Tag: Wie is God?

Dink aan die vrou van Lot!

Jesus is besig om met sy dissipels te gesels oor die koninkryk van God. Veral oor die feit dat daar dae gaan kom wat hulle verlang daarna dat die koninkryk sal aanbreek. Wat hulle die nuwe hemel en aarde sal wil beleef.

• Dit sal dae wees waarin hulle baie valse berigte oor Hom sal hoor. Dat mense ‘n valse idee van die Here Jesus sal skep en ander só sal leer. En hulle sal verlang daarna dat die waarheid sal seëvier.
• Dit sal dae wees waarin hulle sal dit sal beleef dat baie mense die Here sal verwerp soos in die dae van Noag en die dae van Lot. Dat mense die rug sal keer op God en sy gebod, en sal leef soos hulle wil. En hulle sal verlang daarna dat die afvalligheid tot ‘n einde sal kom.

Jesus stel hulle gerus met twee voorbeelde uit die verlede. Hulle kan moed skep uit die tyd van Noag en die tyd van Lot.

• Die afvalligheid in die tyd van Noag is kort geknip deur die sondvloed waar die bekende wêreld deur water vernietig is.
• Die afvalligheid in die tyd van Sodom en Gomorra is kort geknip deur die vuur en swael wat van die hemel neergereën het en die vier stede daar by die Dooie See vernietig het.

Nie dat dit maklik sal wees nie, want die einde sal kom met toestande wat sal herinner aan die tyd van Noag en die tyd van Lot.

Hulle moet volhard in geloof, want: “Elkeen wat probeer om sy lewe te red, sal dit verloor; en elkeen wat dit verloor, sal dit behou.” En Jesus herinner hulle aan Lot se vrou wat in ‘n soutpilaar verander het toe sy teruggedraai het na dít wat sy reeds agter gelaat het.

Jesus waarsku die dissipels. Moenie met verlange terugdraai na die genot van die wêreld nie, want dan sal jy die koninkryk mis. Wanneer die Seun van die mens kom, sal Hy die skape van die bokke skei, selfs al slaap hulle saam op een bed of werk hulle skouer aan skouer by die meul. Die een sal saamgeneem word en die ander een agtergelaat word.

Jesus maak dit duidelik dat ewige lewe afhanklik daarvan is of ons gereed sal wees by sy koms.

“Dink aan die vrou van Lot!”

Die gelykenis van die weduwee en die regter

Maar waarmee Jesus hulle veral wil bemoedig is om aan te hou bid, nie maar net vir hulleself nie, maar vir die koms van die koninkryk.

Dit is waarom Hy die gelykenis van die onregverdige regter vertel.

1. Lees die Dordtse Leerreëls. Wat leer jy oor gebed? Wat beteken dit vir jou? Wat vra dit van jou?

Toe het Jesus hierdie gelykenis vertel met die oog op sommige mense wat oortuig is dat hulle saak voor God reg is, maar die ander mense verag het: “Twee mense het na die tempel toe gegaan om te bid. Die een was ’n Fariseër en die ander ’n tollenaar. Die Fariseër het gaan staan en by homself gebid: ‘O God, ek is dankbaar teenoor U dat ek nie soos die ander mense is nie – diewe, onregverdiges, ontugtiges of ook soos hierdie tollenaar. Ek vas twee keer gedurende die week, en ek gee ’n tiende van alles wat ek verdien!’ “Die tollenaar het op ’n afstand bly staan en wou selfs nie na die hemel opkyk nie. Hy het vol skuldbesef op sy bors geslaan en gesê: ‘O God, wees my, sondaar, genadig!’ “Ek sê vir julle: Hierdie man, eerder as die eerste een, gaan huis toe as iemand wie se saak met God reg is. Elkeen wat homself verhef bo ander, sal verneder word, maar hy wat homself nederig ag, sal verhoog word.” (NLV)

1. Jesus het so pas die gelykenis van die onregverdige regter vertel om die dissipels aan te moedig om te volhard in gebed (Luk 18:1-8). Hier vertel hy die gelykenis van die Fariseër en die tollenaar wat oor nederigheid in gebed gaan. Hoekom dink jy doen Jesus dit?

2. Jesus wil die dissipels leer dat volharding in gebed en veral ‘n antwoord op gebed nie tot selfverheffing en veragtig van ander moet lei nie. Hoe kan jy seker maak dat jy steeds nederig in gebed bly?

3. Lees die verse later vandag weer om jou te herinner daaraan dat dit net God is, en dít uit genade, wat jou gebede kan verhoor.

4. Jy kan later vanaand die gedeelte weer lees in die konteks van Lukas 18 sowel as my bydrae daaroor: Lukas 18:1-19:44 – God is meer as gewillig om gebede te beantwoord.

Vroegdag op pad terug na Jerusalem het Jesus honger geword en ’n enkele vyeboom langs die pad sien staan. Hy gaan toe na die boom, maar al wat Hy daaraan gekry het, was blare. Hy sê toe vir die boom: “Mag jy nooit weer vrugte dra nie!” Die boom het onmiddellik totaal verskrompel. Jesus het hulle geantwoord: “Ek verseker julle dat as julle glo en nie twyfel nie, julle nie net dieselfde sal kan doen nie, maar baie meer. Julle sal selfs vir hierdie berg kan sê: ‘God sal jou oplig en in die see gooi,’ en dit sal so gebeur. Alles wat julle in die gebed van God vra, sal julle ontvang, mits julle glo.” (NLV)

1. Jesus soek verniet “ontbyt” by ’n vyeboom, maar tevergeefs.  Hy gebruik die verdroging van die vyeboom om die dissipels iets te leer oor die krag van geloof in die uitvoering van hulle roeping: “Alles wat julle in die gebed vra, sal julle ontvang as julle glo.” Hoe bemoedig dit jou in die uitvoering van jou roeping?

2. Daar is ook ’n duidelike simboliese betekenis in die verhaal, want die vervloeking van die vyeboom is ook ’n inleiding tot sy gesprek met die Joodse leiers wat net hierna volg en waarin Hy hulle leweloosheid aan die kaak sal stel.  Jesus het gekom om die vrug van die Joodse vyeboom te geniet, maar verniet. Daarom praat Hy met hulle oor sy gesag en die noodsaak van gehoorsaamheid en geloof. Kan jy aan parallelle dink vandag?

3. Lees die verse later vandag weer om jou te herinner aan die krag van geloof in die gehoorsaamheid aan jou roeping.

4. Jy kan later vanaand die verse weer lees in die konteks van Matteus 21 en my bydrae daaroor: Matteus 21 – Jesus het ’n groot impak op Jerusalem en die Joodse leiers.

Doen alles deur gebed en smeking. Laat die Gees julle elke keer in die gebed lei. Bly in alle omstandighede op julle hoede en bid vir almal wat aan God behoort. Bid ook vir my, dat wanneer ek moet praat, woorde aan my gegee sal word om met vrymoedigheid die geheime plan van die Goeie Nuus bekend te maak. As ambassadeur van hierdie Goeie Nuus is ek in boeie. Bid dat ek, soos dit hoort, die Goeie Nuus met vrymoedigheid sal verkondig. (NLV)

1. Paulus sluit sy beskrywing van die wapenrusting van die gelowige in geestelike oorlogvoering met die allergrootste wapen: gebed. Let op hoe dit gedoen word. Wat leer jy daaruit?

2. Paulus is helder daaroor dat gebed persoonlik en in alle omstandighede is, maar dat dit ook moet insluit die gebed vir almal wat betrokke is om die evangelie te verkondig. Hoe kan jy meer gereeld daarby inskakel?

3. Lees die verse later vandag weer om jou te herinner dat gebed ons grootste wapen in alle omstandighede is.

4. Jy kan later vanaand die gedeelte weer lees in die konteks van Efesiërs 6 sowel as my bydrae daaroor: Efesiërs 6:10-24 – Soek julle krag in die Here en in sy groot mag.