Tag: Wie is God?

Toe Johannes besef hoeveel Fariseërs en Sadduseërs kom om deur hom gedoop te word, het hy hulle soos volg berispe: “Julle broeisel slange! Wie het julle wysgemaak dat julle God se dreigende oordeel kan vryspring? Bewys eerder deur julle voorbeeldige lewe dat julle werklik tot inkeer gekom het. En moet tog nie julleself mislei nie met die gedagte: ‘Ons is veilig. Ons is mos die nageslag van Abraham.’ Weet verseker, God kan selfs die klippe wat hier rondlê in kinders van Abraham verander. Die byl van God se oordeel lê al teen die bome se wortel, gereed om julle heeltemal uit te kap. God gaan elke boom wat nie gesonde vrugte dra nie, afkap en in die vuur gooi. Ek doop julle wel met water as teken van julle bekering. Maar ná my kom daar Iemand wat baie belangriker is as ek – soveel belangriker dat ek nie eers goed genoeg is om soos ’n slaaf sy sandale vir Hom aan te dra nie. Hy sal julle doop met die Heilige Gees en met vuur. Sy oesvurk is in sy hand en Hy sal sy dorsvloer deeglik skoonmaak. Hy sal sy koring in sy skuur bymekaarmaak, maar die kaf sal Hy in die vuur verbrand wat nooit geblus sal word nie. (NLV)

1. Johannes die Doper praat in dieselfde asem van die doop met die Heilige Gees en met vuur. Wat dink jy bedoel hy?

2. Die Heilige Gees is die Reinigende Vuur van God wat nie net nou gelowiges skoonmaak nie, maar uiteindelik ongelowiges in die ewige vuur sal verbrand. Hoe ervaar jy sy reinigende werk in jou lewe?

3. Lees die verse later vandag weer om jou te herinner aan die reinigende werk van die Heilige Gees in jou lewe en wy jou opnuut toe aan Hom.

4. Jy kan later vanaand die verse weer lees in die konteks van Matteus 3 en my bydrae daaroor: Matteus 3 – Jesus doop met die Heilige Gees en met vuur.

Nou is Ek op pad terug na Hom toe wat My gestuur het; tog vra niemand van julle vir My: ‘Waarheen gaan U?’ nie. Omdat Ek dit egter vir julle gesê het, het hartseer julle harte oorweldig. Laat Ek julle egter die waarheid vertel: Dit is tot julle voordeel dat Ek weggaan, want as Ek nie weggaan nie, sal die Raadgewer, die Heilige Gees, nie na julle toe kom nie. As Ek egter weggaan, sal Ek die Raadgewer na julle toe stuur. En wanneer Hy kom, sal Hy die wêreld oortuig van sy sonde, van God se regverdige oordeel, en dat die oordeel hier is. Van sonde, omdat die wêreld nie in My glo nie; van God se regverdige oordeel, omdat Ek teruggaan na die Vader toe en julle My nie meer sien nie; van veroordeling, omdat die regeerder van hierdie wêreld reeds veroordeel is. Ek het nog baie dinge om vir julle te sê, maar julle kan dit nie nou verwerk nie. Wanneer Hy ook al kom, die Gees van die waarheid, sal Hy julle begelei in die volle waarheid. Hy sal nie uit Homself praat nie, maar net sê wat Hy hoor. Hy sal die dinge wat gaan kom, aan julle meedeel. Hy sal My verheerlik omdat Hy dit wat Hy van My sal ontvang, aan julle sal meedeel. Alles waaroor die Vader beskik, behoort ook aan My; daarom dat Ek gesê het: “Wat Hy van My ontvang, sal Hy aan julle meedeel.” (NLV)

1. Die Heilige Gees word hier die Raadgewer (ander vertalings het Trooster) en Waarheid genoem. Hoe beoefen die Heilige Gees hierdie funksies of rolle in die lewe?

2. Die Heilige Gees gee nie raad of begeleiding uit sy eie nie. Wat bedoel Jesus as Hy sê dat die Gees net sê wat Hy hoor? Hoe werk dit?

3. Lees die verse later vandag weer om jou te herinner aan die feit dat die Heilige Gees jou Raadgewer en Begeleier is.

4. Jy kan later vanaand die verse weer in die konteks van Johannes 16 lees en my bydrae daaroor: Johannes 16:1-33 – Die Heilige Gees is ons inspirasie.

1. Wie en wat is die Heilige Gees?

2. Lees my antwoord en oordink dit.

Die Heilige Gees is die ewige Krag en Mag van God. Hy is saam met die Vader en die Seun ware en ewige God.Hy word saam met die Vader en die Seun aanbid en verheerlik. Hy is ook aan my gegee sodat Hy my deur ’n ware geloof deel kan laat kry aan Christus en al sy weldade, my kan troos en ewig by my bly.

3. Lees Lukas se verduideliking van wat met Pinksterdag gebeur het in Handelinge 2:1-21. Wat tref jou?

4. Lees my opmerkings daaroor. Oordink dit.

Die Heilige Gees word uitgestort op al die gelowiges

Op Pinksterdag was al die gelowiges saam. Skielik was daar ’n geluid van ’n geweldige stormwind. Dit het die hele huis gevul. Tonge soos vuurvlamme het op elkeen van hulle gaan sit. Almal is met die Heilige Gees vervul. Soos die Gees hulle die vermoë gegee het, het hulle in ander tale begin praat. Die ander Jode was heeltemal uit die veld geslaan. Petrus verduidelik toe vir hulle dat God se Gees uitgestort is soos die profeet Joël voorspel het. Elke mens – seuns en dogters, jongmense en oumense, mans en vroue – wat die Naam van die Here aanroep, sal verlos word.

5. Lees die Geloofsbelydenis van Nicea 8, die Nederlandse Geloofsbelydenis 11, en die Heidelbergse Kategismus 53. Dink na oor die betekenis van die Heilige Gees.

Geloofsbelydenis van Nicea 8

Ons glo in die Heilige Gees, wat Here is en lewend maak. Hy gaan van die Vader en die Seun uit, en Hy word saam met die Vader en die Seun aanbid en verheerlik. Hy het deur die profete gespreek.

Nederlandse Geloofsbelydenis 11

DIE GODHEID VAN DIE HEILIGE GEES

Ons glo en bely ook dat die Heilige Gees van ewigheid van die Vader en die Seun uitgaan; dat Hy nie gemaak of geskep of gebore is nie maar van albei slegs uitgaan; dat Hy in orde die derde Persoon in die Drie-eenheid is; dat Hy van een en dieselfde wese, majesteit en heerlikheid as die Vader en die Seun is; dat Hy inderdaad ware en ewige God is, soos die Heilige Skrif ons leer.

Gen 1:1; Heb. 1:3; 11:3; Joh. 1:3; Ps. 33:6; Jer 32:17; Mal. 2:10; Joh. 1:3; 16:26; Ps. 104; Amos 4:13; Joh. 14:16, 26.

Heidelbergse Kategismus 53

53 Vraag: Wat glo jy van die Heilige Gees?

Antwoord: Ten eerste is Hy saam met die Vader en die Seun ware en ewige God (a). Ten tweede is Hy ook aan my gegee (b) sodat Hy my deur ‘n ware geloof deel laat kry aan Christus en al sy weldade, (c) my troos (d) en ewig by my bly (e).

(a) 1 Joh 5:7; Gen 1:2; Jes 48:16;1 Kor 3:16; 6:19; Hand 5:3, 4. (b) Gal 4:6; Matt 28:19, 20; 2 Kor 1:22 ; Ef 1:13. (c) Gal 3:14;1 Pet 1:2;1 Kor 6:17. (d) Joh 15:26; Hand 9:31. (e) Joh 14:16;1 Pet 4:14.

Jesus is hier besig om sy derde toespraak in Matteus af te sluit met die koninkryksrede.  Hy gebruik agt gelykenisse om te fokus op die koninkryk en veral op die wyse waarop mense op die evangelie van die koninkryk gaan reageer. 

Twee van dié gelykenisse is baie prominent.  Die gelykenis van die Saaier en die gelykenis van die onkruid tussen die koring. 

En laasgenoemde gelykenis handel spesifiek oor die vraag na die onderskeid tussen die ware en die valse kerk, soos dit ook in die Nederlandse Geloofsbelydenis van Guido de Bres, artikel 29, een van ons kerk se geloofsbelydenisse, beskryf word.

1. Lees die Geloofsbelydenis van Athanasius 41-44, die Nederlandse Geloofsbelydenis 37, die Heidelbergse Kategismus 11, 52, en 84, en die Westminster Geloofsbelydenis 33. Wat leer jy oor die betekenis van die oordeelsdag vir alle mense? Wat beteken dit vir jou? Wat vra dit van jou?