Psalm 37:1-11, 39-40 – Vind jou vreugde in die Here, dan sal Hy jou gee wat jou hart begeer

15 Februarie

Psalm 37:1-11, 39-40 – Vind jou vreugde in die Here, dan sal Hy jou gee wat jou hart begeer

¹Van Dawid. Moet jou nie ontstel oor die kwaaddoeners nie; moenie afgunstig wees op hulle wat kwaadwillig optree nie, ²want soos gras verdor hulle vinnig, en soos groen plante verwelk hulle. ³Vertrou op die Here en doen die goeie, bewoon die land en waak oor betroubaarheid. ⁴Vind jou vreugde in die Here, dan sal Hy jou gee wat jou hart begeer.  ⁵Vertrou jou lewenspad aan die Here toe, vertrou op Hom, en Hy sal optree. ⁶Hy sal jou geregtigheid soos die oggendlig laat verskyn en jou reg soos die middagson.  ⁷Wees stil voor die Here, en krimp ineen van vrees voor Hom. Moet jou nie ontstel oor iemand wat sukses behaal op sy lewenspad nie, oor ‘n mens wat komplotte smee nie.  ⁸Moenie kwaad word nie en laat vaar die woede; moet jou nie ontstel nie, dit bring net kwaad. ⁹Want kwaaddoeners sal vernietig word, maar wie op die Here wag – hulle sal die land besit.  ¹⁰Nog net ‘n rukkie, dan sal daar geen goddelose meer wees nie. Jy sal sy plek dophou, maar hy sal nie daar wees nie. ¹¹Die verdruktes sal die land besit en hulle verlustig in die oorvloed vrede …  ³⁹Regverdiges se verlossing kom van die Here – hulle toevlug in ‘n tyd van verdrukking. ⁴⁰Die Here help hulle en bevry hulle. Hy bevry hulle van goddeloses en verlos hulle, want hulle skuil by Hom.

Twee maniere van leef word in hierdie wysheid Psalm met mekaar gekontrasteer, dié van die goddeloses (kwaaddoeners) wat hom of haar nie aan God steur nie en dié van die gelowiges (regverdiges) wat dit wel doen (vgl Ps 1). Wysheid lê in ’n God-gesentreerde lewe. Om jou vreugde te vind in die Here en die lewe in sy teenwoordigheid. Om jou behoeftes aan Hom bekend te maak, en op sy gawes te vertrou. Want, dit is dan dat jy sal ervaar dat God se belofte om in jou behoeftes te voorsien, vervul sal word. Dwaasheid is egter om Hom te probeer vermy en ignoreer, en God-loos te probeer lewe. Die uiteinde van só ‘n lewe is gebrek en die dood, want God laat só ‘n mens oor aan sy behoefte om niks met God te doene te hê nie. As jy sonder God wil lewe, laat Hy jou uiteindelik begaan en onttrek Hy sy teenwoordigheid en sorg.

Dit is duidelik dat hierdie wyse woorde gerig word aan mense wat dit nie maklik het in die wêreld nie. Hulle lei onder skelms en skurke (vers 1, 7, 9), het te kampe met onregverdige beskuldigings (vers 6), en ly onder verdrukking (vers 11). Die Psalm wil hulle dus help teen een van die groot versoekings vir gelowiges – om jou eie kop te volg, om die reg in eie hand te neem – as jy onder druk verkeer. Die wyse weg, sê Dawid, is om ten spyte van alles voort te gaan om jou werk rustig te doen en die Here te vertrou (vers 3-4), want dit is Hy wat belowe dat Hy jou die begeertes van jou hart sal gee (vers 5). Eksterne faktore moet nie lei tot ’n versaking van die pad van die Here nie. Eerder ’n meer nougesette fokus op die handhawing nie net van die innerlike verbintenis aan die Here nie, maar ook van die lewenstyl wat Hy van ons vra.

Die groot gevaar volgens die Psalm is die emosies wat in jou opgewek word as jy jou lewe vergelyk met dié van die goddeloses (vgl Ps 73). Daarom dat “in stilte” die Here vertrou moet word (vers 7). Dat nie kwaad en ontsteld geraak moet word nie (vers 7-8). Omdat dit uiteindelik net ellende bring. Soos Paulus skryf: “Moet oor niks besorg wees nie, maar maak in alles julle begeertes deur gebed en smeking en met danksegging aan God bekend, en die vrede van God wat alle verstand te bowe gaan, sal oor julle harte en gedagtes die wag hou in Christus Jesus” (Fil 4:6-7). Bring jou hart dus tot rus voor die Here deur jou vreugde in Hom te vind en Hom te vertrou vir die vervulling van jou behoeftes.

Lees meer: https://bybelskool.com/psalm-37-wysheid-le-in-n-god-gesentreerde-lewe/