2 Timoteus 3:1-17 – Getrou aan die Woord

3:1-9 – Die laaste dae waarin Timoteus leef

Let op hoe Paulus hier van die laaste dae praat (1 Tim 4), maar dit uitspel in terme van dinge wat in sy eie tyd en dié van Timoteus gebeur.  Timoteus moet hom afskei van sulke mense, wat duidelik maak dat hulle in die laaste dae lewe, soos Lukas alreeds gesê het (Hand 2:16-17).  Om die waarheid te sê, dié tipe dinge is van die tyd van Moses al met ons, soos hy met die voorbeeld van die opstand van Jannes en Jambes verduidelik.  Die intensiteit en algemeenheid daarvan het net toegeneem.

Jannes en Jambres was volgens die Joodse tradisie twee broers, albei towenaars, wat deur die farao ingeroep is om Moses en Aäron, teen te staan (Eks 7:10–12).  Nog ‘n Joodse tradisie verbind hulle ook met die twee amptenare wat met Bileam saamgewerk het (Num 22:22).

In wese is die probleem van dwase mense dat hulle lewens om hulleself draai en nie om God nie.  Die liefde vir jouself maak jou selfsugtig, geldgierig, grootpraterig, verwaand, beledigend, ongehoorsaam aan jou ouers, ondankbaar en ongodsdienstig.  Dit maak mense verder liefdeloos, onversoenlik, kwaadpraters, bandeloos, wreed, sonder liefde vir die goeie, verraaiers, roekeloses en hooghartig.

3:10-17 – Bly in wat jy geleer het en vas glo

Daar is maar een manier om die suigkrag van selfsug vry te spring, en dit is om op God en sy Woord te fokus.  Dit is dié fokus wat ook Timoteus die krag gee om in vervolging, wat ‘n normale deel van die pad met die Here is, vas te staan.

Die waarde van die Skrifwoord (in die eerste plek die OT, maar kan op die hele Bybel van toepassing gemaak word) is velerlei: onderig in die waarheid, bestryding van dwaling, regstel van verkeerdhede, en die kweek van ‘n regte lewenswyse.  Dan sal ‘n mens volkome voorbereid wees en toegerus vir elke goeie werk.

Timoteus


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Maak 'n opmerking

%d bloggers like this: