Tag: Wie is God?

Eendag ná Jesus alleen in gebed was, het Hy na sy dissipels gekom en gevra: “Wie sê die mense is Ek?” “Wel,” het hulle geantwoord, “sommige sê Johannes die Doper, sommige sê Elia, en ander sê U is een van die vroeëre profete wat uit die dood opgestaan het.” Toe vra Hy vir hulle: “Wie, sê julle, is Ek?” Petrus het geantwoord: “U is die Messias wat deur God gestuur is!” Jesus het hulle gewaarsku om dit vir niemand te vertel nie. “Want Ek, die Seun van die Mens, moet baie dinge ly,” het Hy gesê. “Ek sal deur die familiehoofde, die priesterhoofde en die skrifkenners verwerp word. Ek sal doodgemaak word, maar drie dae later sal Ek uit die dood opgewek word.” (NLV)

Dit is opvallend hoe ‘n belangrike rol gebed speel in Jesus se lewe. Hy bid byvoorbeeld by elke belangrike wending in sy bediening. Hy vertrek na ‘n eensame plek net voor die roeping van eerste dissipels en die uitbreiding van sy bediening in Galilea (Luk 4:42). Hy bid voor die keuse van die 12 dissipels en die lewering van die bergrede (Luk 6:12). Hy bid soms alleen terwyl sy dissipels by Hom is sodat hulle kan leer by Hom (Luk 9:18). Hy bid op die berg van verheerliking en net voor Hy die pad na Jerusalem aandurf en die 72 sendelinge uitstuur (Luk 9:28). Hy bid selfs net voor sy onderrig oor gebed (Luk 11:1). Hy bid ‘n laaste keer op die Olyfberg (Getsemane) net voor die kruisiging (Luk 22:30).

1. Wat leer jy hieruit?

2. Jesus begin al hoe meer op die 12 fokus. Die tyd het vir Jesus aangebreek om sy dissipels in te lei in sy ware identiteit en die doel van Sy koms na die aarde.  Die tyd was ryp vir hulle (en Hom) dat Hy Hom kan gee vir sy verwerping, kruisdood, en opstanding.  Daarom begin Hy met hulle daaroor gesels. Wat leer jy hieruit?

3. Lees die verse later vandag weer om jou te herinner dat dit net deur gebed is wat jy jou ware identiteit en roeping as kind van God kan verstaan en uitleef.

4. Jy kan later vanaand die gedeelte weer lees in die konteks van Lukas 9 sowel as my bydrae daaroor: Lukas 9:1-50 – God is getrou om ons alles te gee wat ons in die bediening nodig het.

Eendag kort hierna het Jesus na ’n berg gegaan om te bid, en Hy het die hele nag in gebed deurgebring. Teen dagbreek het Hy al sy dissipels bymekaargeroep en twaalf van hulle gekies om apostels te wees. Hier is hulle name: (NLV)

Geen beweging van waarde het nog ooit ontstaan sonder dat daar nie ’n groepie dissipels was wat ingelei kon word in die boodskap en draers daarvan kon word nie.  Jesus het dit geweet en optimaal benut.  Daarom sonder Hy Homself af, bid, en kies dan twaalf wat by Hom kan leer en uiteindelik die impak van Jesus se evangelie kan vermenigvuldig.

1. Wat sê dit vir jou van jou verhouding met Jesus?

2. Wat sê dit vir jou van jou eie bediening of roeping?

3. Lees die verse later vandag weer om jou te herinner aan die rol van gebed in die uitleef van jou roeping.

4. Jy kan later vanaand die verse weer in die konteks van Lukas 6 lees en my bydrae daaroor: Lukas 6:1-49 – Luister en Leef.

1) laat u Naam geheilig word.

2) Laat u koninkryk kom.

3) Laat u wil hier op aarde uitgevoer word soos in die hemel.

4) Gee ons die porsie brood wat ons vir vandag nodig het.

5) En vergeef ons ons sondeskuld soos ons ook óns skuldenaars vergewe het.

6) Bewaar ons sodat ons nie aan verleiding sal toegee nie; maar bevry ons van die greep van die Bose. (NLV)

1. Hierdie gebed is die kosbaarste geskenk wat ons van die Here af ontvang het. Dink ná oor wat die eerste drietal bedes oor God sê. Wat beteken elkeen van hulle?

2. Dink na oor wat die tweede drietal bedes oor ons sê. Wat beteken elkeen van hulle?

3. Lees die verse later vandag weer om dit te memoriseer (in ‘n vertaling wat vir jou werk) en ‘n daaglikse deel van jou gebed te maak.

4. Jy kan later vanaand die gedeelte weer lees in die konteks van Matteus 6 sowel as my bydrae daaroor: Matteus 6 – Jesus fokus op die lewe van geregtigheid.

1. Wat is die Ons Vader?

2. Lees die NLV se weergawe en oordink dit.

 Bid dan soos volg: Ons Vader in die hemel,

1) laat u Naam geheilig word.

2) Laat u koninkryk kom.

3) Laat u wil hier op aarde uitgevoer word soos in die hemel.

4) Gee ons die porsie brood wat ons vir vandag nodig het.

5) En vergeef ons ons sondeskuld soos ons ook óns skuldenaars vergewe het.

6) Bewaar ons sodat ons nie aan verleiding sal toegee nie; maar bevry ons van die greep van die Bose. (Matteus 6:9-13; vgl Lukas 11:2-4).

3. Lees die lering van Jesus oor gebed aan die dissipels in Lukas 11:5-13. Wat tref jou?

4. Wat is die doel van hierdie gelykenis?

5. Hoe help hierdie twee stukkies agtergrond jou om die gelykenis beter te verstaan: 1) In die Midde-Oosterse kultuur van gasvryheid is daar verwag dat gashere hul gaste moes kos gee. 2) In ‘n huis waar daar net een kamer vir slaapplek was – gewoonlik slegs ‘n hoër platform op die grondvloer – sou die hele gesin gesteur word as die pa opstaan om te help.

6. Wat dink jy bedoel Jesus met die idee van gebed as “onbeskaamdheid”?

7. Watter prentjie skets hierdie gelykenis vir jou van God? Hoe help dit jou om met meer verwagting te bid?

8. Sal God regtig vir jou enigiets gee wat jy vra, soek of voor klop?

9. Waarom sluit Jesus die gebed af met die verwysing na die gawe van die Heilige Gees?

10. Sluit af deur die Ons Vader te bid in jou eie woorde.

Salomo het so pas die tempel voltooi en God se teenwoordigheid het die tempel gevul (2 Kron 3-5). Hy volg dit op met twee gesprekke. Die eerste gesprek is ‘n toespraak gerig aan die volk (2 Kron 6:1-11). Die ander gesprek is ’n gebed gerig aan die Here (2 Kron 6:12-42). Daarmee plaas Salomo gebed sentraal in die verhouding met God, iets wat selfs vir die vreemdelinge sal geld.

Lees die twee hoofstukke deur in die Bybel en dink eers ná oor wat die Here daardeur vir jou sê. Dan kan jy nadink oor die paar opmerkings oor gebed wat ek hier gee.