerlikheid besing word oor die hele aarde. Hulle het vir my voete ’n lokval gestel. Ek voel terneergedruk. Hulle het ’n gat voor my gegrawe, maar het self daarin geval. Sela Ek vertrou geheel en al op U. Op U, o God, vertrou ek onwrikbaar. Ek wil lofliedere sing. “Word vroeg wakker!” sê ek. “Harp en lier, word wakker!” Ek wil die dagbreek wakker maak! Voor die volke wil ek U prys, Here, tussen die nasies wil ek u lof besing. Want u trou is hoër as die hemele, u waarheid reik tot in die wolke. Mag U verhewe wees tot bo die hemele, o God, en u heerlikheid erken word oor die hele aarde.” NLV

Boodskap en betekenis

Die wraakgedagtes in die Psalm is deel van die sin vir regverdigheid wat die OT openbaar, en in Dawid se gebede geëggo word. Die kwaad móét vergeld word aan dié wat dit gepleeg het, en God word ingeroep as die een wat dit moet uitdeel (Eks 21:24; Deut. 19:21 – vgl. ook Lev. 24:20). Die wraak Psalms het dus ‘n plek, enersyds as ‘n perspektief op die pad wat Dawid met God gestap het, en andersyds as ‘n verwoording van ons eie geregverdigde woede oor onreg en vervolging. Soms het ons nodig om “woorde aan ons woede te gee” (Bybel vir die Lewe), en die wraak Psalms kan ons daarmee help. Ons moet ook nie vergeet dat daar wel ‘n oordeel aan die einde van die tyd is waar God sy reg om te straf en te vergeld sal uitoefen. Dat ons in genadetyd leef, moet ons nie die sekerheid van die oordeel deur God laat vergeet nie. Paulus is duidelik daaroor: “Die toorn van God word vanaf die hemel geopenbaar oor al die goddeloosheid en ongeregtigheid van mense wat volhou om die waarheid deur ongeregtigheid te probeer onderdruk.” (Rom. 1:18) Hierdie Psalm wil ons ook wakker maak vir die skandaal van onreg, korrupsie en geweld by die maghebbers in die samelewing. In die lig daarvan bid Dawid met groot erns vir vergelding en regstelling, sodat almal sal erken, daar is tóg ’n God wat reg op aarde sal laat geskied!

Lofprysing

“Weet vandag en verstaan dat die Here God is; Hy alleen is God in die hemel en op die aarde.” (Deut. 4:39)

Die fokus van hierdie Leesplan is gemeenskap met God. Ons begin telkens met die bid van die Ons Vader, bid dan die Psalm met ‘n tyd van nadenke, en sluit ons gebedstyd af met ‘n kort Lofprysing. Die idee is dat jy na die Ons Vader die kort gedeelte oor die teks en konteks van die Psalm lees, daarna die Psalm met aandag deurlees,  en dan vers vir vers in jou eie woorde (hardop as dit kan) bid. Daarna kan jy die kort bydrae oor die boodskap en betekenis lees vir nadenke. Sluit met die bid van die Lofprysing. Die middag en aand bid jy net die Ons Vader, die Psalm, en die Lofprysing.

Ons Vader

“Ons Vader wat in die hemele is, laat u Naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons daaglikse brood. En vergeef ons ons sondes, soos ons ook ons skuldenaars vergeef. En laat ons nie in versoeking kom nie, maar verlos ons van die Bose. Want aan U behoort die koninkryk en die krag en die heerlikheid tot in ewigheid. Amen.” (Matt. 6:9-13)

Teks en konteks

Steeds op die wysie van “Moenie verwoes nie”, spreek Dawid die wydverspreide probleem van ’n korrupte regstelsel aan. Dit sluit dus mooi aan by die boodskap van beide 1 Samuel 24 en Psalm 57. Dawid vra van God in Psalm 58 om optrede sodat almal sal sê: “Daar is regtig beloning vir dié wat toegewyd lewe; daar is beslis ’n God wat regverdig oordeel op aarde.” (vers 12). Die goddelose regters se mag, invloed, nalatenskap en lewe moet verwoes word, sodat die regverdiges bevestig kan word in hulle lewenskeuse en, belangrik, God weer kan raaksien. Die Psalm val natuurliker wys in vier dele uiteen: 1) ’n Beoordeling van die onbillike uitsprake van die regters – vers 2-3. 2) ’n Beskrywing van die oorsprong van hulle slegte, verkeerde en bedrieglike pad – vers 4-6. 3) ’n Beroep op God om hulle mag, invloed, nalatenskap en lewe te vernietig – vers 7-10. 4) ’n Beskrywing van die impak wat dit op die lewenskeuse en Godsbelewenis van regverdiges sal hê – vers 11-12.

Bid die Psalm

“Vir die koorleier: Op die wysie van “Moenie verwoes nie”. Van Dawid. ’n Gedig. Julle wat regeer, is julle uitspraak regtig regverdig? Is julle beslissings oor mense billik? Nee! In julle gedagtes beplan julle reeds boosheid, met julle eie hande versprei julle geweld in die land. Bose mense is so vanaf geboorte; van kleintyd af praat hulle leuens. Hulle gif is soos die gif van slange; hulle is soos ’n adder wat doof is en nie luister na die slangbesweerder nie, hoe bedrewe die besweerder ook al is. God, slaan hulle tande stukkend in hulle mond. Here, breek die slagtande van hierdie leeus. Laat hulle verdwyn soos water wat wegsypel. Laat hulle vertrap word soos droë gras, soos ’n misgeboorte wat wegsmelt, soos ’n doodgeborene wat nie die son sien nie. Vinniger as wat ’n pot warm word oor ’n doringvuur sal God hulle wegvee, sowel jonk as oud. Die getroue sal bly wees by aanskoue van die vergelding. Die bloed van die goddeloses sal hy afwas van sy voete. Dan sal almal sê: “Daar is regtig beloning vir dié wat toegewyd lewe; daar is beslis ’n God wat regverdig oordeel op aarde.”” NLV

Boodskap en betekenis

Soos reeds by Psalm 57 opgemerk is, hierdie tipe sentimente “gee woorde aan ons woede”. Let ook op dat dit teenoor God uitgespreek word. Vir sy optrede word gevra. “When bitterness and pain are poured out to God, the way may be cleared for a fresh vision of reality and new trust in God. These psalms help to purify us of feelings of rage, and also of dereliction and abandonment.” (Tate, Word Biblical Commentary : Psalms 51-100) In die NT word hierdie verwagting meer genuanseerd uitgespreek, maar die beroep op ’n God wat reg laat geskied, is steeds deel van ons geloofswêreld, soos steeds grafies in ’n boek soos Openbaring uitgespreek word. ‘n Paar verdere opmerkings oor wraak in die OT: 1) Ons moet eerder die boodskap van die Psalm probeer verstaan as verdedig. Die Psalms bevat eerlike taal wat werklike emosies uitdruk en glad nie probeer om die woede en afgryse weg te steek nie. 2) Die waarde van die Psalms vir ons geestelike gesondheid is dat dié woede wat ons ervaar nie verberg hoef te word nie, maar teenoor God uitgespreek kan word waarmee ook vir sy optrede gevra kan word. 3) Die woedende worstelende woorde van die Psalms moet ons ook roer tot identifisering met mense wat aan onreg en geweld blootgestel is, sodat ons nie net hulle lot voor God sal bring nie, maar ook as God se verteenwoordigers betrokke sal raak in die verlossing wat nodig is vir dié wat uitgelewer is aan die magtiges van hierdie wêreld. 4) Nog dieper, dié Psalms moet ons ook oortuig van ons eie skuld, want ons is baie keer self onbillik en onregverdig, al is dit nie op só ’n groot skaal of met dieselfde afgryslike impak as wat mense in groter magsposisies kan uitoefen nie. 5) Die vyande is natuurlik uiteindelik ook nie net die menslike agente nie, maar die bose magte soos Efesiërs daaroor skryf. Oral waar hulle egter ontmasker word in die houdings en optrede van werklike mense en gekies word om daarteenoor in geloof, liefde en hoop te lewe (1 Tess. 5:8), dáárin lê die oorwinning oor die vyande opgesluit, dáár kom die koninkryk van God (Ef. 6:14-20).

Lofprysing

“Weet vandag en verstaan dat die Here God is; Hy alleen is God in die hemel en op die aarde.” (Deut. 4:39)

Die fokus van hierdie Leesplan is gemeenskap met God. Ons begin telkens met die bid van die Ons Vader, bid dan die Psalm met ‘n tyd van nadenke, en sluit ons gebedstyd af met ‘n kort Lofprysing. Die idee is dat jy na die Ons Vader die kort gedeelte oor die teks en konteks van die Psalm lees, daarna die Psalm met aandag deurlees, en dan vers vir vers in jou eie woorde (hardop as dit kan) bid. Daarna kan jy die kort bydrae oor die boodskap en betekenis lees vir nadenke. Sluit met die bid van die Lofprysing. Die middag en aand bid jy net die Ons Vader, die Psalm, en die Lofprysing.

Ons Vader

“Ons Vader wat in die hemele is, laat u Naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons daaglikse brood. En vergeef ons ons sondes, soos ons ook ons skuldenaars vergeef. En laat ons nie in versoeking kom nie, maar verlos ons van die Bose. Want aan U behoort die koninkryk en die krag en die heerlikheid tot in ewigheid. Amen.” (Matt. 6:9-13)

Teks en konteks

Die derde Psalm in die reeks, Ps. 57-59, wat op die wysie van “Moenie verwoes nie” vir die koorleier aangedui word, word verbind met die verhaal van Saul wat opdrag gegee het dat Dawid se huis omsingel word om hom dood te maak. Dit is dus ’n diep persoonlike Psalm in ’n situasie van groot gevaar. Telkens word die historiese situasie egter ook wyer geïnterpreteer as metafoor vir die bedreiging van die nasies (vers 6,9) en het die Psalm ook betekenis vir die geloofsgemeenskap (vgl. die meervoud in vers 12 “ons skild” (of “Beskermer”) en die hoop op die universele getuienis van God se verlossing in vers 14). Ons vind dié verhaal in 1 Samuel 19, terwyl Dawid nog vir Saul in sy huis op die lier gespeel het. Saul het dié dag met sy spies in sy hand gesit toe ”’n boosaardige gees wat deur die Here gestuur is,” oor Saul gekom het, en hy geprobeer het om Dawid met die spies dood te maak. Dawid het egter gekoes en gevlug vir sy lewe na sy eie huis. Saul het toe van sy mense na Dawid se huis toe gestuur “om hom dop te hou en hom in die môre dood te maak.” Dawid se vrou Mikal, Saul se dogter, het hom egter gewaarsku dat hy moet vlug anders word hy doodgemaak. Sy het hom deur die venster laat afsak en hy het só ontsnap. Mikal het gemaak asof hy nog daar is en ‘n afgodsbeeld op die bed met ’n bokhaarnet om die kop gedraai en dit met ’n kombers toegemaak. Toe Saul se mense vir Dawid die volgende oggend kom soek, het sy gesê hy is siek. Saul het hulle egter beveel om hom met bed en al na hom te bring sodat hy Dawid kon doodmaak. Toe eers het hulle agter gekom Dawid is weg. Saul was baie kwaad vir Mikal, maar sy het sy gramskap ontwyk deur Dawid te beskuldig dat hy haar met die dood gedreig het. Die Psalm is ’n diep persoonlike worsteling van Dawid met die geweld van sy vyande terwyl hy nêrens oortree het nie: “Hoewel ek onskuldig is, bestorm hulle my” Telkens word die gevaar van die nasies egter bygetrek waarmee die Psalm ook betekenis vir die geloofsgemeenskap gekry het. Die Psalm kan in drie dele verdeel word: vers 2-6, vers 7-14, vers 15-18 – onder andere as gevolg van die Selas, asook die herhalende inhoud van vers 7 en 15 wat telkens ’n nuwe deel van die Psalm inlei. Ons lees vandag die eerste deel, en môre die res van die Psalm.

Bid die Psalm

“Vir die koorleier: Op die wysie van “Moenie verwoes nie”. Van Dawid. ’n Gedig. Na aanleiding van Saul se opdrag dat Dawid se huis omsingel moes word om hom dood te maak. Red my van my vyande, o God. Laat my vyande my nie in die hande kry nie. Bevry my van dié wat boosheid bewerk; red my tog van dié wat bloeddorstig is. Want kyk, hulle lê my voor. Gedugte mense span saam teen my al het ek nie oortree of gesondig nie, Here. Hoewel ek onskuldig is, bestorm hulle my, gereed vir die aanval. Ontwaak en help my! Kyk tog wat hulle doen! O Here, God die Almagtige, God van Israel, gryp tog in en straf al die nasies. Betoon geen genade aan bose verraaiers nie. Sela” NLV

Boodskap en betekenis

Dawid bid vir God se hulp om hom te red, beskerm en bevry van sy vyande en teëstanders, mense wat onreg doen en moord wil pleeg. Dawid is ontsteld omdat hy nie oortree het nie en hulle hom onskuldig bestorm en aanval. Anargie heers. Daarom vra hy hulp van God. Let op hoe hy God met ’n driedubbele omvattende beskrywing aanspreek: “O Here, God die Almagtige, God van Israel!” Daarmee fokus hy op God se hulp as sy persoonlike God (Here), sowel as op Hom as die Een wat heers (God die Almagtige), en sy volk (God van Israel) beskerm teen die nasies. Trouens, hy smeek: “Betoon geen genade aan bose verraaiers nie.” Harde woorde, maar gewortel in die oortuiging dat God regverdig is en in sy almag in staat is om geregtigheid te laat geskied! Ons het nodig om dié kant van God vir onsself toe te eien in situasies van boosheid en doodsgevaar.

Lofprysing

“Weet vandag en verstaan dat die Here God is; Hy alleen is God in die hemel en op die aarde.” (Deut. 4:39)

Die fokus van hierdie Leesplan is gemeenskap met God. Ons begin telkens met die bid van die Ons Vader, bid dan die Psalm met ‘n tyd van nadenke, en sluit ons gebedstyd af met ‘n kort Lofprysing. Die idee is dat jy na die Ons Vader die kort gedeelte oor die teks en konteks van die Psalm lees, daarna die Psalm met aandag deurlees, en dan vers vir vers in jou eie woorde (hardop as dit kan) bid. Daarna kan jy die kort bydrae oor die boodskap en betekenis lees vir nadenke. Sluit met die bid van die Lofprysing. Die middag en aand bid jy net die Ons Vader, die Psalm, en die Lofprysing.

Ons Vader

“Ons Vader wat in die hemele is, laat u Naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons daaglikse brood. En vergeef ons ons sondes, soos ons ook ons skuldenaars vergeef. En laat ons nie in versoeking kom nie, maar verlos ons van die Bose. Want aan U behoort die koninkryk en die krag en die heerlikheid tot in ewigheid. Amen.” (Matt. 6:9-13)

Teks en konteks

Dawid vergelyk in die tweede deel van die Psalm die vyande met grommende skuimende-mond honde wat hom omsingel. Hy put krag uit God se spottende houding teenoor hulle, waarin hy uit Psalm 2 aanhaal, en daarmee ook die nasies weer in spel bring. Op God wil Dawid sy hoop gevestig hou, want Hy is sy veilige vesting. Interessant genoeg wil hy nie hê dat die vyande/nasies eensklaps uitgewis sal word nie, maar eerder stadig, sodat hulle straf nie ongemerk sal verbygaan nie en almal terdeë daarvan bewus sal kan wees. Hy vra ook dat hulle eintlik met hulle eie woorde en houding gevang sal word, sodat dit duidelik blyk dat hulle hul straf verdien. Nogal ’n interessante perspektief.  ’n Skielike dood sou vermoedelik die gevaar kon inhou dat mense vir hulle jammer kon voel, inplaas daarvan om terdeë bewus te wees van die regverdigheid van hulle lotsbestemming, juis vanweë die stadige verloop van die proses. “Dan sal almal weet dat God oor sy volk Jakob en oor die hele aarde regeer.” Nogal ’n belangrike perspektief wat rekening hou met die voordeel van die wiele van geregtigheid wat stadig draai … Dawid sluit af met nog ’n vergelyking van sy vyande met honde met die byvoeging dat hulle aan die tjank gaan as hulle nie genoeg kry nie! Let ook op dat hulle werk in die donker gedoen word. Daarteenoor sal Dawid elke môre teenoor God jubel, want hy is ’n kind van die dag. God is vir hom ’n veilige vesting (twee keer herhaal om dit te beklemtoon). Daarom wil hy God se eer en trou besing.

Bid die Psalm

“Hulle kom terug in die nag, hulle grom soos honde wat in die stad ronddwaal. Kyk hoe hulle my beledig met hulle monde! Hulle wys hulle tande terwyl hulle dink: “Wie sal ons hoor?” Maar, Here, U lag vir hulle. U spot met al die nasies. My sterkte, op U wag ek, want U, o God, is my skuilplek. My troue God sal my tegemoetkom. God sal my laat neersien op my vyande. Moenie hulle dadelik doodmaak nie, want my volk vergeet so gou; laat hulle steier deur u krag, en bring hulle tot ’n val, Here, ons skild. Weens die sonde uit hulle mond, weens die woorde van hulle lippe, laat hulle gevang word deur hulle hoogmoed, weens hulle vervloekings en hulle leuens. Vernietig hulle in u toorn! Wis hulle geheel en al uit! Dan sal hulle weet dat God in Jakob regeer en tot by die einde van die aarde. Sela Hulle kom terug in die nag, hulle grom soos honde wat in die stad ronddwaal. Hulle aas rond op soek na kos, maar kry nie genoeg nie, dan tjank hulle. Maar ek sal sing van u mag en in die oggend jubel oor u trou. Want U was my toevlug, ’n veilige skuiling in tye van nood. Ek sing lofliedere vir U, my Sterkte, want God is my skuilplek, U is my troue God.” NLV

Boodskap en betekenis

‘n Mens gebruik Psalm 59 in tye van groot aanvegting, veral in persoonlike krisisse, maar ook wanneer ’n gemeenskap onder beleg is van anargie en wetteloosheid. Onthou dat die Psalm vir jou “woorde vir jou woede” gee, maar dat jou gebed vir jou vyande uiteindelik eerder hulle transformasie in die oog het. “Laat hulle ondergaan” kan dan gebid word as “laat hulle dade ondergaan” terwyl steeds vir die inkeer van die vyande en die omkeer van die uitwerking van hulle dade gebid word. En onthou dat daar voordele is in die wiele van geregtigheid wat stadig draai. Die impak van die verandering is groter as dit langsamerhand tot stand kom. Geduld en vertroue is die wagwoord!

Lofprysing

“Weet vandag en verstaan dat die Here God is; Hy alleen is God in die hemel en op die aarde.” (Deut. 4:39)