1. Lees die aanhalings uit die Nederlandse Geloofsbelydenis 24-25, die Heidelbergse Kategismus 62-64 en 88-90, die Dordtse Leerreëls 3-4.1. Wat leer jy oor die vraag of jy deur die wet of goeie werke gered kan word? Wat beteken dit vir jou? Wat vra dit van jou?
Eens op ’n tyd was ons ook dwaas en ongehoorsaam. Ons was verlei en verslaaf aan baie begeertes en allerlei bose plesiere. Ons het ons lewens deurgebring in boosheid en jaloesie. Ons was haatlik en het mekaar gehaat. Toe het die goedheid van God ons Verlosser en sy liefde vir mense verskyn. Hy het ons verlos, nie op grond van wat ons gedoen het vir ons vryspraak nie, maar slegs op grond van sy eie ontferming. Dit het Hy vermag deur die reiniging van die weergeboorte en deur die Heilige Gees wat ons vernuwe. Hy het die Gees ryklik op ons uitgestort op grond van wat Jesus Christus ons Verlosser gedoen het. Só is ons vrygespreek deur sy genade, en het ons erfgename geword van die ewige lewe waarop ons hoop. Hierdie boodskap is betroubaar. Daarom wil ek hê jy moet hierdie dinge met groot beslistheid handhaaf sodat hulle wat op God vertrou, hulle op goeie werke kan toespits, dit wil sê werke wat goed en voordelig vir mense is. (NLV)
1. Paulus verduidelik hier die hele weg van verlossing en heiliging. Dink weer ná oor hoe jy wederbaar en vernuwe is. Wat het in jou lewe verander?
2. Die hele punt van jou verlossing is dat jy jouself op goeie werke kan toespits, dinge wat goed en voordelig vir mense is. Wat vra dit van jou?
3. Lees die verse later vandag weer om jou te herinner aan die feit dat God jou gered het om jou op goeie werke toe te spits, dinge wat goed en voordelig vir mense is.
4. Jy kan later vanaand die gedeelte weer lees in die konteks van Titus 3 sowel as my bydrae daaroor: Titus 3:1-15 – Gesonde lewe.
My geliefdes, julle was altyd baie gehoorsaam toe ek by julle was. Noudat ek weg is, moet julle nog meer gehoorsaam wees. Vol ontsag en eerbied vir God moet julle voortgaan om aan julle verlossing gestalte te gee. Dis mos God wat die gewilligheid en die vermoë in julle bewerk om te handel volgens wat Hy graag wil hê! (NLV)
1. God roep ons om aan ons verlossing gestalte te gee. Wat beteken dit en hoekom is dit nodig?
2. Hoe bewerk God die gewilligheid en vermoë in ons lewe om te handel soos Hy graag wil hê? Wat doen God en wat doen ons?
3. Lees die verse later vandag weer om jou te herinner aan God wat jou die gewilligheid en vermoë gee om aan jou verlossing gestalte te gee.
4. Jy kan later vanaand die gedeelte weer lees in die konteks van Filippense 2 sowel as my bydrae daaroor: Filippense 2:5-30 – Jesus se selfontlediging inspireer ons as ligdraers in die wêreld.
Julle is die sout wat die aarde ’n beter plek moet maak. Maar as die sout verslaan het, kry jy dit op geen manier weer sout nie. Dit is totaal onbruikbaar. Al waarvoor dit goed is, is om buite op die straat uitgegooi en deur die mense platgetrap te word. Julle is die lig wat die wêreld moet verlig. ’n Stad wat bo-op ’n berg lê, kan mos nie weggesteek word nie! ’n Mens steek ook nie ’n lamp op en maak dit onder ’n emmer toe nie. Inteendeel! Jy sit dit bo-op ’n lampstaander. Dan maak dit lig vir almal in die huis. Julle moet so voorbeeldig lewe dat julle ’n helder lig sal laat uitstraal. Dan sal die mense dit sien en julle hemelse Vader daarvoor prys! (NLV)
1. Jesus gebruik hier twee basiese metafore om ons rol in die wêreld te beskryf. Dink na oor wat elkeen van die metafore prakties van jou vra.
2. Hoe verskil ‘n voorbeeldige lewe van ‘n lewe waarin die wet nagekom word? Dink veral aan die Tien Gebooie.
3. Lees die verse later vandag weer om jou te herinner daaraan dat God jou verlos het om voorbeeldig te lewe sodat mense dit kan sien en jou hemelse Vader daarvoor kan prys.
4. Jy kan later vanaand die verse weer lees in die konteks van Matteus 5 en my bydrae daaroor: Matteus 5 – Jesus fokus op die stryd vir geregtigheid.
Ons wat van geboorte Jode is en nie sondaars uit die nie-Joodse nasies nie, weet dat niemand deur die wet te onderhou deur God vrygespreek word nie. Net deur die geloof in Jesus Christus kan dit gebeur! Selfs ons het tot geloof in Christus Jesus gekom sodat ons deur geloof, en nie omdat ons die wet onderhou nie, deur God vrygespreek kan word. Niemand sal mos deur die wet te onderhou deur God vrygespreek word nie! (NLV)
1. Paulus is duidelik daaroor niemand God tevrede kan stel deur die wet na te kom of goeie werke te doen nie. Dit is net deur geloof wat ons vrygespreek word. Hoe laat dit jou voel?
2. Watter rol speel die wet of goeie werke dan in jou lewe?
3. Lees die verse later vandag weer om jou te herinner aan die feit dat God jou vrygespreek het sonder dat jy die wet in alle opsigte onderhou.
4. Jy kan later vanaand die verse weer in die konteks van Galasiërs 2 lees en my bydrae daaroor: Galasiërs 1-2 – om met vertroue, verwagting en volharding te leef.
Onlangse kommentaar