Tag: Jesus se geboorte en kinderjare

Ons sluit ons leeswerk van Jesus se geboorte en kinderjare af met die laaste verhaal wat vir ons opgeteken is van Jesus voor Hy met sy bediening begin het. Dankie vir die saamlees! Môre begin ons met die reeks: Bid die Psalms 2026.

Die volgende gebeure vind plaas wanneer Jesus 12 jaar oud is, dws ongeveer 7 nC (onthou daar is nie ‘n jaar zero nie). Jesus gaan vir die Paasfees na Jerusalem soos hulle familie se gewoonte was. Dit is immers wat die wet gevra het dat die Paasfees in Jerusalem gevier word (Deut 16).

Jesus was dus al ‘n hele paar keer daar. Dit is ongeveer Jesus se tiende keer wat Hy die Paasfees in Jerusalem vier as ‘n mens die versigtigheid vir Herodes, en die gevolglike tyd in Egipte in ag neem. Hulle het uiteraard die Paasfees wel by die huis gevier, soos dit van gelowiges verwag is as hulle nie in Jerusalem kon uitkom nie (vgl Eks 12-13 waar die eerste Paasfees in die woestyn gehou is).

⁴¹En sy ouers was gewoond om elke jaar na Jerusalem toe te gaan vir die Paasfees.

⁴²En toe Hy twaalf jaar geword het, het hulle weer opgegaan volgens die gebruik van die fees,

⁴³en nadat hulle die feesdae daar deurgebring het, en terwyl hulle teruggekeer het, het die Seun Jesus agtergebly in Jerusalem, maar sy ouers het dit nie geweet nie.

⁴⁴En omdat hulle gedink het dat Hy onder die groep reisigers was, het hulle ’n dagreis ver gegaan, en het Hom toe begin soek onder die familie en bekendes,

⁴⁵en toe hulle Hom nie kry nie, het hulle na Jerusalem teruggekeer op soek na Hom.

⁴⁶En dit het gebeur na drie dae dat hulle Hom gekry het in die tempel waar Hy tussen die leraars sit, besig om na hulle te luister en hulle vrae te vra.

⁴⁷En almal wat Hom gehoor het, was verstom oor sy insig en antwoorde.

⁴⁸En toe hulle Hom sien, was hulle stomgeslaan, en sy moeder het vir Hom gesê: “Kind, hoekom het jy so met ons gemaak? Kyk, jou vader en ek was vreeslik bekommerd en het jou gesoek.”

⁴⁹Maar Hy het vir hulle gesê: “Hoekom is dit dat julle na My gesoek het? Het julle nie geweet dat Ek in die huis van my Vader moet wees nie?”

⁵⁰En hulle het nie die woord verstaan wat Hy vir hulle gesê het nie.

⁵¹En Hy het afgegaan saam met hulle en by Nasaret gekom. En Hy was onderdanig aan hulle. En sy moeder het al die gebeure in haar hart bewaar.

⁵²En Jesus het toegeneem in wysheid en liggaamsgrootte en in guns by God en die mense.

Lukas vertel nie vir ons van die tyd wat Josef-hulle in Egipte deurgebring het nie, en fokus slegs op die feit dat die gesin na hulle oorspronklike dorp, Nasaret, terugkeer. Hy sluit wel die verhaal van die besoek aan die tempel met Paasfees in toe Jesus twaalf jaar oud was. Hy wil daarmee fokus op die hele gesin se nakoming van die wet en die geestelike groei wat daar by Jesus kom en wat deur almal erken word, ook deur die leraars in die tempel.

³⁹En toe hulle alles afgehandel het wat die wet van die Heer vereis, het hulle teruggekeer na Galilea, na hulle eie dorp Nasaret.

⁴⁰En die Kind het gegroei en sterk geword en was vol wysheid, en die genade van God was op Hom.

²²Maar toe hy hoor dat Argelaos koning van Judea is in die plek van sy vader, Herodes, was hy bang om daarheen te gaan. En nadat hy in ’n droom gewaarsku is, het hy vertrek na die gebied van Galilea.

²³En daar aangekom, het hy gaan woon in ’n dorp met die naam Nasaret. So is vervul wat deur die profete gesê is dat Hy ’n Nasarener genoem sal word.

¹⁹Toe Herodes gesterf het, verskyn daar ’n engel van die Here in ’n droom aan Josef in Egipte

²⁰en sê: “Staan op en neem die Kind en sy moeder saam en gaan na die land Israel, want die mense wat die Kind se lewe gesoek het, is dood.”

²¹Hy het toe opgestaan en die Kind en sy moeder saamgeneem en na die land Israel gegaan.

¹⁶Toe Herodes uitvind dat hy deur die sterrekundiges om die bos gelei is, het hy baie kwaad geword, en hy het opdrag gegee dat in Betlehem en al sy streke al die seuns van twee jaar en minder om die lewe gebring word, volgens die tyd wat hy by die sterrekundiges vasgestel het.

¹⁷Toe is vervul wat deur Jeremia die profeet gesê is:

¹⁸“’n Stem is in Rama gehoor,

’n gehuil en groot geweeklaag.

Ragel huil oor haar kinders,

en wil nie getroos word nie,

omdat hulle nie meer daar is nie.” (Jer 31:15)