Tag: Wie is God?

Die woord van die Here is waarheid, en alles wat Hy doen, staan vas. Hy het regverdigheid en reg lief, en sy troue liefde vul die aarde. Deur die woord van die Here is die hemele geskape; en deur sy woord al die hemelliggame. Hy stel grense vir die see, in die diepwaters versamel Hy hulle. Laat elkeen op die aarde die Here dien. Laat die inwoners van die wêreld ontsag hê vir Hom. Want Hy het gepraat, en dit was daar; Hy het beveel, en dit was so. (NLV)

1. Onderstreep al die eienskappe van God se woord, wese en werke. Dit is regtig omvattend. Dit sluit ‘n boodskap aan alle nasies in. Wat staan vir jou uit?

2. Hoe laat hierdie teks jou anders dink en voel? Wat vra dit van jou?

3. Lees die verse later vandag weer om jou te herinner aan God se omvattende voorsiening vir jou.

4. Jy kan later vanaand die gedeelte weer lees in die konteks van Psalm 33 sowel as my bydrae daaroor: Psalm 25 + 33 – God sorg vir dié wat Hom vertrou. (Psalm 25 is ‘n bonus. Dit is Psalm 33 se tweeling-Psalm, omdat albei oor vertroue gaan.)

Heel aan die begin het die Woord reeds bestaan. Die Woord was by God, en die Woord was self God. Hy was reeds in die begin by God. Alles het deur Hom ontstaan, en sonder Hom het nie een ding wat bestaan, ontstaan nie. In Hom was daar lewe, en dié lewe het gedien as die lig vir die mense. Die lig skyn in die duisternis, ja – die duisternis het dit nie uitgedoof nie! (NLV)

1. Johannes verbind die skepping aan die Genesis-verhaal wat God se goeie skepping en oorvloedige voorsiening verheerlik. Hoe hou dit verband met Jesus Christus?

2. Jesus Christus word hier as God beskryf – “die Woord het mens geword en onder ons kom woon” (1:14). Watter troos hou die beskrywings van Hom as lewe en lig vir jou in? Watter hoop hou dit vir hierdie wêreld in?

3. Lees die verse later vandag weer om jou te herinner aan die lewe en lig wat die Here Jesus vir jou gee.

4. Jy kan later vanaand die gedeelte weer lees in die konteks van Johannes 1 en my bydraes daaroor: Johannes 1:1–18 – Die genade en waarheid van Jesus sluit die lewe oop.

In die begin het God die ganse heelal geskep, die hemel daarbo en die aarde hieronder. God het na sy handewerk gekyk en dit was uitstekend goed. (NLV)

1. Hierdie beskrywings van God se skepping is fundamenteel. Wat staan vir jou uit daarvan? Hoe laat dit jou anders dink oor hierdie wêreld? En oor jouself?

2. Die beskrywings van God se goeie skepping lei ‘n mens tot verwondering en lofprysing. Loof God dat Hy alles goed gemaak het.

3. Lees die verse later vandag weer om jou aan die wonder van die skepping te herinner. Gaan stap langs die see, of in die veld, of kyk ‘n natuurprogram op TV, of luister ‘n bruisende lied wat jou gedagtes op God kan fokus.

4. Jy kan later vanaand die verse weer lees in die konteks van Genesis 1 sowel as my bydrae daaroor: Genesis 1:1-2:3 – In die begin het God die hemel en die aarde geskep.

1. Hoe dink jy oor die hele Skepping? Die oorsaak en oorsprong van alles. Die doel en bestemming. Die betekenis daarvan.

2. Lees my antwoord en oordink dit.

God het alles wat bestaan goed gemaak deur sy woord. Hy laat niks aan toeval of geluk oor nie. Hy onderhou en regeer my deur sy ewige raad en voorsienigheid om volgens sy heilige wil te floreer. Niks gebeur in hierdie wêreld sonder sy beskikking nie. Ek kan in alle teëspoed geduldig en in alle voorspoed dankbaar wees.

3. Hoe verryk hierdie beskrywings jou gedagtes oor die skepping? Hoe laat dit jou voel?

4. Lees Jesus se omvattende belofte in Matteus 6:25-34. Wat tref jou?

5. Lees my opsomming van die boodskap daarvan en oordink dit.

God het alles gemaak wat ons kan sien. Selfs dit wat ons nie kan sien nie. Hy het dit goed gemaak en sorg vir alles. Dit sien ons in die voëls wat kos kry al saai en oes hulle nie. Ons is nog baie kosbaarder vir God as hulle. Ons sien dit ook in die veldlelies wat nie vir hulleself klere maak nie, maar tog so mooi aangetrek is. Ons kan God vertrou dat Hy ook vir ons sal sorg. Soos ons vir God lewe, gee Hy vir ons wat ons nodig het. Hy laat niks aan toeval of geluk oor nie.

6. Wat maak jou opgewonde van God se voorsiening? Loof die Here dat Hy niks aan toeval of geluk oorlaat nie.