Omgee en dienslewering

Omgee vir of diens aan ander mense is die vervulling van die tweede liefdesgebod – om jou naaste lief te hê soos jouself (Matt 22:39). Jesus se hele bediening was ’n bediening van omgee (Luk 4:14-44; vgl Jes 58; 61). Hy het die behoeftiges en noodlydendes gehelp. Die gelykenis van die barmhartige Samaritaan is die meesterverhaal wat vir ons wys hoe belangrik omgee is (net so belangrik soos gasvryheid). Omgee is immers in wese ’n prentjie van wie God as die barmhartige God is (Ps 145:8-9). Wanneer ons vir ander omgee, seën God die aarde; Hy gebruik ons om vir ander tot seën te wees, volgens sy belofte aan Abraham (Gen 12). Jesus verwag ook van ons om vir ander mense om te gee. Hy het gesê: “Wees barmhartig soos julle Vader barmhartig is” (Luk 6:36).

Omgee vra van ons om oë en ’n hart vir ons naaste te hê, en dan hande en voete aan ons gevoel van barmhartigheid en omgee te gee: “Wie aardse besittings het en sy broer [of suster] sien gebrek ly, maar geen gevoel vir hom [of haar] het nie – hoe kan die liefde van God in hom wees?” (1 Joh 3:17). Omgee is ’n lewe van diens, ʼn lewe van omgee, ʼn lewe waarin ander mense se belange vir jou net so swaar weeg soos jou eie, ʼn lewe waarin jy jou hulpbronne, tyd, invloed en vaardighede gebruik om vir ander te sorg, of dit nou is om hulle te beskerm, te versorg, te koester of vir hulle regte op te kom.

Hier is ’n paar voorstelle om jou gedagtes te prikkel:

• Dink aan mense wat in nood is, soos weduwees, weeskinders of minderbevoorregtes. Dink biddend vir wie jy iets prakties kan doen deur jou invloed te gebruik of deur ’n uitstappie te reël, met inkopies te help of regshulp of maatskaplike hulp te verleen. Gaan doen dit dan.
• Vra vir iemand: “Wat kan ek vandag vir jou doen?” Dit kan iemand in jou familie of in jou vriende- of werkkring wees. Dit kan iets klein of groot wees. Dit kan iets moeilik of maklik wees. Maar gaan doen dit!
• Kies ʼn sendeling of ʼn gesin vir wie julle as gemeente in hulle bediening ondersteun. Vra vir hulle wat jy vir hulle kan doen. Miskien het hulle kruideniersware nodig wat jy vir hulle kan stuur. Dalk kan jy hulle help met hulle banksake of ander administratiewe take vir hulle doen. Vind uit wat jy kan doen … en doen dit dan.
• Maak ’n ekstra bord kos en bêre dit in die vrieskas vir iemand wat dit dalk kan nodig kry. Bergsig, ʼn gemeente in KwaZulu-Natal, het dit hulle gemeenteprojek gemaak. Die gemeentelede bring hierdie ekstra borde kos kerk toe, waar hulle dit in ’n paar vrieskaste bêre. Hulle dien dan die gemeenskap deur hierdie borde kos aan die behoeftiges uit te deel. ʼn Mooi plakker op die yskas sal jou help om van die kos te onthou. Gaan doen dit gerus.