Tag: Wie is God?

Jesus het geweet wat hulle dink, en vra toe vir hulle: “Wat redeneer julle so by julleself? Wat is makliker om te sê: ‘Jou sondes is vergewe’ of ‘staan op en loop’? Ek sal vir julle bewys dat Ek, die Seun van die Mens, die mag het om op aarde sondes te vergewe.” Jesus draai toe na die verlamde man en sê: “Ek sê vir jou, staan op, vat jou slaapmat en gaan huis toe.” (NLV)

1. Jesus verklaar in hierdie gedeelte dat die belangrikste behoefte wat ons het die vergifnis van ons skuld en sonde is. Dat dit belangriker is as om genesing of voorspoed te ervaar. Hoe dink jy daaroor?

2. Jesus genees wel die man as getuienis dat Jesus werklik sy sondes vergewe het. Wat wil jy vir die Here sê in terme van jou eie behoeftes aan vergifnis en genesing?

3. Lees die verse later vandag weer om jou te herinner aan Jesus se mag om nie net te genees nie, maar ook te vergewe.

4. Jy kan later vanaand die gedeelte weer lees in die konteks van Lukas 5 sowel as my bydrae daaroor: Lukas 4:14-5:39 – Jesus het gekom vir armes, gevangenes, blindes en onderdruktes.

So ver soos die hemele van die aarde af is, so groot is sy onfeilbare liefde teenoor hulle wat Hom dien. So ver as die ooste is van die weste, so ver verwyder Hy ons oortredings van ons. (NLV)

1. Daar is min gedeeltes wat die werklikheid van die vergifnis van sondes só helder verwoord as juis Psalm 103. Ons sondes verdwyn letterlik in die vergetelheid in. Hoe laat dit jou voel?

2. Psalm 103 sê onomwonde dat God genadig is. Dat sy troue liefde eksponensieel groter is as ons sonde en sondeskuld. Dat Hy vir dié wat vir Hom ontsag het (vertikale as) hulle sondes ligjare ver verwyder (horisontale as). ’n Verskuilde manier om die kruis van Golgota in spel te bring!  Watter wonderlike wete! Wat wil jy vir God in respons hierop sê?

3. Lees die verse later vandag weer om jou te herinner daaraan dat God jou sondes regtig ligjare van jou af verwyder het – so ver as die hemel van die aarde af is, en die ooste van die weste.

4. Jy kan later vanaand die gedeelte weer lees in die konteks van Psalm 103 sowel as my bydrae daaroor: Psalm 103 – Ek wil die Here loof met alles wat in my is.

Deur sy een offer het Hy al sy mense vir altyd volmaak geheilig. Die Heilige Gees bevestig dit vir ons wanneer Hy in die eerste plek verklaar: “Dít is nou die verbond wat Ek hierna met die volk Israel gaan sluit, verklaar die Here: Ek sal my opdragte inskryf in hulle harte en Ek sal dit in hulle verstand graveer.” Dan voeg Hy daarby: “Ek sal aan hulle sondes en hulle oortredings nooit weer dink nie.” Inderdaad, waar sondevergifnis ’n werklikheid is, is geen verdere offer vir die sonde nodig nie. (NLV)

1. Jesus het met sy kruisdood nie net al ons sondes vergewe nie, maar ons vir altyd volmaak geheilig. Dink na oor die betekenis daarvan vir jou. Nie net vandag nie, maar vir altyd.

2. God belowe dat Hy nooit weer aan jou sondes en oortredings sal dink nie. Hy belowe ook dat Hy sy opdragte inskryf in jou hart en ingraveer in jou verstand. Wat beteken dit vir jou?

3. Lees die verse later vandag weer om jou te herinner aan die vryheid en volmaaktheid wat vergifnis van al jou sondes vir jou gebring het.

4. Jy kan later vanaand die verse weer lees in die konteks van Hebreërs 10 en my bydrae daaroor: Hebreërs 9:23-10:18 – Jesus Christus verskyn in die heiligdom voor God ter wille van ons.

God het dit goedgedink om met sy volle Goddelikheid in die Seun te woon, en om deur Hom alles met Homself te versoen. Deur die bloed van sy Seun aan die kruis het Hy vrede gemaak. Ja, deur Hom het Hy alles op die aarde en in die hemel met Homself versoen. (NLV)

1. Jesus het deur sy kruisdood die alles op die aarde en in die hemel met God versoen. Dit sluit die vergifnis van al jou sondes in. Hoe laat dit jou voel?

2. In die res van die gedeelte moedig Paulus die gelowiges aan om vas te bly staan in hierdie vertroue en hulle nie te laat losruk van die hoop op verlossing, soos wat sou kon gebeur deur die mense wat hulle met verkeerde idees mislei. Hoe kan jy daaraan gehoorsaam wees?

3. Lees die verse later vandag weer om jou te herinner aan die vrede wat daar tussen jou en God gekom het met die vergifnis van al jou sondes, sodat jy in dié vertroue kan vasstaan.

4. Jy kan later vanaand die verse weer in die konteks van Kolossense 1 lees en my bydrae daaroor: Kolossense 1:15-23 – Jesus die Here van die Skepping en die Herskepping.

1. Wat beteken die vergifnis van al jou sondes vir jou?

2. Lees my antwoord en oordink dit.

Deur Jesus Christus se kruisdood het Hy my vir altyd met God versoen. God sal nooit weer aan my sondes dink nie. Christus het volkome voldoen aan God se geregtigheid, selfs al moet ek weens my sondige aard my lewe lank nog daarteen stry. Uit genade gee God aan my die geregtigheid van Christus sodat ek nooit in die oordeel van God sal kom nie.

3. Lees die verhaal van die eenheid wat Jesus deur sy kruisdood bewerk het in Efesiërs 2:11-22. Wat tref jou?

4. Lees my opmerkings daaroor. Oordink dit.

Ons is met God versoen en het nou deur een Gees toegang tot die Vader

Deur Christus se dood aan die kruis het Hy vrede tussen Jode en nie-Jode gebring. Deur sy liggaam aan die kruis te gee, het Hy die twee groepe één gemaak. Hy het in Homself die twee groepe tot een nuwe mensheid omskep. Deur sy dood aan die kruis het Hy die vyandskap beëindig. Só het Hy albei groepe in een liggaam met God versoen. Dit is aan Hom te danke dat albei groepe deur een Gees toegang tot die Vader het. Ons is dus medeburgers van hulle wat aan God behoort. Ja, ’n gebou waarin God deur sy Gees woon. God het dit goedgedink om met sy volle Goddelikheid in die Seun te woon, en om deur Hom alles met Homself te versoen. Deur die bloed van sy Seun aan die kruis het Hy vrede gemaak. Ja, deur Hom het Hy alles op die aarde en in die hemel met Homself versoen.

5. Lees die Heidelbergse Kategismus vraag en antwoord 56 oor die vergewing van die sondes en dink na oor die betekenis daarvan vir jou?

56 Vraag: Wat glo jy van die vergewing van die sondes?

Antwoord: Dat God, op grond van die voldoening van Christus, aan al my sondes en ook my sondige aard waarteen ek my lewe lank moet stry nooit meer (a) wil dink nie. Uit genade wil Hy aan my die geregtigheid van Christus skenk (b) sodat ek nooit in die strafgerig van God sal kom nie (c).

(a) 1 Joh 2:2; 1:7; 2 Kor 5:19. (b) Rom 7:23-25; Jer 31:34; Miga 7:19; Ps 103:3, 10, 12. (c) Joh 3:18; 5:24.

Is dit hoe jy oor die vergifnis van sondes dink en wat jy ook van God glo?