Tag: Wie is God?

Jesus is by ’n bruilof in die dorpie van Natanael, Kana.  Sy ma is daar sowel as sy dissipels, ook waarskynlik sy broers (vers 12).  Dit is op die derde dag na die gesprek met Natanael. Miskien was dit ’n familie-troue wat moontlik verklaar hoekom Maria verantwoordelik gevoel het om die gebrek aan wyn aan Jesus uit te wys – hulle gevolg was immers ’n groot groep ekstra gaste! Dit kan ook verband hou met Natanael omdat dit sy tuisdorp was.

Maria se interaksie met haar seun Jesus en die kelners sê vir my dat sy ook iets verstaan het van Jesus se deernis met mense, selfs wanneer so iets doodgewoon gebeur as wyn wat by ’n partytjie opraak.  En dat sy ook geweet het dat Sy deernis tot optrede sal lei.  Hoe dit ook al sy, sy bring die behoeftes van die gasheer en –vrou na Hom toe, in die verwagting dat Hy iets sal kan doen.

Dat Jesus antwoord dat Sy tyd nog nie gekom het nie, val aanvanklik vreemd op.  Maar as ’n mens in gedagte hou dat Hy deurgaans kommunikeer dat Hy net doen wat sy Vader Hom wys (4:34-38; 5:19,30), kan dit wees dat Hy hier vir Maria sê dat Hy net sal doen wat Sy Vader Hom wys, en dit ook net op God se tyd, nie menslike tyd nie.

1. Lees die aanhalings uit die Nederlandse Geloofsbelydenis 24, Heidelbergse Kategismus 65, Dordtse Leerreëls 2.1.6-7; 3-4.1.12-14 en Westminster Geloofsbelydenis 11. Wat leer jy waar die ware geloof vandaan kom? Wat beteken dit vir jou? Wat vra dit van jou?

Nederlandse Geloofsbelydenis 24

ONS HEILIGMAKING EN GOEIE WERKE

In al ons gebede dank ons God, die Vader van ons Here Jesus Christus, vir julle, want ons het gehoor dat julle in Christus Jesus glo en van julle liefde vir al God se mense. Julle doen dit omdat julle hoop om dit te ontvang wat in die hemel vir julle gereed lê. Julle het daarvan gehoor toe die waarheid van die Goeie Nuus aan julle verkondig is. Dieselfde Goeie Nuus wat julle bereik het, gaan ook oor die hele wêreld uit. In die hele wêreld dra dit goeie vrug en versprei dit, net soos dit by julle gebeur het vanaf die dag toe julle die waarheid oor God se genade gehoor en verstaan het. (NLV)

1. Daar is ‘n dankbare opgewondenheid in ‘n mens as jy hoor van gelowiges wat vasstaan in die geloof en help dat die Goeie Nuus van Jesus Christus oor die hele wêreld versprei. Lees ‘n paar verhale van die verspreiding van die evangelie in hierdie wêreld om jou eie geloof te versterk. Byvoorbeeld die verhaal van Gladys Aylward.

2. ‘n Mens kan in liefde lewe met medegelowiges, omdat ons dieselfde hoop en verwagting het van die ewige lewe. Is dit jou ervaring?

3. Lees die verse later vandag weer om jou te herinner aan medegelowiges wat dieselfde hoop as jy deel. Reik uit na ‘n medegelowige en bemoedig mekaar met hierdie woorde.

4. Jy kan later vanaand die gedeelte weer lees in die konteks van Kolossense 1:1-14 sowel as my bydrae daaroor: Kolossense 1:1-14 – Om God te ken en vir Hom te lewe.

Deur wat Christus gedoen het, het ook julle die waarheid gehoor, die Goeie Nuus waardeur julle verlos word. Op grond van wat Christus gedoen het, is julle, toe julle tot geloof gekom het, tot God se eiendom gemerk deur die Heilige Gees wat God belowe het. Die Heilige Gees is God se deposito wat ons volle erfenis waarborg totdat almal wat aan God behoort, volkome verlos sal wees. Daarvoor moet ons God se grootheid prys! (NLV)

1. Ons geloof is gebaseer op die Goeie Nuus van wat Christus vir ons gedoen het. Ons word deur die Heilige Gees gemerk tot God se eiendom. Hoe laat dit jou voel?

2. Die Heilige Gees is God se deposito wat jou waarborg is dat alle seëninge wat daar in Christus Jesus is (vgl vers 3), inderdaad joune is. Wat beteken dit vir jou?

3. Lees die verse later vandag weer om jou te herinner aan die Gees wat in jou woon en jou waarborg van volkome verlossing is. Jy behoort aan God.

4. Jy kan later vanaand die gedeelte weer lees in die konteks van Efesiërs 1 sowel as my bydrae daaroor: Efesiërs 1:1-23 – God seën ons om alles in almal te vervul.

Wat ons betref, die Gees laat ons uitsien na dit waarop ons hoop: vryspraak deurdat ons glo. Vir mense wat met Christus verenig is, is dit nie belangrik of jy besny is of nie besny is nie. Wat egter wel belangrik is, is geloof wat deur liefde dade word. (NLV)

1. Paulus beklemtoon hier dat die vryspraak van die sonde deur geloof ontvang word. Vryspraak is ‘n geskenk van God. Die Gees werk dit in ons. Geloof is die hand waarmee jy dit aanvaar en vir jouself toeëien. Hoe dink jy daaroor?

2. Paulus spel die gevolge van geloof in ‘n mens se lewe uit. Die ware geloof word: “deur liefde dade”. Hoe werk dit prakties in jou lewe?

3. Lees die verse later vandag weer om jou te herinner daaraan dat jy volkome vrygespreek is deur God. Jy is verenig met Christus wat beteken dat geloof ook in jou deur liefde dade kan word.

4. Jy kan later vanaand die verse weer lees in die konteks van Galasiërs 5:1-12 en my bydrae daaroor: Galasiërs 4:21-5:12 – VERBONDSGEMEENSKAP: geloof wat deur dade tot liefde oorgaan.