Psalm 103:1-5 – Loof die Here wat al jou siektes genees
14 Januarie
Psalm 103:1-5 – Loof die Here wat al jou siektes genees
1Van Dawid. Loof die Here, o my siel, ja, alles wat in my is, sy heilige Naam! 2Loof die Here, o my siel, en moenie enige van sy weldade vergeet nie – 3Hy wat al jou sondeskuld vergewe, wat al jou siektes genees, 4wat jou lewe vrykoop van die graf, jou kroon met troue liefde en ontferming, 5wat jou begeerte met die goeie versadig. Soos ‘n arend word jou jeug dan weer nuut. (Ps 103:1-5)
Psalm 103 is ’n besondere lofpsalm wat in ’n besondere lofpsalm reeks, Psalm 103–106, die 4de Psalmboek afsluit. Die Psalm fokus op lofprysing as ’n persoonlike (vers 1-5), korporatiewe (vers 6-18) en universele (vers 19-22) gebeure waaraan almal in die hemel en op aarde moet deelneem. Dit is ook betekenisvol dat die eienskap van God wat die meeste besing word, sy troue liefde (ḥěsěḏ) is. Sy troue liefde wys in sy verlossing, vergifnis, genesing, beskerming van die dood (vers 4), sy geduld en genade deur nie vir altyd toornig te wees nie (vers 8), dat Hy ons nie vergeld volgens ons sondeskuld nie (vers 11) en dat Hy sy troue liefde vir altyd en in alle geslagte betoon (vers 17). Die Psalm beskryf God se wese en werk daarom op ‘n haas onvergelyklike manier.
In die persoonlike oproep tot lofprysing (vers 1-5) word ons opgeroep om God te loof met ons siel, dws jou wese, jou menswees, jou persoon of persoonlikheid, dit wat die wêreld van jou kan agterkom in terme van jou interaksie met hulle. Asook met “alles wat in my is”. Dit dui letterlik op jou binnegoed en metafories op jou binnekant in terme van gedagtes en emosies. Die bedoeling is dus dat die Here met jou hele menswees, wat jou gedagtes en emosies insluit, jou buitekant en jou binnekant, geloof en geprys moet word.
Die inhoud van die lofprysing fokus op God se persoonlike weldade waarvan Dawid wil hê dat ons geeneen daarvan sal vergeet nie. Dink vandag na oor jou ervarings van God tot dusver: 1) dat God al jou sondeskuld vergewe; 2) al jou siektes genees; 3) jou lewe vrykoop van die dood; 4) jou kroon met sy troue liefde en ontferming; 5) jou begeerte met die goeie versadig; 6) jou die jeugdige krag van die arend gee. Let nou op die teenwoordige tyd waarin Dawid dit skryf. En bid dat God dié beloftes ook nou vir jou sal waar maak.
Lees meer: https://bybelskool.com/psalm-103-ek-wil-die-here-loof-met-alles-wat-in-my-is/
Discover more from Bybelskool
Subscribe to get the latest posts sent to your email.
Yvonne
Ek wil graag meer weet oor psalm 103vers 5
Chris van Wyk
Hi Yvonne
Vers 5 moet in die konteks van die Psalm uitgelê word. Die eerste vyf verse vorm ‘n eenheid:
1 Van Dawid.
Loof die Here, o my siel,
ja, alles wat in my is,
sy heilige Naam!
2 Loof die Here, o my siel,
en moenie enige van sy weldade
vergeet nie –
3 Hy wat al jou sondeskuld vergewe,
wat al jou siektes genees,
4 wat jou lewe vrykoop van die graf,
jou kroon met troue liefde
en ontferming,
5 wat jou begeerte
met die goeie versadig.
Soos ‘n arend word jou jeug
dan weer nuut. (2020-vertaling)
Dit is ‘n persoonlik lofprysing (vers 1-5) wat opgevolg word deur lofprysing in die geloofsgemeenskap (vers 6-18) en lofprysing van die hemelse wesens (vers 19–22).
Die inhoud van sy persoonlike lofprysing fokus op God se persoonliks weldade aan hom waarvan hy geeneen wil vergeet nie,
* dat Hy al sy sondeskuld vergewe het (dink aan die sonde met Batseba); * dat Hy hom van al sy siektes genees (dink aan Psalm 38 waar hy beide sy fisiese en sy geestelike toestand beskryf);
* dat Hy selfs sy lewe vrykoop van die dood (dink aan al die vervolgings van Saul en die talle oorloë waar sy lewe in gevaar was);
* en hom kroon met troue liefde en ontferming (dink aan die Here se gawe aan hom van koningskap).
Vers 5 som dit dan alles op met die boodskap dat dié God Dawid versadig met die goeie en hom die jeugdige krag van die arend gee, een wat bó al die moeilikhede en uitdagings van die lewe kan uitstyg. Die arend is simbolies van krag en spoed, miskien vanweë sy vermoë om vinnig van bo af aan te val (John Barry, Faithlife Study Bible). Dit kan ook wees dat Dawid hier verwys na die “molting” (ververing) proses van sommige arende, waar hulle vere vernuwe word (NET Notes). Weiser sê in sy kommentaar op die Psalm: “The poet realizes that the opportunities which life offers lie before him just as they did in the sunny days of his youth.”
Die beeld van die arend wat vernuwe word, is hoe Dawid die Here se uitkomste en invloed in sy lewe ervaar.
Die Psalmis gee dan in die volgende gedeelte ’n omvattende beskrywing van wie God is en wat Hy doen, sy wese en sy werke. Dit verruim nie net ons Godsbegrip nie, maar verdiep ons verwagting van God in sewe inspirerende perspektiewe:
Die enigste reaksie wat daar by ons kán wees op dié beskrywing van God is ontsag.
Maar, dit is nog nie klaar nie. Die persoonlike en korporatiewe lofprysing vir God se wese en werk mond nou uit in ’n universele lofprysing vir God se heerskappy oor alles (vers 19). Die engele en hemelwesens (vers 20-21) word saam met alles wat Hy gemaak het, opgeroep om Hom te prys op al die plekke waar Hy heers (vers 22).
En die Psalm sluit af met dieselfde oproep aan homself as wat hy in vers 1 gedoen het: “Ek moet die Here prys!”