Skip to main content

Job 36-37 – Elihu 4: God se grootheid nooi ons uit om Hom te dien

Job-in-Despair - van "Drawings-for-the-Bible" deur Marc Chagall gepubliseer deur Verve.
Job-in-Despair – van “Drawings-for-the-Bible” deur Marc Chagall gepubliseer deur Verve.

Elihu sluit sy gesprek met Job en die drie vriende af met ‘n vierde en omvattende toespraak.  In ‘n meer tegemoetkomende toon begrond hy God se regverdigheid in sy skeppingsmag en voorsienigheid (36:1-15).  Hy moedig Job aan om God se uitnodiging te aanvaar om die gevaar van sy gegriefdheid te vermy, nl. om in sonde te verval, deur op God self en sy grootheid te fokus en God se werk te bly roem (36:16-25).  Hy vervolg deur God se grootheid in ‘n aantal skeppingswonders aan Job bekend te stel (36:26-37:13) en só Job uit te nooi en te motiveer om God te bly dien (37:14-24).

Continue reading

Job 38-39 – Wie is dit wat my bedoelinge dwarsboom?

Job-in-Despair - van "Drawings-for-the-Bible" deur Marc Chagall gepubliseer deur Verve.
Job-in-Despair – van “Drawings-for-the-Bible” deur Marc Chagall gepubliseer deur Verve.

Oorsig

Uiteindelik antwoord die Here vir Job uit ‘n stormwind, presies soos Elihu voorspel het (37:13).  En God se antwoord is ‘n vraag: “Wie is dit wat besig is om my bedoelinge te dwarsboom met woorde wat getuig dat hy geen insig het nie?” (38:2).  ‘n Vraag waarop Job uiteindelik moet antwoord: “Wie is dit wat u bedoelinge wou dwarsboom sonder dat hy die insig gehad het?  Ek het oor dinge gepraat wat ek nie begryp het nie.”  (42:3).

God se bedoelinge moet dus in ons lewe sigbaar raak.  Die vraag na geregtigheid is nie ‘n vraag wat ‘n aparte antwoord nodig het nie. Dit is ingebou in God se bedoelinge.  Hy staan daarvoor in.

Ons kan egter God se bedoelinge dwarsboom deur op meer insig aanspraak te maak as wat vir ons beskore is.  Ons moet Hom toelaat om God te wees en saam met Hom vreugde vind in sy werke, en uiteindelik in God self, in die verhouding met Hom.

Continue reading

Job 40-42:6 – Ek het oor dinge gepraat wat ek nie begryp het nie

Job-in-Despair - van "Drawings-for-the-Bible" deur Marc Chagall gepubliseer deur Verve.
Job-in-Despair – van “Drawings-for-the-Bible” deur Marc Chagall gepubliseer deur Verve.

Die Here praat weer met Job uit die stormwind en nooi hom uit om met God kragte te meet. Met ‘n reeks van vier vrae oor Job se bevraagtekening van God se beslissing (40:3-4), dek die Here die tafel vir sy verdere sélf openbaring in hoofstuk 40 met die beskrywing van die krag van die Behemot (40:10-19 – seekoei) en die Leviatan (40:20-28 – seedraak [krokodil]).

Hulle word beskryf in terme van hulle ontwerp wat ontsag by almal afdwing, nie net vir die diere self nie, maar vir die Een wat hulle gemaak het.  Twee keer nooi die Here Job uit om sy eie mag ten toon te stel, eerstens teenoor die goddeloses wat hy só graag wil aanvat en regsien (40:5-9), en tweedens teenoor die Leviatan wat duidelik ver bo Job se liga is (40:27-28).

Dit word opgevolg in  hoofstuk 41 met twee retoriese vrae en ‘n stellige uitspraak wat as’t ware aan almal gerig is wat hierna luister: “Wie wil dan nog teen My stand hou?  Wie wil aan My eise stel dat Ek iets aan hom verskuldig is?  Alles onder die hemel behoort aan My.” (41:1-2).

Die Here kan Homself skaars keer om te spog met die krag van die Leviatan en sê: “Ek wil nog verder praat oor die Leviatan, oor sy krag en sy liggaamsbou.” (41:3).  Ná hy weereens die Leviatan se krag met ‘n reeks van drie vrae geïllustreer het (41:4-5), wy die Here uitvoerig uit oor die ontsagwekkende bou en vermoë van die Leviatan, ‘n dier wat mitologiese en moontlik selfs simboliese trekke begin vertoon (41:6-25).

Job reageer daarop met ‘n diep bewondering vir die mag van die Here en kom tot inkeer voor dié God wat kan uitvoer wat Hy besluit (42:1-6): “Ek het oor dinge gepraat wat ek nie begryp het nie.” (42:3).

Continue reading

Job 42:7-17 – Die Here verander die omstandighede van Job

Job-in-Despair - van "Drawings-for-the-Bible" deur Marc Chagall gepubliseer deur Verve.
Job-in-Despair – van “Drawings-for-the-Bible” deur Marc Chagall gepubliseer deur Verve.

Hierdie laaste hoofstuk vorm eintlik die sesde en sewende toneel van die prosa vertelling wat reeds in hoofstuk 1-2 aan die orde gestel is.  Dáár was vyf tonele wat  afwisselend uit Job en God se perspektief geskryf is.  Hier kom dié twee wêrelde bymekaar en praat God direk met Job se drie vriende – nogal ‘n bonus vir hulle! – en verander hulle almal se lot.  God gebruik nie net vir Job om versoening vir sy drie vriende te doen nie (42:7-9), maar verander ook sy situasie heeltemal (42:10-17).

Continue reading

Gesprek met God bring bevryding

As Job in sak en as sit oor sy kinders en sy ellende, hoor hy sy vriend Elifas sê:

“Roep maar! Niemand sal jou antwoord nie. Is daar selfs ’n engel na wie jy jou sou kon wend om hulp? Verbitterdheid maak ’n dwaas dood, onbeheerstheid vernietig ‘n onverstandige.” (Job 5:1-2).

Het iemand al só met jou gepraat in jou ellende?

Job-in-Despair – van “Drawings-for-the-Bible” deur Marc Chagall gepubliseer deur Verve.

Leer dan by Job hoe ‘n mens dit hanteer.

Job het sy vriend Elifas goed geken. Hy het geweet – soos ons in die drie rondtes van gesprek deur die boek agterkom – dat Elifas graag “God speel” en homself aanmatig om sy eie woorde as dié van God te beskou, begrond net op sy eie ervaring van die lewe.

Elifas sê hier in Job 5 dat op grond van sy eie ervaring dit sy oorwoë mening is dat om teen God te kla nie bevryding sal bring nie (vers 1), maar dat só ‘n dwaas homself deur ongeduld teenoor God net groter onheil sal bring (vers 2). Hy is vernuftig om hierdie ongeduld as beide ‘n innerlike gedagte (verbitterdheid) as ‘n uiterlike gedrag (onbeheerstheid) uit te spel. Dit klink so geleerd. So goddelik.

Maar Job antwoord vir Elifas direk in Job 6:2 en sê dat Elifas nie eers naastenby sy bittere ellende verstaan nie. Dit gaan baie dieper as wat Elifas sal verstaan:

“As my bittere ellende maar geweeg kon word, as die ongeluk wat my getref het, op ’n skaal gesit kon word, sou dit swaarder weeg as die sand van die see.” (Job 6:2-3).

En in vers 11 te sê ek het nou genoeg geluister na jou dwase praatjies, ek praat nou met die Here:

“Is ek dan die see dat U my aan bande wil lê …” (Job 7:12).

En anders as wat Elifas voorspel het, bring Job se gesprek met God uiteindelik bevryding soos ons aan die einde van die boek raaksien:

“Die Here het die omstandighede van Job verander en hom twee keer soveel gegee as wat hy gehad het.” (Job 42:10).

Elifas was dus heeltemal verkeerd in sy perspektief op die lewe, op Job, en op God. Job was reg, want deur by die regte adres sy klag uit te stort, het dit bevryding vir hom, en ironies genoeg, ook vir sy vriende gebring. In opdrag van die Here het “sy dienaar” Job vir hulle gebid. Dit is Job se gebed wat die Here verhoor het, sodat God hulle nie gestraf het vir hulle dwaasheid nie (Job 42:8).

Versigtig dus om God te speel in iemand anders se pyn en ellende.
En as jy sulke mense in jou lewe het, wat probeer om God te speel in jou lewe, hanteer dit soos Job. Net God is God, en deur sy Woord en Gees, sal Hy jou tot groter insig bring oor wat in jou lewe aan die gang is. Hy sal jou bevry en in sy seën rus gee.

Gesprek met God bring bevryding

Onlangse kommentaar