Tag: Wie is God?

Kyk af uit die hemel en sien ons tog raak van waar U sit, op u heilige en verhewe troon. Waar is u ywer van voorheen, u magtige dade? U weerhou u ontferming en genade van ons. U is mos nog ons Vader! Selfs as Abraham en Israel ons nie wil erken nie, bly U steeds ons Vader, Here. U is van altyd af ons Redder. (NLV)

1. Hierdie teks kom uit die Profete. Jesaja bid hier tot God dat in ‘n situasie van ballingskap in die vreemde God Hom weer as Vader sal bewys. Wat tref jou van die wyse waarop Jesaja met God in gesprek tree?

2. In die konteks van die res van Jesaja 63 is dit duidelik dat Israel se ballingskap weens hulle eie sonde en afvalligheid is. Die ballingskap was God se oordeel oor hulle. Tog is Jesaja se gebed steeds begrond in God se Vaderskap: “U is mos nog ons Vader!” Watter troos en verwagting hou dit ook vir jou in?

3. Lees die verse later vandag weer om jou te herinner dat God se Vaderskap die oorsaak, oorsprong en begin van alles is. Jy kan Hom sonder enige twyfel vertrou om vir jou te sorg.

4. Jy kan later vanaand die verse weer lees in die konteks van Jesaja 63 en my bydrae daaroor: Jesaja 63 – Selfs in oordeel kan jy jou op God beroep.

’n Vader vir wese, ’n beskermer van weduwees; dít is God in sy heilige woning. God gee aan die eensame ’n tuiste; dié wat gevange is, lei Hy na vryheid, maar opstandelinge woon in ’n verlate woestyn. (NLV)

1. Hoewel die NT baie meer oor God se Vaderskap sê, is dit ‘n tema wat alreeds in die OT aangeraak word. Ek kies daarom veral Bybeltekste uit die OT – uit die Psalms, Profete, Wet en Geskrifte – om oor God se Vaderskap na te dink. Hierdie teks is ‘n beskrywing in die Psalms van God as Vader. Wat tref jou van sy Vaderskap?

2. Watter rol speel ons reaksie op God as Vader in ons ervaring van Hom as Vader?

3. Lees die verse later vandag weer om jou te herinner dat God jou Vader is, dat jy aan Hom behoort, en dat Hy jou beskermer en bevryder is.

4. Jy kan later vanaand die verse weer in die konteks van Psalm 68 lees en my bydrae daaroor. Dit is regtig ‘n besondere Psalm wat een van die mees omvattende beskrywings van God bevat: Psalm 68 – God vul alles en almal met Sy teenwoordigheid.

1. Hoe dink jy oor God die Vader? Hoe sou jy Hom beskryf? Hoe beïnvloed jou ervaring van jou eie pa jou perspektief op God as Vader? En jou ervaring van ander pa’s?

2. Lees my antwoord en oordink dit.

Die Vader is die oorsaak, oorsprong en begin van alles. Hy is die almagtige Skepper van hemel en aarde van alle sigbare en onsigbare dinge. Saam met die Seun en die Heilige Gees is Hy die ware en ewige God. Op Hom vertrou ek so dat ek nie twyfel dat Hy my, met alles wat vir liggaam en siel nodig is, sal versorg nie.

3. Lees die bekendstelling van God as Vader aan Dawid in 2 Samuel 7:1-17. Wat tref jou?

4. Lees my opmerkings daaroor. Oordink dit.

God is die oorsaak, oorsprong en begin van alles; die Almagtige, die Skepper van die hemele en die aarde. Hy maak Homself bekend as Vader. Dawid wou vir God ’n huis bou. God herinner hom dat Hy vir Dawid gesorg het vandat hy ’n skaapwagter was. God was oral by hom. God het hom rus gegee van al sy vyande. Die Here bou vir Dawid ’n koningshuis. Sy seun sal ’n groot koning wees: “Ek sal vir hom soos ’n vader wees, en hy sal vir My ’n seun wees.” Dit belowe God vir elkeen wat in Hom glo. God is ’n Vader vir sy kinders.

5. Lees Heidelbergse Kategismus 26 se antwoord op die vraag: Wat is die Vader?

Vraag: Wat glo jy as jy sê: Ek glo in God die Vader, die Almagtige, die Skepper van die hemel en die aarde?

Antwoord: Ek glo dat die ewige Vader van ons Here Jesus Christus wat die hemel en aarde met alles wat daarin is, uit niks geskep het (a) en deur sy ewige raad en voorsienigheid nog onderhou en regeer (b), ter wille van sy Seun Christus my God en Vader is. (c) Op Hom vertrou ek so dat ek nie daaraan twyfel dat Hy my, met alles wat vir liggaam en siel nodig is, sal versorg nie (d). Hy sal ook al die kwaad wat Hy in hierdie jammerdal oor my beskik, tot my beswil verander (e), omdat Hy dit as ‘n almagtige God kan (f) en ook as ‘n getroue Vader wil doen (g).

(a) Gen 1 en 2; Eks 20:11; Job 33:4, 38, 39; Hand 4:24; 14:15; Ps 33:6; Jes 45:7. (b) Hebr 1:3; Ps 104:27-30; 115:3; Matt 10:29; Ef 1:11: (c) Joh 1:12; Rom 8:15; Gal 4:5-7; Ef 1:5. (d) Ps 55:23; Matt 6:25, 26; Luk 12:22. (e) Rom 8:28: (f) Jes 46:4; Rom 10:12. (g) Matt 6:32, 33; 7:9-11.

Is dit hoe jy oor God as Vader dink en wat jy ook van Hom glo?

Lees vandag die hele brief van Judas. Dit is ‘n kosbare verdediging van die oorgelewerde geloof, die enigste fondament van ‘n gesonde geloof.

Inleiding op Judas

Die brief van Judas word geskryf deur die: “dienskneg van Jesus Christus en broer van Jakobus.” Daarmee kies Judas om sy geloofsbande met Jesus te beklemtoon eerder as sy familiebande.

Sy verwantskap met Jakobus maak dit egter tog duidelik dat hy familie van Jesus is. Saam met die brief van Jakobus het ons dus briewe van twee van Jesus se broers in die NT.

Judas se klem op temas uit die Joodse geskiedenis en sy aanvaarding dat dit bekend sal wees vir sy lesers, beteken dus waarskynlik dat hulle Joodse Christene was, anders as wat die geval was met die geloofsgemeenskap waaraan Petrus sy briewe gerig het.

Die verband tussen Judas en 2 Petrus 2

Daar is redelike verskil van mening oor hoe die verband tussen hoofstuk 2 van die 2de brief van Petrus en die brief van Judas verklaar moet word. Vyftien verse uit die brief van Judas se vyf en twintig verse kom in sy geheel of gedeeltelik ook in hierdie tweede hoofstuk van Petrus voor.

Die beste verklaring is waarskynlik dat Petrus en Judas onafhanklik van mekaar ‘n ander en gemeenskaplike bron gebruik, bv ‘n bestaande stuk kategetiese onderrigmateriaal, maar elkeen op sy eie manier.

Aanleiding

Judas val direk weg met die aanleidende rede van sy brief. Hy wil aan die een kant die leringe van dwaalleraars bestry wat verdeeldheid en onsekerheid onder hulle gesaai het. Aan die ander kant skryf hy om hulle op te roep om hulle lewe te bou op hul heiligste geloof.

Judas noem dié dwaalleraars goddeloses – praktiese ateïste, mense wat sê hulle glo in God, maar leef asof Hy nie bestaan nie – en losbandiges wat nie net God se genade misbruik het tot hulle eie voordeel nie, maar die gesag van die Here Jesus Christus verwerp het. Petrus noem hulle vals leraars – soortgelyk aan die vals profete van die OT – wat die Here Jesus verloën. Hy is ook duidelik daaroor dat dit tot hulle eie skade en ondergang is.

Bestryding van dwaalleer

1. Lees die aanhalings uit die Geloofsbelydenis van Nicea en die Heidelbergse Kategismus 22-25 wat ook die Apostoliese Geloofsbelydenis (12 artikels) insluit. Wat leer jy oor geloof uit hierdie twee belydenisse? Wat beteken dit vir jou? Wat vra dit van jou?

Geloofsbelydenis van Nicea 1-12

1) Ons glo in een God, die almagtige Vader, die Skepper van hemel en aarde, van alle sigbare en onsigbare dinge.

2) En in een Here Jesus Christus, die eniggebore Seun van God, voor al die eeue uit die Vader gebore.

3) Hy is God uit God, lig uit lig, ware God uit ware God, gebore, nie gemaak nie, een in wese met die Vader, deur wie alles tot stand gekom het.

4) Hy het ter wille van ons, mense, en ons saligheid uit die hemel neergedaal en het deur die Heilige Gees uit die maagd Maria vlees geword; Hy het mens geword; onder Pontius Pilatus is Hy gekruisig; Hy het gely en is begrawe.

5) Op die derde dag het Hy volgens die Skrifte opgestaan.

6) En Hy het na die hemel opgevaar. Hy sit aan die regterhand van die Vader.

7) En Hy sal met heerlikheid terugkom om die lewendes en die dooies te oordeel. Aan sy koningskap sal daar geen einde wees nie.

8) Ons glo in die Heilige Gees, wat Here is en lewend maak. Hy gaan van die Vader en die Seun uit, en Hy word saam met die Vader en die Seun aanbid en verheerlik. Hy het deur die profete gespreek.

9) Ons glo aan een, heilige, algemene en apostoliese kerk.

10) Ons bely een doop tot vergifnis van sondes.

11) Ons verwag die opstanding van die dooies.

12) En die lewe van die toekomstige bedeling. Amen.

Heidelbergse Kategismus 22-25

22 Vraag: Wat moet ‘n Christen glo?

Antwoord: Alles wat in die evangelie aan ons beloof word (a) en wat die artikels van ons algemene en ongetwyfelde Christelike geloof ons in hoofsaak leer.

(a) Joh 20:31; Matt 28:19; Mark 1:15.

23 Vraag: Hoe lui die artikels?

Antwoord: (1) Ek glo in God die Vader, die Almagtige, die Skepper van die hemel en die aarde. (2) En in Jesus Christus, sy eniggebore Seun, ons Here; (3) wat ontvang is van die Heilige Gees, gebore uit die maagd Maria; (4) wat gely het onder Pontius Pilatus, gekruisig is, gesterf het en begrawe is en neergedaal het na die hel; (5) wat op die derde dag weer opgestaan het uit die dood; (6) opgevaar het na die hemel en sit aan die regterhand van God, die almagtige Vader, (7) waarvandaan Hy sal kom om die lewendes en die dooies te oordeel. (8) Ek glo in die Heilige Gees. (9) Ek glo aan ‘n heilige, algemene, Christelike kerk, die gemeenskap van die heiliges; (10) die vergewing van sondes; (I1) die opstanding van die liggaam (12) en ‘n ewige lewe.

24 Vraag: Hoe word hierdie artikels ingedeel?

Antwoord: In drie dele: die eerste handel oor God die Vader en ons skepping; die tweede oor God die Seun en ons verlossing; die derde oor God die Heilige Gees en ons heiligmaking.

25 Vraag: Terwyl daar maar tog net een, enige Goddelike Wese is, waarom praat jy van drie, naamlik die Vader, Seun en Heilige Gees (a)?

Antwoord: Omdat God Hom so in sy Woord geopenbaar het (b) dat hierdie drie onderskeie Persone die enige, ware en ewige God is.

(a) Deut 6:4; Ef 4:6; Jes 44:6; 45:5; 1 Kor 8:4, 6. (b) Jes 61:1; Luk 4:18; Gen 1:2, 3; Ps 33:6; Jes 48:16; Matt 3:16, 17; 28:19; 1 Joh 5:7; Jes 6:1, 3; Joh 14:26; 15:26; 2 Kor 13:13; Gal 4:6; Ef 2:l8; Tit 3:5, 6.

2. Loof die Here in gebed vir die spesifieke wysheid en insig wat die geloofsbelydenisse jou gee oor geloof.