Geloofsekerheid
Ek het ‘n navraag gekry oor hoe ‘n mens geloofsekerheid kry. Hier is ‘n kort antwoord daarop.
Die beste manier is om jou sekerheid te soek in die Woord van God. Ek kan aan min beter plekke dink om jou geloofsekerheid te begrond, as op die boodskap van die eerste brief van Johannes. Ek sal sy boodskap hieroor as volg opsom:
- Hoofstuk 1: Ons almal is sondig, maar as ons ons sonde bely, sal Jesus ons vergewe en van alle ongeregtigheid reinig. Jesus is die Middelaar tussen ons en God. Hy kan ons met mekaar versoen, omdat Hy God en mens tegelykertyd is, en ons van die grootste probleem van menswees, die skuld en die mag van die sonde, kan verlos. Jesus is dus die belangrikste bron van ons sekerheid dat ons sonde vergewe is. Hy verlos ons van ons sonde. Ons kan dit glo. Daarop kan ons vertrou.
- Hoofstuk 2: As ons weer sondig (en wie sondig nie weer nie?!), Jesus is ons Voorspraak. Hy tree vir ons daagliks in by sy Vader. Sy vergifnis is vir al ons sondes, ook dié wat nog in die toekoms lê. Ons moet net die pad van heiliging saam met Hom loop. Jesus gee vir ons wat ons nodig het om die pad enduit met Hom te loop.
- Hoofstuk 3: Ons is deur vergifnis kinders van God en hoef niks te vrees as Jesus weer kom nie. Ons kan op God daarvoor vertrou en ons sekerheid as kinders van God daagliks vier.
- Hoofstuk 4: Ons moet leef in die liefde, want dit is wat kinders van God doen, teenoor Hom en teenoor ons naaste. Dit feit dat ons lewe in die liefde gee ons ook sekerheid dat ons inderdaad kinders van God is.
- Hoofstuk 5: Elkeen wat glo dat Jesus van sondes verlos, is ‘n kind van God en kan seker wees hy of sy gaan hemel toe. Die Heilige Gees gee vir elkeen van ons die getuienis in ons hart dat ons die ewige lewe sal beërwe. Hy waarborg dit in ons hart.
Hier is my Bybelskool begeleiding vir die eerste brief van Johannes vir ‘n bietjie breër lees.
- Inleiding op die briewe van Johannes
- 1 Johannes 1 – Die vleesgeworde Seun van God reinig ons van elke sonde
- 1 Johannes 2:1-27 – Leef met en in God se liefde in hierdie wêreld
- 1 Johannes 2:28-3:24 – Kinders van God doen wat reg is en het mekaar lief
- 1 Johannes 4 – Wie in die liefde bly, bly in God en God bly in hulle
- 1 Johannes 5 – Geloof is die getuienis van God se werk in ons lewe
Daar is natuurlik baie ander maniere om uit die Bybel hieroor te gesels, maar hierdie brief is vir my ‘n uitstekende begin.
Vir diegene wat nog dieper hierop wil ingaan, is die Dordtse Leerreëls ‘n goeie verdere stop. Dit behandel vyf sekerhede waarop jy jou geloof kan bou. Daarby is dit altyd goed om die vyf solas in gedagte te hou waaroor ek my Pinksterreeks gehou het: Daar is Geen Ander Evangelie nie.
View all posts in this series
- Inleiding op die briewe van Johannes - November 17, 2013
- 1 Johannes 1 – Die vleesgeworde Seun van God reinig ons van elke sonde - November 18, 2013
- 1 Johannes 2:1-27 – Leef met en in God se liefde in hierdie wêreld - November 19, 2013
- 1 Johannes 2:28-3:24 – Kinders van God doen wat reg is en het mekaar lief - November 20, 2013
- 1 Johannes 4 – Wie in die liefde bly, bly in God en God bly in hulle - November 21, 2013
- 1 Johannes 5 – Geloof is die getuienis van God se werk in ons lewe - November 22, 2013
- Geloofsekerheid - June 25, 2017
Discover more from Bybelskool
Subscribe to get the latest posts sent to your email.
Natascha
More, more vertrou dat jul n wonderlike naweek agter die rug het. Chris, ek het n vraag?
Kan jy asb. vir my se wat die verskil is tussen n Christen en n Kind van God? Ek weet ons almal is Christene, want ons glo tog is God, maar wat is die verskil?
Dit klink dalk stupid, maar ek sal graag wil weet?
Chris van Wyk
Dit is nie ‘n stupid vraag nie. Eintlik is vrae per definisie nooit stupid nie, want dit bring die waarheid na vore. Solank dit eerlik en opreg is. Die antwoord is egter nie so eenvoudig nie. Wat beteken dat die vraag diep is!
‘n Christen is Bybelsgesproke iemand wat as ‘n gelowige en ‘n volgeling van Christus bekend is. Dit is wat die Griekse woord Christianos in die NT beteken. Louw en Nida beskryf die woord in hulle woordeboek as volg: “one who is identified as a believer in and follower of Christ.”
Dit word die eerste keer vir gelowiges gebruik in Antiogië (Hand. 11:26). Die gemeenskap sien in hulle lewe dat hulle met Christus identifiseer en Hom navolg. Dit is ook die hart van ons getuienis. Ons probeer mense oortuig om met Christus te identifiseer en Hom na te volg. Ons hoor bv. by koning Agrippa dat hy in Paulus se passievolle getuienis voor die hof probeer om hom te beweeg om ook ‘n Christianos te word, iemand wat glo in Christus en Hom navolg (Hand. 26:28). En Petrus moedig ons met dieselfde passie aan om as draers van die naam Christianos ons nie te skaam vir die lyding wat baie keer daarmee gepaard gaan nie, maar God te verheerlik as onbeskaamde Christianos.
‘n Christen is dus iemand wat in Christus glo en wat Hom volg. Hulle is dus ook kinders van God, want Johannes sê, elkeen wat glo dat Jesus die Christus is, is uit God gebore, is ‘n kind van God (1 Joh. 5:1). Dit is die groot liefde wat God aan ons bewys het dat almal wat in Christus glo kinders van God genoem kan word (1 Joh. 3:1).
Daar behoort dus nooit enige verskil te wees tussen iemand wat ‘n Christen is – ‘n Christianos soos die Bybel dit sê, iemand wat in Christus glo en Hom navolg – en ‘n kind van God nie.
Die werklikheid is egter dat baie mense vandag hulleself Christene noem, omdat hulle óf biologies deel van die kerk is, óf hulleself nog as deel van die Westerse Christendom samelewing beskou wat aanvanklik op Christelike waardes gebou is, maar daardie Christelike basis lankal versaak en verlaat het. Dit wil sê, mense wat nie waarlik glo in Christus en Hom navolg nie, maar so identifiseer omdat hulle deel is van die kerk of die Westerse samelewing. Sulke mense is egter nie kinders van God nie, al dra hulle wel nog in die oë van die wêreld, asook in hulle eie beoordeling van hulleself, die naam Christen.
Paulus waarsku ons in sy tweede brief aan Timoteus teen mense wat die krag van Christus in hulle lewe verloën deur ‘n gedaante van godsaligheid te hê (‘n breë identifisering met Christenwees), maar met hulle lewens te bewys dat hulle nie Christene is nie deurdat hulle Christus nie meer volg nie. Dit is mense wat selfsugtig is, geldgierig, grootpraterig, aanmatigend, godslasterlik, ongehoorsaam aan hulle ouers, ondankbaar, goddeloos, ongevoelig, genadeloos, beledigend, sonder selfbeheersing, wreed, sonder liefde vir die goeie, verraaiers, roekeloos, hooghartig, lief vir plesier eerder as vir God, mense wat wel op die oog af godsdienstig lyk, maar wat die krag daarvan misken (2 Tim. 3:2-5). Van sulke mense moet ons wegbly, sê Paulus, terwyl hy ons waarsku dat dit swaar tye voorspel.
Marie
Goeie dag
Ek het ‘n vreeslike stryd met gebed. HELP asb.:
Bid, en vir julle sal gegee word, Matt. 7:7
Bid in die geloof, sonder om te twyfel, Jak. 1:5–6
Onse Vader wat in die hemele is, …… laat u wil geskied,
Hoekom bid ek en die Here se wil geskied?
Chris van Wyk
Hi Marie. Hier is twee bydraes wat jou kan help:
Sterkte en seën