Lukas 6:27-38 – Dié wat in liefde lewe teenoor almal sal kinders van die Allerhoogste wees

16 Februarie

Lukas 6:27-38 – Dié wat in liefde lewe teenoor almal sal kinders van die Allerhoogste wees

²⁷“Maar vir julle wat na My luister, sê Ek: Julle moet julle vyande liefhê. Doen goed aan diegene wat julle haat. ²⁸Seën die mense wat julle vervloek. Bid vir diegene wat julle sleg behandel. ²⁹As iemand jou op die een wang slaan, draai vir hom ook die ander een. En as iemand jou bokleed vat, moet hom ook jou onderkleed nie weier nie. ³⁰Gee aan elkeen wat iets van jou vra, en wanneer iemand vat wat aan jou behoort, moet jy dit nie terugeis nie. ³¹Soos julle wil hê die mense aan julle moet doen, doen ook so aan hulle. ³²As julle diegene liefhet wat vir julle liefhet, hoe kan julle enige dank verwag? Want ook die sondaars het diegene lief wat hulle liefhet. ³³En as julle net goeie dinge doen vir die mense wat goeie dinge vir julle doen, hoe kan julle enige dank verwag? Die sondaars doen dieselfde. ³⁴En as julle net geld uitleen aan mense van wie julle hoop om dit terug te kry, hoe kan julle enige dank verwag? Sondaars leen ook aan sondaars, solank hulle maar net dieselfde bedrag kan terugkry. ³⁵Nee, julle moet julle vyande liefhê, doen goeie dade, en leen uit sonder om iets terug te verwag. Dan sal julle ‘n groot beloning ontvang en kinders van die Allerhoogste wees, omdat Hy self die ondankbares en slegtes goed behandel. ³⁶Julle moet barmhartig wees soos julle Vader barmhartig is.” ³⁷“Moenie oordeel nie, dan sal ook julle beslis nie geoordeel word nie. Moenie veroordeel nie, dan sal julle ook nie veroordeel word nie. Vergeef, dan sal julle ook vergewe word. ³⁸Gee, en aan julle sal gegee word – ‘n goeie maat, saamgepers, ingeskud en tot oorlopens toe vol, sal in julle skoot val. Want met die maat waarmee julle meet, sal vir julle afgemeet word.”

Jesus vra van sy dissipels om hulle vyande lief te hê, om goed te doen aan dié wat hulle haat, om te gee sonder om terug te verwag, om soos God self die ondankbares en slegtes goed te behandel. Dit is deur liefde en goed doen wat die koninkryk aanbreek. Dit is nie genoeg om jouself te keer om te haat of te verwens nie. Die Here vra van ons om ‘n heel ander en radikale gesindheid te openbaar teenoor dié wat dit juis nie verdien nie. Om tot ‘n seën vir hulle te wees en vir hulle te bid. Dit is omdat Jesus wil hê dat ons nie geweld met geweld moet ontmoet nie, want dit sal beteken dat ons nie meer sal kan uitreik na sulke mense nie. Dit sluit nie uit dat ‘n mens in gesprek kan tree met iemand wat jou slaan nie. Jesus illustreer dit later in sy verhoor toe Hy die dienskneg wat Hom met die oop hand geklap het reguit vra oor die wettigheid van sy optrede (Joh 18:22). Maar geweld kan nie met geweld ontmoet word nie.

Jesus wys daarop dat die liefde van sy kinders vir ander nie afhanklik is van daardie mense se wederkerige liefde nie. Sondaars doen immers dieselfde. Kinders van die Allerhoogste moet meer doen as die sondaars. Hulle moet dié liefhê wat nie die liefde terug beantwoord nie, want anders het hulle nie soos God lief nie. Dieselfde geld van goeddoen. Hulle moet soos God goed doen. Dieselfde geld van die leen van geld. As jy leen om dieselfde bedrag terug te ontvang, is jy nie vrygewig soos God nie. Só ‘n radikale liefde bou vir ons ‘n skat by God op, en bevestig aan ons dat ons sy kinders is, die kinders van die Allerhoogste.

Jesus sê ook duidelik hier dat ons nie skynheilig moet oordeel of nog erger veroordeel nie, anders sal jy ook geoordeel of veroordeel word. Daar is ‘n plek vir teregwysing en vermaning in die gemeenskap van gelowiges. Trouens, dit is een van die merktekens van ‘n gesonde gemeenskap waarin leiers ‘n belangrike rol speel (vgl Matt 18;15-35; 1 Tess 5:12-15; 1 Kor 5-6; 2 Tim 3:16; 4:2; Tit 1:9; Hebr 3:13; 13:22; 1 Pet 2:11). Die oomblik wat ‘n mens egter die grens na veroordeling en vergelding oorsteek, gaan jy te ver. Wraak lei tot weerwraak. Die siklus van haat moet verbreek word, en dit kan net deur liefde gedoen word. Waar vyande liefgehê word, kan die vyandskap deurbreek word. Waar goed gedoen word aan haters, kan die haat uitgewis word. Waar vloekers geseën word, kan die vervloektes met hulle versoen word. Waar gebid word vir boosdoeners kan God ingryp om alles nuut te maak. Die oordeel behoort aan die Here. Hy neem daarvoor verantwoordelikheid. Ons kan dit gerus in sy hand laat.

Lees meer: https://bybelskool.com/lukas-61-49-luister-en-leef/