Tag: Wie is God?

Gelukkig is die mens wat in beproewing volhard! As die toets sy geloof as eg bewys, sal hy die lewe as oorwinningskroon ontvang. God het hierdie lewe belowe aan hulle wat Hom liefhet. Wanneer iemand iets verkeerds wil doen, moet hy nie sê: “God verlei my” nie. Ons weet mos God kan nie verlei word om verkeerd te doen nie, en Hý verlei ook niemand nie. Ons eie sondige begeertes beproef ons, sleep ons saam en verlei ons. As ons sondige begeertes eers bevrug geraak het, is sonde die babatjie wat gebore word. En as hierdie babatjie kans kry om volwasse te word, gee dit geboorte aan die dood. (NLV)

1. Hierdie beskrywing van Jakobus wys presies uit hoe verleiding tot sonde werk. Hoe ervaar jy dit? Stem jy met hom saam?

2. Wat is die evangelie vir jou in die gedeelte? Dink oor die belofte in die eerste vers oor volharding, geloof en liefde wat tot ‘n oorwinningskroon lei. Hoe motiveer dit jou?

3. Lees die verse later vandag weer om jou te herinner aan die oorwinningskroon wat daar is vir dié wat in geloof en die liefde vir God volhard.

4. Jy kan later vanaand die verse weer lees in die konteks van Jakobus 1 en my bydrae daaroor:Jakobus 1:1-18 – Volhard in beproewing.

Julle weet tog dat Hy verskyn het om die sonde weg te neem en dat daar geen sonde in Hom is nie. Elkeen wat in ’n hegte verhouding met Hom leef, hou nie aan sonde doen nie. Elkeen wat aanhou sonde doen, het Hom nie gesien nie en het ook nie ’n begrip van Hom nie. Kinders, moenie dat iemand julle hieroor mislei nie: Elkeen wat reg leef, is regverdig, net soos Hy regverdig is. Elkeen wat aanhou sonde doen, is familie van die duiwel omdat die duiwel van die heel begin af sonde gedoen het. Juis daarvoor het die Seun van God verskyn: om die dade van die duiwel te vernietig. Elkeen wat deur God verwek is, hou nie aan sonde doen nie omdat God se saad in hulle bly. Hulle kan ook nie aanhou sonde doen nie omdat hulle deur God verwek is. Op hierdie manier is dit duidelik wie die kinders van God en wie die kinders van die duiwel is. Almal wat nie reg optree nie en ook nie hulle medegelowiges liefhet nie, is nie uit God nie. (NLV)

1. Johannes lê die hoofboodskap van Jesus uit as ‘n verskyning om “sonde weg te neem”. Dit het die effek op elkeen wat in ‘n hegte verhouding met Hom leef dat hulle nie kan aanhou sonde doen nie. Hoe ervaar jy dit? Van jouself? Van ander? 

2. Johannes lê sterk klem op die feit dat daar ‘n onderskeid is tussen die familie van die duiwel en die familie van God? Lees deeglik wat hulle onderskei. Waar bevind jy jou?

3. Lees die verse later vandag weer om jou te herinner daaraan dat jy familie van God is deur in ‘n hegte verhouding met Jesus te leef, sodat jy nie aanhou sonde doen nie.

4. Jy kan later vanaand die gedeelte weer lees in die konteks van 1 Johannes 3 sowel as my bydrae daaroor: 1 Johannes 2:28-3:24 – Kinders van God doen wat reg is en het mekaar lief.

Besef julle dan nie dat mense wat ’n sondige lewe lei, geen deel sal kry aan die koninkryk van God nie? Moenie julleself mislei nie. Mense wat ’n onsedelike lewe lei, afgodsdienaars, egbrekers, manlike prostitute en die mans wat met hulle omgaan, diewe, gierigaards, drinkers, kwaadpraters, swendelaars – nie een van hierdie mense sal deel kry aan die koninkryk van God nie. Daar was ’n tyd toe party van julle presies so was, maar nou is julle sonde afgewas en God het julle aan Homself toegewy. Julle is vrygespreekte mense op grond van wat die Here Jesus Christus en die Heilige Gees van God vir julle gedoen het. (NLV)

1. Daar is mense wat glad nie rekening hou met hierdie helder boodskap nie. Hoe dink jy oor die skerp taal wat hier gebruik word: “geen deel aan die koninkryk van God …”; “nie een van hierdie mense sal deel kry …” Is die toegangsvereiste vir die koninkryk so absoluut as wat Paulus dit hier stel?

2.Die evangelie in die gedeelte is dat daar ‘n uitweg in Jesus Christus is. Dié wat hulle sondes laat afwas en hulle aan God toewy, is vrygespreekte mense, maar nie saak hoe sondig of afvallig hulle was nie. Is dit al vir jou ‘n werklikheid?

3. Lees die verse later vandag weer om jou te herinner daaraan om as vrygespreekte mens te leef en al die sondes wat hier genoem word, te vermy.

4. Jy kan later vanaand die verse weer lees in die konteks van 1 Korintiërs 6 en my bydrae daaroor:1 Korintiërs 6 – Vermy onreg en onsedelikheid.

Net soos die onkruid bymekaargemaak word en verbrand word, so sal dit ook wees by die voleinding van die wêreld. Ek, die Seun van die Mens, sal my engele uitstuur. Hulle sal alles wat sonde veroorsaak en almal wat God se wet oortree uit my koninkryk verwyder en hulle in die brandende oond gooi. Daardie mense sal bitterlik huil en van selfverwyt op hulle tande kners. Dan sal dié wat reg voor God gelewe het, soos die son skitter in die koninkryk van hulle Vader. (NLV)

1. Wat tref jou in die teks van Jesus se hantering van alles (en almal) wat sonde veroorsaak en ook van dié wat self God se wet oortree, by die voleindig van die wêreld? Hoe verander dit jou denke oor sonde en die wet?

2. Dink na oor die hoopvolle uitnodiging in die teks dat dié wat reg voor God lewe in sy koninkryk sal skitter soos die son. Dink ook na oor die feit dat Jesus God “hulle Vader” noem. Is dit al vir jou ‘n werklikheid?

3. Lees die verse later vandag weer om jou te herinner aan Jesus se oordeel en genade.

4. Jy kan later vanaand die verse weer lees in die konteks van Matteus 13 en my bydrae daaroor:Matteus 13 – Jesus ontmagtig die skare en bemagtig die dissipels met gelykenisse.

1. Wat is sonde? Hoekom dink jy so? Watter rol speel jou mening daaroor? Ander se mening? God s’n?

2. Lees my antwoord op die vraag en oordink dit.

Sonde is om God se wet te oortree en te lewe in sy wêreld asof Hy nie bestaan nie. Sonde laat almal rebelleer teen God se regverdige wet. Dit veroorsaak die dood en disintegrasie van die hele skepping. Weens die skuld van sonde val almal daarom onder die toorn en straf van God, nou en vir ewig, behalwe dié wat deur ’n Verlosser vrygespreek word.

3.Dit het mode geword om sonde te definieer as iets wat jouself of ander tekort doen, beskadig of seermaak. Net die horisontale dimensie word beklemtoon, sonder om aandag te gee aan die vertikale dimensie, dws hoe God daaroor dink of hoe die Bybel daaroor skrywe. Hoe dink jy daaroor?

4. Lees die verhaal van Kain en Abel in Genesis 4:1-15. Wat tref jou?

5. Lees my opsomming van die boodskap daarvan en oordink dit.

Abel was ’n veeboer en Kain ’n landbouer. Hulle het offers aan die Here gebring. Die Here het Abel en sy offer aanvaar, maar nie dié van Kain nie. Daaroor was Kain baie kwaad en neerslagtig. Die Here waarsku Kain. As hy weier om reg te doen, sal die sonde hom oorweldig. Dit is presies wat gebeur het. Kain het sy broer Abel aangeval en doodgeslaan. Die Here vra toe vir Kain wat hy nou aangevang het. Hy probeer nog maak asof hy van niks weet nie. Die Here weet egter alles. Daarom straf die Here Kain vir sy sonde.

6. Kain se probleem was nie in die eerste plek die offer nie. Sy probleem was dat hy God se waarskuwing nie gehoorsaam het nie. Sy ongehoorsaamheid lei daartoe dat hy sy broer doodslaan. Daarmee oortree hy dus nie net ‘n sosiale wet nie, maar ‘n geestelike wet. Hoe verander dit jou denke daaroor?