Genesis 45:3-11 – God gebruik selfs slegte bedoelings om sy goeie bedoelings te laat seëvier

14 Februarie

Genesis 45:3-11 – God gebruik selfs slegte bedoelings om sy goeie bedoelings te laat seëvier

³Toe sê Josef vir sy broers: “Ek is Josef. Leef my pa nog?” Sy broers kon hom nie antwoord nie, want hulle het verbysterd voor hom gestaan. ⁴Josef sê toe vir sy broers: “Kom tog nader na my!” Hulle het nadergegaan, en toe sê hy: “Ek is Josef, julle broer; julle het my verkoop om na Egipte geneem te word. ⁵Maar moet julle nou nie ontstel en julleself verwyt omdat julle my verkoop het en ek hier beland het nie; want dit is vir die behoud van lewens dat God my voor julle uit gestuur het. ⁶Ja, daar was nou al twee jaar lank hongersnood in die land, en daar is nog vyf jaar waarin daar nie geploeg of geoes sal word nie. ⁷Maar God het my voor julle uit gestuur om vir julle nakomelinge te vestig op aarde, en om julle in die lewe te hou met die oog op ‘n groot uitredding. ⁸Dus, dit is nie julle wat my hierheen gestuur het nie, maar God. Hy het my as ‘n vader vir die farao aangestel, as ‘n heer vir sy hele huishouding en ‘n regeerder oor die hele Egipteland. ⁹Maak gou en trek op na my pa. Sê vir hom, ‘So sê u seun Josef: “God het my aangestel as heer oor die hele Egipte. Trek af na my toe. Moenie talm nie! ¹⁰Kom woon in die Gosenstreek, sodat pa naby my kan wees – pa en pa se kinders en kleinkinders, en ook pa se kleinvee en beeste en alles wat aan pa behoort. ¹¹Ek sal pa daar van kos voorsien, want daar gaan nog vyf jaar lank hongersnood wees. Anders verarm pa – pa, pa se huis en almal wat aan pa behoort.” ’

Josef se opgewondenheid om sy broers te sien, borrel oor in ‘n stortvloed van woorde waarin hy soveel as moontlik probeer inprop van alles wat die afgelope twee dekades sedert hulle hom verkoop het, gebeur het. Hy brei ook uit, met amper te veel detail, van wat hy voorsien vir die toekoms. Maar, Josef sien terselfdertyd die vrees van sy broers en die diep skuldbesef van die onmenslike onreg wat hulle hom aangedoen het. Josef beklemtoon daarom tussen die baie detail oor die hongersnood en sy planne vir die toekoms ‘n baie belangrike perspektief. Dit is dat hulle nie verder moet sleg voel of bang wees omdat hulle hom verkoop het nie, want dit was alles deel van God se planne vir hulle almal. Hy gaan sover as om te sê: “Dis nie júlle wat my hierheen gestuur het nie, maar God.” Vier keer beklemtoon hy God se werk in die gebeure tot dusver: “God het my voor julle uit gestuur om lewens te red.” Dat hulle hom verkoop het, is so. En hulle het reeds al daarvoor skuld erken. Maar, dié slegte bedoelings het in God se beplanning ‘n goeie uitkoms gehad. Die hele familie het daarby baat gevind deurdat hulle nou in Egipte aan die lewe gehou sou kon word sodat die belofte van God dat hulle ‘n groot volk gaan word, vervul kan word.

Watter ongelooflike geestelike insig het Josef nie. Dit gee ‘n mens ‘n nuwe perspektief op die belofte wat  Paulus in Romeine 8:28 onderstreep dat God alles ten goede laat meewerk vir hulle wat Hom liefhet. Ons kan in die lig van die Josefverhaal met groter waardering hierdie belofte van God vasgryp. Trouens, dit rig ons lewens op die dieper belofte van die hiernamaals. Soos Josef sy broers as ”eerste” vooruitgegaan het, sodat “baie broers” uiteindelik nie net aan die lewe gehou kon word deur die kos in Egipte nie, maar in die proses ook geestelike volwasse kon word, só het Jesus dit ook vir ons gedoen. Ons is ook besig om te groei om soos Jesus te word. En Hy doen dit op ‘n besondere wyse deur presies die onontwykbare lyding waaraan ons in hierdie lewe blootgestel word. Sommige daarvan verdiend, soos Josef sy broers op verskillende wyses laat “ly” het met sy optrede en opdragte. Sommige daarvan onverdiend, soos dit die geval was met Josef se ontvoering en slawerny. Dat alles ten goede meewerk, dra dus nie net die boodskap dat alles aan die einde uitwerk nie, maar dat ons in die proses die tipe mense word wat God van ons wil maak. Lyding – verdiend en onverdiend – is die smeltkroes van geestelike groei.

Wat ons daaruit moet leer, is dat sonder lyding min van waarde ooit in ons eie lewe tot stand kom. En daarmee saam, dat ons moet toelaat dat hierdie geestelike proses in ander se lewe sy loop neem. Ons moet ander nie te gou afskryf, omdat hulle nie op dieselfde plek in hulle geestelike lewe as ons is nie.

Lees meer: https://bybelskool.com/genesis-45-josef-omhels-sy-broers-en-verklaar-dat-alles-god-se-werk-was/